ନୂଆଦିଲ୍ଲୀ,୫।୬: ପହଲଗାମ୍ ଆକ୍ରମଣ ପରେ ‘ଅପରେସନ୍ ସିନ୍ଦୂର’କୁ ନେଇ ଭାରତ ଓ ପାକିସ୍ତାନ ସମ୍ପର୍କରେ ଅଧିକ ତିକ୍ତତା ବଢିଛି। ଭାରତ ଦୁନିଆର ବହୁ ଦେଶରେ ଆତଙ୍କବାଦ ପ୍ରସଙ୍ଗରେ ପାକିସ୍ତାନର ମୁଖା ଖୋଲିବାକୁ ଚେଷ୍ଟା କରୁଛି। ତେବେ ଏ ସବୁ ଭିତରେ ଜାତିସଂଘର ସୁରକ୍ଷା ପରିଷଦ(ୟୁଏନ୍ଏସ୍ସି)ରେ ପାକିସ୍ତାନକୁ ମିଳିଛି ବଡ଼ ଦାୟିତ୍ବ। ପାକିସ୍ତାନ ୟୁଏନ୍ଏସ୍ସିରେ ୨୦୨୫ ପାଇଁ ତାଲିବାନ କଟକଣା କମିଟିର ଅଧ୍ୟକ୍ଷତା କରିବ। ଏହାଛଡା ଆତଙ୍କବାଦକୁ ସୁରକ୍ଷା ଦେଉଥିବା ପାକିସ୍ତାନକୁ ଆତଙ୍କ ନିରୋଧି କମିଟିର ଉପାଧ୍ୟକ୍ଷ ମଧ୍ୟ କରାଯାଇଛି। ଏହି ନିଷ୍ପତ୍ତି ଜାତିସଂଘର ସୁରକ୍ଷା ପରିଷଦ ସଂସ୍ଥା ଦ୍ବାରା ନିଆଯାଇଛି।
ଜାତିସଂଘର ୧୯୮୮ ତାଲିବାନ କଟକଣା କମିଟି ସେହି ବ୍ୟକ୍ତି, ସଂଗଠନ ଓ ୟୁନିଟ୍ ଉପରେ ଆର୍ଥିକ କଟକଣା, ଯାତ୍ରା କଟକଣା ଓ ହତିଆରର ଯୋଗାଣ ଉପରେ ରୋକ ଲଗାଉଛି। ଯିଏକି ତାଲିବାନ ସହ ଜଡିତ ଅଛନ୍ତି। ସେମାନଙ୍କୁ ଆଫଗାନିସ୍ତାନର ଶାନ୍ତି, ସ୍ଥିରତା ଓ ସୁରକ୍ଷା ପାଇଁ ବିପଦ କୁହାଯାଉଛି। ଏହି କମିଟିରେ ପାକିସ୍ତାନର ଅଧ୍ୟକ୍ଷ ହୋଇଛି। ସେଭଳି ଗୁଏନା ଓ ରୁଷ ଉପାଧ୍ୟକ୍ଷ ରହିବେ। ପାକିସ୍ତାନ ବ୍ୟତୀତ ଡେନମାର୍କକୁ ISIS ଓ ଅଲକାଏଦା କମିଟିର ଅଧ୍ୟକ୍ଷ ନିଯୁକ୍ତ କରାଯାଇଛି। ସେଭଳି ରୁଷ, ସିଏରା ଲିଓନ ଉପାଧ୍ୟକ୍ଷ ରହିବେ। ଅଲଜେରିଆକୁ ଆତଙ୍କବାଦୀ ନିରୋଧି କମିଟିର ଅଧ୍ୟକ୍ଷ ନିଯୁକ୍ତ କରାଯାଇଛି। ଯେଉଁଥିରେ ଫ୍ରାନ୍ସ, ପାକିସ୍ତାନ ଓ ରୁଷ ମଧ୍ୟ ଉପାଧ୍ୟକ୍ଷ ରହିବେ। ପାକିସ୍ତାନ ୨୦୨୫-୨୬ ପର୍ଯ୍ୟନ୍ତ ଜାତିସଂଘର ସୁରକ୍ଷା ପରିଷଦରେ ଅସ୍ଥାୟୀ ସଦସ୍ୟ ରହିଛି। ପରିଷଦର ସବୁ କଟକଣା କମିଟି ୧୫ ସଦସ୍ୟ ଦେଶକୁ ନେଇ ତିଆରି ହୋଇଛି। ତାଙ୍କର ନିଷ୍ପତ୍ତି ସର୍ବ ସମ୍ମତିରେ ନିଆଯାଏ।
ଭାରତ ଲଗାତାର ଅନ୍ତର୍ଜାତୀୟ ସମୁଦାୟକୁ ଏହା କହୁଛି ଯେ, ପାକିସ୍ତାନ ଆତଙ୍କବାଦର ଗଡ। ଅଲକାଏଦା ମୁଖ୍ୟ ଓସମା ବିନ୍ ଲାଡେନ ବହୁ ବର୍ଷ ପାକିସ୍ତାନର ଏବୋଟାବାଦରେ ଲୁଚି ରହିଥିଲା। ୨୦୧୧ରେ ଆମେରିକା ନୌସେନାର ସିଲ୍ କମାଣ୍ଡୋ ଦ୍ବାରା ସେ ନିହତ ହୋଇଥିଲା। ବାରମ୍ବାର ଭାରତ ଦାବି କରିବା ପରେ ମଧ୍ୟ ୟୁଏନ୍ଏସ୍ସିରେ ଏବେ ପାକିସ୍ତାନକୁ ଏଭଳି ବଡ ଦାୟିତ୍ବ ମିଳିଛି। ଭାରତ ୨୦୨୧-୨୨ କାର୍ଯ୍ୟକାଳରେ ୟୁଏନ୍ଏସସିର ଆତଙ୍କ ନିରୋଧି କମିଟିର ଅଧ୍ୟକ୍ଷତା ମଧ୍ୟ କରିଥିଲା। ବର୍ତ୍ତମାନ ଜାତିସଂଘର ସୁରକ୍ଷା ପରିଷଦରେ ୫ ଜଣ ସଦସ୍ୟ ରହିଛି। ଚୀନ୍, ଫ୍ରାନ୍ସ, ବ୍ରିଟେନ୍ ଓ ଆମେରିକାକୁ ଏହି ସମ୍ମାନ ମିଳିଛି।
