ନୂଆଦିଲ୍ଲୀ, ୧୨/୦୮ : ଆମେରିକାରେ ବସି ଭାରତକୁ ପରମାଣୁ ଧମକ ଦେଉଥିବା ଆସିମ ମୁନିରଙ୍କୁ ଆଇନା ଦେଖାଇଲେ ପୂର୍ବତନ ପେଣ୍ଟାଗନ ଅଧିକାରୀ। କହିଲେ ପାକିସ୍ତାନକୁ କରାଯାଉ ଆତଙ୍କୀ ଦେଶ ଘୋଷଣା। ପାକ୍ ଆର୍ମି ଚିଫ୍ ଜେନେରାଲ୍ଙ୍କ ଭାଷା ଓସାମା ବିନ ଲାଡେନ ଭଳି। ମୁନିରଙ୍କ ପରମାଣୁ ଧମକ ପରେ ପୂର୍ବତନ ପେଣ୍ଟାଗନ ଅଧିକାରୀ ମାଇକେଲ୍ ରୁବିନ ଏଭଳି ପ୍ରତିକ୍ରିୟା ଦେଇଛନ୍ତି। ଆମେରିକା ମାଟିରୁ ପାକିସ୍ତାନର ଧମକକୁ ସମ୍ପୂର୍ଣ୍ଣ ରୂପେ ଅଗ୍ରହଣୀୟ ବୋଲି କହିଛନ୍ତି।
ମାଇକେଲ୍ ରୁବିନ କହିଛନ୍ତି ଯେ, ମୁନିରଙ୍କ ବୟାନବାଜି ଓସାମା ବିନ ଲାଡେନର ଭାଷଣ ଭଳି ମନେ ହେଉଛି। ପାକିସ୍ତାନକୁ "ପ୍ରମୁଖ ଅଣ-ନାଟୋ ସହଯୋଗୀ" ମାନ୍ୟତା ଦେବା ବନ୍ଦ କରିଦେବା ଉଚିତ। ଏହାକୁ ଆତଙ୍କବାଦର ରାଷ୍ଟ୍ର ପ୍ରାୟୋଜକଙ୍କ ତାଲିକାରେ ରଖାଯିବା ଉଚିତ। ଆସିମ ମୁନିର ହେଉଛନ୍ତି ସୁଟ୍ ପିନ୍ଧା ଲାଡେନ।
ଆମେରିକୀୟ ଜେନେରାଲ୍ଙ୍କ ଉପସ୍ଥିତିରେ ମୁନିରଙ୍କ ପରମାଣୁ ଧମକକୁ ନେଇ ରୁବିନ ପ୍ରଶ୍ନ ଉଠାଇଛନ୍ତି। ତାଙ୍କର ଇସ୍ତଫା ଦାବି କରିଛନ୍ତି। ସେ କହିଛନ୍ତି, ଆମେରିକା ମାଟିରୁ ମୁନିର ଏଭଳି ଧମକ ଦେବା ବେଳେ ଆମେରିକୀୟ ଜେନେରାଲ୍ କାହିଁକି ଚୁପ୍ ରହିଲେ। କାହିଁକି ସେହି ବୈଠକରୁ ବ୍ୟାକ୍ଆଉଟ୍ କଲେନି ? ଏହା ଏକ ସମ୍ଵେଦନଶୀଳ ପ୍ରସଙ୍ଗ। ଏହା ଉପରେ ପାକିସ୍ତାନ ସ୍ପଷ୍ଟିକରଣ ନଦେବା ପର୍ଯ୍ୟନ୍ତ ମୁନିର କିମ୍ଵା ଯେକୌଣସି ଅନ୍ୟ ପାକିସ୍ତାନୀ ଅଧିକାରୀଙ୍କୁ ଆମେରିକାରେ ଅବାଞ୍ଚିତ ବ୍ୟକ୍ତି ଘୋଷଣା କରିଦେବା ଉଚିତ୍। ସେମାନଙ୍କୁ ଆମେରିକାର ଭିସା ନମିଳିବା ଉଚିତ୍।
