ନୂଆଦିଲ୍ଲୀ,୨୦।୫: ପାକିସ୍ତାନ ସେନା ମୁଖ୍ୟ ଜେନେରାଲ ସୟଦ ଅସୀମ ମୁନିରଙ୍କୁ ଦିଆଯାଇଛି ପଦୋନ୍ନତି। ଅପରେସନ ସିନ୍ଦୂରରେ ଶୋଚନୀୟ ପରାଜୟ ସତ୍ତ୍ୱେ, ତାଙ୍କୁ ଫିଲ୍ଡ ମାର୍ଶାଲ କରାଯାଇଛି। ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଂଘୀୟ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏହି ବୈଠକରେ ପ୍ରଧାନମନ୍ତ୍ରୀ ଶାହବାଜ ସରିଫ ଭାରତ-ପାକିସ୍ତାନର ସାମ୍ପ୍ରତିକ ପରିସ୍ଥିତି ବିଷୟରେ ସୂଚନା ଦେଇଥିଲେ।

ଜେନେରାଲ ଆୟୁବ ଖାନଙ୍କ ପରେ, ଅସୀମ ମୁନୀର ପାକିସ୍ତାନର ଦ୍ୱିତୀୟ ଫିଲ୍ଡ ମାର୍ଶାଲ ହୋଇଛନ୍ତି। ଏଠାରେ ବଡ଼ ପାର୍ଥକ୍ୟ ହେଉଛି ଯେ କ୍ୟାବିନେଟର ଅନୁମୋଦନ ସହିତ ଅସୀମ ମୁନିରଙ୍କୁ ଏହି ଉପାଧି ଦିଆଯାଇଛି ଏବଂ ଜେନେରାଲ ଆୟୁବ ଖାନ ନିଜକୁ ଫିଲ୍ଡ ମାର୍ଶାଲ ଘୋଷଣା କରିଥିଲେ। ପହଲଗାମ ଆତଙ୍କବାଦୀ ଆକ୍ରମଣ ପୂର୍ବରୁ, ଅସୀମ ମୁନିର ଦୁଇ ରାଷ୍ଟ୍ର ସିଦ୍ଧାନ୍ତର ସମର୍ଥନ କରିଥିଲେ ଏବଂ କହିଥିଲେ ଯେ ହିନ୍ଦୁ ଏବଂ ମୁସଲମାନ ଏକାଠି ରହିପାରିବେ ନାହିଁ। ସେ କହିଥିଲେ, ‘ଆମର ପୂର୍ବପୁରୁଷମାନେ ଭାବୁଥିଲେ ଯେ ଆମେ ହିନ୍ଦୁମାନଙ୍କଠାରୁ ଭିନ୍ନ, ଆମର ଚିନ୍ତାଧାରା, ଧର୍ମ ଏବଂ ପରମ୍ପରା ଭିନ୍ନ। ଏହା ହେଉଛି ଦ୍ୱି-ରାଷ୍ଟ୍ର ତତ୍ତ୍ୱର ମୂଳଦୁଆ।’

ସେ ଆହୁରି ମଧ୍ୟ କହିଛନ୍ତି ଯେ ପାକିସ୍ତାନର ପ୍ରତ୍ୟେକ ପିଢ଼ି ଦେଶକୁ ସୁରକ୍ଷା ଦେବା ପାଇଁ ବଳିଦାନ ଦେଇଛନ୍ତି ଏବଂ ଭବିଷ୍ୟତ ପିଢ଼ି ମଧ୍ୟ ପାକିସ୍ତାନର ବାସ୍ତବତାକୁ ବୁଝିବା ଉଚିତ। ତାଙ୍କ ଭାଷଣର ମୁଖ୍ୟ ଉଦ୍ଦେଶ୍ୟ ଥିଲା ପାକିସ୍ତାନରେ ଜାତୀୟତାବାଦ ଭାବନା ଜାଗ୍ରତ କରିବା, କିନ୍ତୁ କାଶ୍ମୀର ଉପରେ ତାଙ୍କ ମନ୍ତବ୍ୟକୁ ନେଇ ଭାରତ କଡା ନିନ୍ଦା କରିଛି। 

ଅସୀମ ମୁନିରଙ୍କ ଏହି ବୟାନର କିଛି ଦିନ ପରେ, ୨୨ ଏପ୍ରିଲ ୨୦୨୫ରେ, ପହଲଗାମରେ ଆତଙ୍କବାଦୀ ଆକ୍ରମଣ ହୋଇଥିଲା, ଯାହାର ଜବାବରେ ଭାରତ ‘ଅପରେସନ ସିନ୍ଦୂର’  ଯୋଗେ ’ପାକିସ୍ତାନରେ ଥିବା ଅନେକ ଆତଙ୍କବାଦୀ ଆଡ୍ଡାକୁ ଧ୍ୱଂସ କରିଥିଲା। ଆତଙ୍କବାଦୀଙ୍କୁ ସାହାଯ୍ୟ କରିବାକୁ ଆସିଥିବା ପାକିସ୍ତାନୀ ସେନାକୁ ମଧ୍ୟ ଭାରତୀୟ ସେନା ଉଚିତ ଜବାବ ଦେଇଥିଲା। ଭାରତୀୟ ସେନା ପାକିସ୍ତାନର ସେନା ଶିବିର ଏବଂ ଏୟାରବେସ୍ ଧ୍ୱଂସ କରିଥିଲା, ଏହା ସତ୍ତ୍ୱେ ଶାହବାଜ ସରକାର ନିଜ ପିଠି ଥାପୁଡ଼ାଉଛନ୍ତି। ପାକିସ୍ତାନ ସରକାର ବାୟୁସେନା ମୁଖ୍ୟ ମାର୍ଶାଲ ଜାହିର ଅହମ୍ମଦ ବାବର ସିଦ୍ଧୁଙ୍କ କାର୍ଯ୍ୟକାଳ ବୃଦ୍ଧି କରିବାକୁ ମଧ୍ୟ ନିଷ୍ପତ୍ତି ନେଇଛନ୍ତି। ସୟଦ ଅସୀମ ମୁନିର ୨୦୨୨ରୁ ପାକିସ୍ତାନର ୧୧ତମ ସେନା ମୁଖ୍ୟ ଭାବରେ କାର୍ଯ୍ୟ କରୁଛନ୍ତି। ୨୦୨୪ ନଭେମ୍ବରରେ, ସେନା ମୁଖ୍ୟ ଭାବରେ ତାଙ୍କର କାର୍ଯ୍ୟକାଳ ତିନି ବର୍ଷରୁ ପାଞ୍ଚ ବର୍ଷକୁ ବୃଦ୍ଧି କରାଯାଇଥିଲା। ପାକିସ୍ତାନୀ ସେନାର ଶୀର୍ଷ ପଦବୀରେ ନିଯୁକ୍ତ ହେବା ପୂର୍ବରୁ,  ମୁନୀର ISI ମୁଖ୍ୟ ଥିଲେ।