ନୂଆଦିଲ୍ଲୀ: ଭାରତ-ପାକିସ୍ତାନ ସମ୍ପର୍କରେ ଚାପ ବୃଦ୍ଧି ପାଉଥିବା ସମୟରେ, ପାକିସ୍ତାନର ସେନା ମୁଖ୍ୟ ଜେନେରାଲ ଆସିମ ମୁନୀରଙ୍କ ବାଚଳାମୀ ସମସ୍ତଙ୍କ ଧ୍ୟାନ ଆକର୍ଷଣ କରିଛି। ବର୍ତ୍ତମାନେ ମୁନୀର ଆମେରିକା ଗସ୍ତରେ ଥିବା ବେଳେ ଚେତାବନୀ ଦେଇ କହିଛନ୍ତି ଯେ, ଭାରତ ସହ ସମ୍ଭାବ୍ୟ ଯୁଦ୍ଧ ପରିସ୍ଥିତିରେ ଭାରତୀୟ ବ୍ୟବସାୟୀ ମୁକେଶ ଅମ୍ବାନୀଙ୍କ ରିଲାଏନ୍ସ ଇଣ୍ଡଷ୍ଟ୍ରିଜ୍ ପରିଚାଳିତ ଜାମନଗର ରିଫାଇନାରୀ ଆକ୍ରମଣର ସମ୍ମୁଖିନ ହୋଇପାରେ। ଏହି ଖବର ସାମ୍ନାକୁ ଆସିବା ପରେ ଆଞ୍ଚଳିକ ସୁରକ୍ଷା ଓ ଅର୍ଥନୈତିକ ସ୍ଥିରତା ପାଇଁ ଗମ୍ଭୀର ଚିନ୍ତା ସୃଷ୍ଟି କରିଛି।
ସୁଚନା ମୁତାବକ, ଜେନେରାଲ ମୁନୀରଙ୍କ ଚେତାବନୀ ଗୁଜରାଟରେ ଅବସ୍ଥିତ ରିଲାଏନ୍ସର ଜାମନଗର ରିଫାଇନାରୀକୁ ଇଙ୍ଗିତ କରିଛି। ଯାହା ବିଶ୍ୱର ସବୁଠାରୁ ବଡ଼ ତୈଳ ଶୋଧନାଗାରଗୁଡ଼ିକ ମଧ୍ୟରୁ ଗୋଟିଏ ଏବଂ ଭାରତର ଶକ୍ତି ଭିତ୍ତିଭୂମିର ଏକ ମୁଖ୍ୟ ଅଙ୍ଗ ଭାବେ ପରିଗଣିତ ହୋଇଥାଏ। ମୁନୀର ସମ୍ପ୍ରତି ଆମେରିକାରେ ଥିବା ବେଳେ ସେଠାରୁ ରହି ଏହିଭଳି ବୟାନବାଜି ଜାରି ରଖିଛନ୍ତି।
ରିପୋର୍ଟ ଅନୁଯାୟୀ, ଏହି ଚେତାବନୀ ଦୁଇ ଦେଶ ମଧ୍ୟରେ ବୃଦ୍ଧି ପାଉଥିବା ବାକ୍ଯୁଦ୍ଧର ପରିପ୍ରେକ୍ଷୀରେ ଆସିଛି। ପାକିସ୍ତାନର ସେନା ନେତୃତ୍ୱ ସୂଚନା ଦେଇଛନ୍ତି ଯେ ସଂଘର୍ଷ ହେଲେ ଭାରତର ପ୍ରମୁଖ ଅର୍ଥନୈତିକ ସ୍ଥଳି ଗୁଡିକ ଟାର୍ଗେଟ ହୋଇପାରେ। ଯଦିଓ ଚେତାବନୀର ସଠିକ ସ୍ୱରୂପ ସ୍ପଷ୍ଟ ହୋଇନାହିଁ, ତେବେ ଜାମନଗର ରିଫାଇନାରୀର ଉଲ୍ଲେଖ ରକ୍ଷା ବିଶେଷଜ୍ଞଙ୍କ ମଧ୍ୟରେ ଗମ୍ଭୀର ଚିନ୍ତା ସୃଷ୍ଟି କରିଛି।
ବର୍ତ୍ତମାନ ଭାରତ-ଆମେରିକା ମଧ୍ୟରେ ଥିବା ସମ୍ପର୍କରେ ଫାଟ ଦେଖାଯାଇଥିବା ବେଳେ ପାକିସ୍ଥାନ ଆମେରିକାର ନିକଟତର ହୋଇ ନିଜର ଫମ୍ଫା ବୟାନବାଜି ଜାରି ରଖିଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତୀୟ ପଣ୍ୟ ଉପରେ ୨୫% ଶୁଳ୍କ ଏବଂ ପାକିସ୍ତାନର ସେନା ନେତୃତ୍ୱ ସହ ତାଙ୍କର ସାକ୍ଷାତ ନୂଆଦିଲ୍ଲୀରେ ଚିନ୍ତା ସୃଷ୍ଟି କରିଛି। ଖବର ସରବରାହ ସଂସ୍ଥା କାର୍ନେଗୀ ଏଣ୍ଡୋମେଣ୍ଟ ରିପୋର୍ଟ ଅନୁଯାୟୀ, ପାହାଲଗାମ ଆକ୍ରମଣ ପରେ ଟ୍ରମ୍ପଙ୍କ ଜେନେରାଲ ମୁନୀରଙ୍କ ସହ ସାକ୍ଷାତ ଭାରତରେ ଅସନ୍ତୋଷ ସୃଷ୍ଟି କରିଛି।
ମୁନୀର ବାରମ୍ୱାର ଏଭଳି ଉତ୍ତେଜନାତ୍ମକ ବୟାନ ଦେଇ ଭାରତକୁ ଉସୁକେଇବାକୁ ଚେଷ୍ଟା କରୁଛନ୍ତି। ଅନ୍ୟପଟେ ପାକିସ୍ତାନରେ ଥିବା ଭାରତୀୟ ହାଇକମିଶନଙ୍କୁ ମଧ୍ୟ ହଇରାଣ କରିବାରେ ଲାଗିଛି ପାକିସ୍ଥାନ। ପାନିୟଜଳ, ଗ୍ୟାସ, ଖବରକାଗଜ ସହ ବାହାରୁ ସମସ୍ତ ଖାଦ୍ୟ ସାମଗ୍ରୀର କଟ୍-ଅପ କରି ପାକ୍ ହାଇ କମିଶନକୁ ଟାର୍ଗେଟ କରୁଛି। ଯାହା ଚିନ୍ତାର ବିଷୟ ଭବେ ଉଭା ହୋଇଛି।
