ନୂଆଦିଲ୍ଲୀ,୧୨/୦୮: ପହଲଗାମ ଆତଙ୍କୀ ଆକ୍ରମଣର ପ୍ରତିଶୋଧ ନେଇଥିଲା ଭାରତ । ଆତଙ୍କୀ ଆଡ୍ଡା ଧ୍ୱଂସ କରିଥିଲା । ସିନ୍ଦୂର ମାଡ଼ରେ ଛାରଖାର ହୋଇଥିବା ଆତଙ୍କୀସ୍ଥାନ ତଥାପି ସୁଧୁରୁନାହିଁ । ପୁଣି ସୀମା ଟପିଛି ପାକିସ୍ତାନ । ଅପରେସନ୍ ସିନ୍ଦୂର ମାଡ଼ରେ ହତାଶ୍ ପାକିସ୍ତାନ ଇସଲାମାବାଦରେ ଅବସ୍ଥାପିତ ଭାରତୀୟ କୂଟନୀତିଜ୍ଞକୁ ହଇରାଣ ହରକତ କରୁଛି । ତାଙ୍କୁ ଜରୁରୀ ଜିନିଷ ଯୋଗାଇବା ଉପରେ ବାଧା ସୃଷ୍ଟି କରୁଛି ।
କୂଟନୀତିଜ୍ଞଙ୍କୁ ଟାର୍ଗେଟ କରିବା ସହିତ ସେମାନଙ୍କୁ ରନ୍ଧନ ଗ୍ୟାସ, ପାଣି ଓ ଖବରକାଗଜ ପାଇବାରୁ ବଞ୍ଚିତ କରିଛି । ଉଚ୍ଚାୟୁକ୍ତ ଓ ଅନ୍ୟ କୂଟନୀତିଜ୍ଞଙ୍କ ଘରକୁ ଖବରକାଗଜ ଯୋଗାଣ ବନ୍ଦ କରିଦେଇଛି ବୋଲି ସୂତ୍ରରୁ ଜଣାପଡିଛି । ସେମାନଙ୍କ ବାସଭବନ ଏବଂ କାର୍ଯ୍ୟାଳୟରେ ପ୍ରବେଶ କରୁଛି । ସେହିପରି ଭାରତ ଯେସାକୁ ତେସା ନୀତି ଆପଣାଇ ନୂଆଦିଲ୍ଲୀରେ ଅବସ୍ଥାପିତ ପାକିସ୍ତାନୀ କୂଟନୀତିଜ୍ଞଙ୍କୁ ମଧ୍ୟ ଖବରକାଗଜ ଯୋଗାଣ ବନ୍ଦ କରିଦେଇଥିବା ଜଣାପଡିଛି । ୨୦୧୯ ପୁଲୱାମା ଆତଙ୍କୀ ଆକ୍ରମଣ ପରେ ବି ସମାନ ଘଟଣା ଦେଖିବାକୁ ମିଳିଥିଲା । ଭାରତର ସର୍ଜିକାଲ ଷ୍ଟ୍ରାଇକ ପରେ ପାକିସ୍ତାନ ଭାରତ କୂଟନୀତିଜ୍ଞଙ୍କୁ ହଇରାଣ କରିଥିଲା ।
କହି ରଖୁଛୁ କି, ପହଲଗାମ୍ ଆତଙ୍କବାଦୀ ଆକ୍ରମଣ ପରେ ଭାରତ ଅପରେସନ୍ ସିନ୍ଦୂର ଲଞ୍ଚ କରିଥିଲା । ଏ ସମୟରେ ବିପୁଳ କ୍ଷତି ସହିଥିଲା ପାକିସ୍ତାନ। ଅନେକ ଆତଙ୍କବାଦୀ ଆଡ୍ଡା ଧ୍ବଂସ ହେବ ସହ ୧୦୦ରୁ ଉର୍ଦ୍ଧ୍ବ ଆତଙ୍କୀ ନିପାତ ହୋଇଥିଲେ। ଏଥିରେ ହତାଶ୍ ହୋଇଯାଇଛି ପାକିସ୍ତାନ । ଏବେ ପାକିସ୍ତାନ ଇସଲାମାବାଦରେ ଅବସ୍ଥାପିତ ଭାରତୀୟ କୂଟନୀତିଜ୍ଞଙ୍କୁ ହଇରାଣ କରୁଛି।
