ନୂଆଦିଲ୍ଲୀ ୧୩/୦୫: ଭାରତ ଏବଂ ପାକିସ୍ତାନ ମଧ୍ୟରେ ଏବେ ଯୁଦ୍ଧ ବିରତି ଘୋଷଣା ହୋଇଛି । ଉଭୟ ଦେଶ ମଧ୍ୟରେ ହୋଇଥିବା ଯୁଦ୍ଧରେ ପାକିସ୍ତାନକୁ ବଡ଼ ଧରଣର କ୍ଷତି ସହିବାକୁ ପଡ଼ିଛି । ୩ ଦିନରୁ ସାମାନ୍ୟ ଅଧିକ ଚାଲିଥିବା ଏହି ଯୁଦ୍ଧରେ ପାକିସ୍ତାନକୁ ୪ ବିଲିୟନ ଡଲାର(୩୩,୪୦୦ କୋଟି)ର କ୍ଷତି ସହିବାକୁ ପଡ଼ିଛି । ଏହି ରାଶି ଆଇଏମ୍ଏମ୍ ଠାରୁ ନିକଟରେ ମିଳିଥିବା ୨.୪ ବିଲିୟନ ଡଲାରର ଋଣ ଠାରୁ ଅଧିକ ରହିଛି । ଏଭଳି ସ୍ଥିତିରେ ପାକିସ୍ତାନ ପୁଣି ଥରେ ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) କିମ୍ବା ବିଶ୍ୱର ଅନ୍ୟ ପ୍ରମୁଖ ଏଜେନ୍ସିଙ୍କ ସାମ୍ନାରେ ଅର୍ଥ ଲାଗି ହାତ ପାତିବାକୁ ପଡ଼ିବ ବୋଲି ଆକଳନ କରାଯାଇଛି ।
ଗତ ମାସରେ ପହଲ୍ଗାମରେ ହୋଇଥିବା ଆତଙ୍କି ଆକ୍ରମଣ ପରେ ଭାରତ ପାକିସ୍ତାନକୁ କଡ଼ା ଜବାବ ଦେଇଥିଲା । ଭାରତ ଅପରେସନ ସିନ୍ଦୂର ଦ୍ୱାରା ପାକିସ୍ତାନ ଏବଂ ପିଓକେରେ ଥିବା ଆତଙ୍କି ଠିକଣା ଉପରେ ଟାର୍ଗେଟ କରିଥିଲା । ପାକିସ୍ତାନ ଏଥିରେ ଉତକ୍ଷୀପ୍ତ ହୋଇ ଭାରତୀୟ ସେନା ଏବଂ ସୀମାରେ ଲାଗିଥିବା ଗ୍ରାମ ଗୁଡ଼ିକର ସାଧାରଣ ନାଗରିକଙ୍କୁ ଆକ୍ରମଣ କରିଥିଲା । ପାକିସ୍ତାନର ଏହି ଆକ୍ରମଣକୁ ଦୃଢ଼ ଜବାବ ଦେଇଥିଲା । ଭାରତର ଏୟାର ଡିଫେନ୍ସ ସିଷ୍ଟମ ଗୁଡ଼ିକ ପାକିସ୍ତାନର ଆକ୍ରମଣକୁ ପ୍ରତିହତ କରିଥିଲେ ।
ଆମେରିକା ଆନାଲିଷ୍ଟ ସହର ଖାନ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ ଶେୟାର କରିଛନ୍ତି । ଏହି ସଂଘର୍ଷରେ ପାକିସ୍ତାନକୁ ପ୍ରାୟ ୪ ବିଲିୟନ ଡଲାରର କ୍ଷତି ହୋଇଥିବା ସେ କହିଛନ୍ତି । ମିଲିଟାରି ଅପରେସନରେ ପାକିସ୍ତାନ ପ୍ରତିଦିନ ୨୫ ନିୟୁତ ଡଲାର ଖର୍ଚ୍ଚ କରିଛି । ସେହିଭଳି ଡ୍ରୋନ ଏବଂ ମିଶାଇଲ ଅପରେସନ ଲାଗି ୩୦୦ ନିୟୁତ ଡଲାର, ଶେୟାର ବଜାରରେ ହ୍ରାସ ଯୋଗୁ ୨.୫ ବିଲିୟନ ଡଲାର, ପିଏସ୍ଏଲ୍ ନିଲମ୍ବନ ଯୋଗୁ ୧୦ ନିୟୁତ ଡଲାର ଏବଂ ଏୟାରସ୍ପେଶ ବନ୍ଦ ହେବା ଯୋଗୁ ୨୦ ନିୟୁତ ଡଲାର କ୍ଷତି ସହିଛି ।
ପାକିସ୍ତାନର ସ୍ଥିତି ଏବେ ଖରାପ ରହିଛି । ମୁଡିସ ରିପୋର୍ଟ ମୁତାବକ, ପାକିସ୍ତାନର ବିଦେଶୀ ମୁଦ୍ରା ଭଣ୍ଡାର ଦୁର୍ବଳ । ପାକିସ୍ତାନ ନିକଟରେ ୧୫ ବିଲିୟନ ଡଲାରର ବିଦେଶୀ ମୁଦ୍ରା ଭଣ୍ଡାର ରହିଛି । ଭାରତ ନିକଟରେ ୬୮୮ ବିଲିୟନ ଡଲାରର ବିଦେଶୀ ମୁଦ୍ରା ଭଣ୍ଡାର ରହିଛି । ୧୯୪୮ ପରଠୁ ପାକିସ୍ତାନ ଆମେରିକା ଠାରୁ ୪୦ ବିଲିୟନ ଡଲାରର ସହାୟତା ପାଇଛି । ସେହିଭଳି କାନାଡା, ବ୍ରିଟେନ, ୟୁରୋପ ଭଳି ଦେଶ ଗୁଡ଼ିକରୁ ପାକିସ୍ତାନ ୫୫ ବିଲିୟନ ଡଲାରର ସହାୟତା ପାଇଛି ।
