ଭୁବନେଶ୍ୱର, ୧୨/୦୨: ଅପରେସନ ଗ୍ରୀନ୍ କ୍ଲିନ୍ ମାଧ୍ୟମରେ ଗଞ୍ଜେଇ ଧରିବାରେ ବୌଦ୍ଧ ପୋଲିସକୁ ମିଳିଛି ବଡ଼ ସଫଳତା । ଗାଡ଼ି ଛାଡ଼ି ମାଫିଆ ଫେରାର ହୋଇଯାଇଥିବା ବେଳେ ଗାଡିରେ ଥିବା ସମସ୍ତ ଗଞ୍ଜେଇକୁ ଜବତ କରିଛି ପୋଲିସ । ଆଦର୍ଶ ଥାନା ଅନ୍ତର୍ଗତ ବଘିଆପଡ଼ା ଫାଣ୍ଡି ପନ୍ଥେଇ ଛକରେ ଆଦର୍ଶ ଥାନା ପୋଲିସ ସ୍ପେଶାଲ ଟିମ୍ ଚଢାଉ କରି ୨ ହଜାର ୭୨୦ କେଜି ଗଞ୍ଜେଇ ଜବତ କରିଛି । ଜବତ ଗଞ୍ଜେଇର ଆନୁମାନିକ ମୂଲ୍ୟ ପ୍ରାୟ ୨ କୋଟି ୭୦ ଲକ୍ଷ ଟଙ୍କା ହେବ ।
ସୂଚନା ମୁତାବକ, ବଘିଆପଡ଼ା ଫାଣ୍ଡି ପନ୍ଥେଇ ଛକ ନିକଟରେ ବାହାର ରାଜ୍ୟକୁ ଚାଲାଣ ହେବା ପାଇଁ ଗଞ୍ଜେଇ ଗଚ୍ଛିତ କରି ରଖା ଯାଇଥିଲା । ସେଠାରୁ ଚାଲାଣ ପାଇଁ ପ୍ରସ୍ତୁତ ହେଉଥିବା ନେଇ ବୌଦ୍ଧ ପୋଲିସ କୌଣସି ସୂତ୍ରରୁ ଖବର ପାଇ ଥାନା ଅଧିକାରୀ ରଞ୍ଜିତ ମୁନିଙ୍କ ନେତୃତ୍ୱରେ ଏକ ଟିମ୍ ଗଠନ କରି ଉକ୍ତ ସ୍ଥାନରେ ଚଢାଉ କରିଥିଲା। ଚଢାଉ ସମୟରେ ପୋଲିସକୁ ଦେଖି ଗଞ୍ଜେଇ ମାଫିଆ ମାନେ ଫେରାର ହୋଇଯାଇଥିବା ବେଳେ ପୋଲିସ ସେମାନଙ୍କୁ ଧରିବାରେ ସକ୍ଷମ ହୋଇ ପାରିଲା ନାହିଁ । ହେଲେ ଉକ୍ତ ସ୍ଥାନରେ ଚଢାଉ କରି ପ୍ରାୟ ୨ ହଜାର ୭୨୦ କେଜି ଗଞ୍ଜେଇକୁ ଜବତ କରିବାରେ ସଫଳ ହୋଇଛି ପୋଲିସ । ଜବତ ଗଞ୍ଜେଇର ଆନୁମାନିକ ମୂଲ୍ୟ ପ୍ରାୟ ୨ କୋଟି ୭୦ ଲକ୍ଷ ଟଙ୍କା ହୋଇଥିବା ବେଳେ ଗଞ୍ଜେଇକୁ ଜବତ କରି ପୋଲିସ ତଦନ୍ତ କରୁଥିବା ସୂଚନା ମିଳିଛି । ଜିଲ୍ଲାରେ ବିଭିନ୍ନ ସମୟରେ ବିଭିନ୍ନ ସ୍ଥାନରେ ବୌଦ୍ଧ ପୋଲିସ ଚଢ଼ାଉ କରି ବିପୁଳ ପରିମାଣରେ ଗଞ୍ଜେଇ ଜବତ କରୁଥିବା ବେଳେ କିନ୍ତୁ ମାଫିଆକୁ ଧରିବାରେ ପୋଲିସର ବିଫଳତାକୁ ନେଇ ପୋଲିସର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି।
