ନୂଆଦିଲ୍ଲୀ: ଦିଲ୍ଲୀ ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି) ବିପୁଳ ବହୁମତ ହାସଲ କରିଥିବା ବେଳେ ସରକାର ଗଠନ କରିବାକୁ ଯାଉଛି । ସେପଟେ ଦୀର୍ଘ ବର୍ଷ ଧରି ଶାସନରେ ରହିଆସିଥିବା ଆମ ଆଦମୀ ପାର୍ଟି (ଆପ୍‌) ବିରୋଧୀ ଭୂମିକାରେ ନଜର ଆସିବ ।  ତେବେ ଦିଲ୍ଲୀ ବିଧାନସଭା ନିର୍ବାଚନ ୨୦୨୫ରେ ବିଜେପିର ସବୁଠାରୁ ଚର୍ଚ୍ଚିତ ଚେହେରା ରହିଆସିଛନ୍ତି ପରବେଶ ବର୍ମା । ନୂଆଦିଲ୍ଲୀ ଆସନରୁ ବିଜେପିର ପ୍ରାର୍ଥୀ ହୋଇଥିବା ପରବେଶ ବର୍ମା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ପ୍ରାୟ ୫ ହଜାର ଭୋଟରେ ପରାସ୍ତ କରିଛନ୍ତି । ପରବେଶ ବର୍ମା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ସାହିବ ସିଂହ ବର୍ମାଙ୍କ ପୁଅ । 

ଏବେ ସେ ନିର୍ବାଚନରେ ବିଜୟୀ ହୋଇଥିବା ବେଳେ ଦିଲ୍ଲୀର ମୁଖ୍ୟମନ୍ତ୍ରୀ ହୋଇପାରନ୍ତି ବୋଲି ଚର୍ଚ୍ଚା ହେଉଛି । ତେବେ ପରବେଶଙ୍କ ସଂପତ୍ତି କେତେ ବୋଲି ଅନେକଙ୍କ ମନରେ ପ୍ରଶ୍ନ । ତାଙ୍କ ପାଖରେ କେତୋଟି ଗାଡ଼ି ଅଛି ? କେତେ ସଂପତ୍ତିର ମାଲିକ ପରବେଶ ବର୍ମା ? ୪୭ ବର୍ଷୀୟ ପରବେଶ ବର୍ମା ସ୍ନାତକୋତ୍ତର ଡିଗ୍ରୀଧାରୀ । ସେ ନିର୍ବାଚନରେ ଅରବିନ୍ଦ କେଜ୍ରିଓ୍ବାଲଙ୍କୁ ବିପୁଳ ଭୋଟରେ ପରାସ୍ତ କରିଛନ୍ତି। ଦିଲ୍ଲୀରେ ଜନ୍ମିତ ପରବେଶ ବର୍ମା ଦିଲ୍ଲୀ ବିଶ୍ୱବିଦ୍ୟାଳୟରୁ ବି.କମ୍ ପାସ୍‌  କରିଛନ୍ତି । ଏହା ବ୍ୟତୀତ ସେ ଗ୍ଲୋବାଲ୍ ଟ୍ରେଡ୍‌ରେ MBA ମଧ୍ୟ କରିଛନ୍ତି । 

ବିଧାନସଭା ନିର୍ବାଚନ ପାଇଁ ସେ ଦାଖଲ କରିଥିବା ସତ୍ୟପାଠ ଅନୁଯାୟୀ, ତାଙ୍କ ୮୯ କୋଟି ଟଙ୍କାର ବ୍ୟକ୍ତିଗତ ସମ୍ପତ୍ତି ରହିଛି । ତାଙ୍କ ପତ୍ନୀ ସ୍ୱାତୀ ସିଂହଙ୍କ ସମ୍ପତ୍ତିର ମୂଲ୍ୟ ୨୪.୪ କୋଟି ଟଙ୍କା । ଏହି ଦୁଇଜଣଙ୍କ ମିଳିତ ସମ୍ପତ୍ତି ୧୧୩ କୋଟି ଟଙ୍କା। ବର୍ମାଙ୍କ ଦ୍ୱାରା ଘୋଷିତ ଆର୍ଥିକ ବିବରଣୀ ଅନୁସାରେ, ତାଙ୍କର ନଗଦ ୨.୨ ଲକ୍ଷ ଟଙ୍କା ଥିଲା । ୫୨.୭୫ କୋଟି ଟଙ୍କାର ଇକ୍ୱିଟି ଏବଂ ସେୟାର ବଜାର ନିବେଶ ରହିଛି । ତାଙ୍କର ୧୭ ଲକ୍ଷ ଟଙ୍କାର ବୀମା ନିବେଶ ମଧ୍ୟ ଅଛି । ସେହିଭଳି ସ୍ୱାତୀ ସିଂହ ୫.୫ ଲକ୍ଷ ଟଙ୍କାର ବୀମା କରିଛନ୍ତି । ପରବେଶ ବର୍ମାଙ୍କର ଅନେକ କାର ଅଛି । ଏଥିରେ ଟୋୟୋଟା ଫର୍ଚ୍ୟୁନର, ଟୋୟୋଟା ଇନୋଭା ଏବଂ ମହିନ୍ଦ୍ରା XUV ଅନ୍ତର୍ଭୁକ୍ତ । ବର୍ମା କହିଛନ୍ତି ଯେ, ତାଙ୍କ ପାଖରେ ୮.୨୫ ଲକ୍ଷ ଟଙ୍କା ମୂଲ୍ୟର ୨୦୦ ଗ୍ରାମ ସୁନା ମଧ୍ୟ ଅଛି।