ନୂଆଦିଲ୍ଲୀ: ବିରି ମାଡ ଦେଖି କୋଳଥ ଚେପା। ଭାରତର ଆକ୍ରମଣାତ୍ମକ ରୂପ ଦେଖି ବିଳିବିଳଉଛି ପଡୋଶି ପାକିସ୍ତାନ। ଭୟଙ୍କର ମିସାଇଲ ଆକ୍ରମଣରେ ଡରିଯାଇ ପାକିସ୍ତାନ ସରକାର ଦେଶର ବାୟୁସୀମାକୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ବନ୍ଦ ରଖିବାକୁ ନିଷ୍ପତ୍ତି ନେଇଛନ୍ତି। ମିଳିଥିବା ଖବର ମୁତାବକ, ଏହି ସମୟରେ ଲାହୋର, ଇସଲାମାବାଦ, କରାଚୀ ଓ ସିଆଲକୋଟ ସମେତ ପ୍ରମୁଖ ସହରର ବିମାନବନ୍ଦରଗୁଡ଼ିକରେ ବାଣିଜ୍ୟିକ ଉଡ଼ାଣ ବନ୍ଦ ରହିବ। ଏହି ନିଷ୍ପତ୍ତି ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ଓ ଅପରେସନ ସିନ୍ଦୁର ପରେ ନିଆଯାଇଛି।
ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସ (ପିଆଇଏ) ମଧ୍ୟ ଆଗାମୀ ୧୨ ଘଣ୍ଟା ପାଇଁ ନିଜର ସମସ୍ତ ଉଡ଼ାଣ ବାତିଲ କରିଛି। ଯାତ୍ରୀମାନଙ୍କୁ ବିମାନବନ୍ଦରକୁ ନଆସି ଘରେ ରହିବାକୁ ଓ ପିଆଇଏ କଲ ସେଣ୍ଟର ସହ ଯୋଗାଯୋଗ ରଖିବାକୁ ପରାମର୍ଶ ଦିଆଯାଇଛି। ସିଆଲକୋଟ ଅନ୍ତର୍ଜାତୀୟ ବିମାନବନ୍ଦର ମଧ୍ୟ ଅସ୍ଥାୟୀ ଭାବେ ବନ୍ଦ ରହିଛି।
ପାକିସ୍ତାନର ତିନିଟି ବଡ ଏୟାର ବେସ ଉପରେ ଭାରତ ରକେଟ ମାଡ କରିଥିଲା। ଭାରତର ଏହି ଆକ୍ସନରେ ପାକିସ୍ତାନର ରଫିକି, ମୁରିଦ ଓ ରାୱଲପିଣ୍ଡି ଏୟାର ବେସ ଧ୍ୱସଂ ହୋଇଯାଇଛି। ଭାରତର ଏହି କଡା କାର୍ଯ୍ୟାନୁଷ୍ଟାନ ଦେଖି ଆଗକୁ ଆକ୍ରମଣ ହେବା ଭୟରେ ପାକିସ୍ତାନ ନିଜ ଏୟାରସ୍ପେସକୁ ବନ୍ଦ କରି ଦେଇଛି।
ଏନେଇ ପାକିସ୍ତାନର ସିଭିଲ ଏଭିଏସନ ଅଥରିଟି କହିଛି ଯେ, ପରିସ୍ଥିତି ସ୍ଥିର ହେଲେ ସାଧାରଣ ଉଡ଼ାଣ କାର୍ଯ୍ୟକ୍ରମ ପୁନର୍ବାର ଆରମ୍ଭ ହେବ। ଏହି ବାୟୁସୀମା ବନ୍ଦ ଯୋଗୁଁ ଅନେକ ପିଆଇଏ ଉଡ଼ାଣ ପ୍ରଭାବିତ ହୋଇଛି ଏବଂ କେତେକ ଉଡ଼ାଣକୁ ଅନ୍ୟତ୍ର ଡାଇଭର୍ଟ କରାଯାଇଛି।
