ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ପୁଞ୍ଜ ଜିଲ୍ଲାରେ ଥିବା ନିୟନ୍ତ୍ରଣ ରେଖା(ଏଲଓସି) ନିକଟରେ ପାକିସ୍ତାନ ସେନା ମଙ୍ଗଳବାର ଦିନ ଯୁଦ୍ଧବିରତି ଚୁକ୍ତିର ଉଲ୍ଲଂଘନ କରିଛି। ଏହି ଘଟଣାରେ ପାକିସ୍ତାନୀ ସେନା ଅନୁପ୍ରବେଶ କରିବାକୁ ଉଦ୍ୟମ କରିବା ସହ କୃଷ୍ଣା ଘାଟି ଅଞ୍ଚଳରେ ଅନାବଶ୍ୟକ ଗୁଳିଚାଳନା ଆରମ୍ଭ କରିଥିଲା। ଯାହାର ଜବାବରେ ଭାରତୀୟ ସେନା କଡା କାର୍ଯ୍ୟାନୁଷ୍ଠାନ ଗ୍ରହଣ କରିଛି। ସୂତ୍ରରୁ ପ୍ରକାଶ ଯେ, ଏହି ଗୁଳିବିନିମୟରେ ପାକିସ୍ତାନ ପକ୍ଷରେ ବହୁତ କ୍ଷୟକ୍ଷତି ହୋଇଛି। ଯେଉଁଥିରେ ୪-୫ ଜଣ ଅନୁପ୍ରବେଶକାରୀ ନିହତ ହୋଇଥିବା ସୂଚନା ମିଳିଛି।
ଭାରତୀୟ ସେନା ପକ୍ଷରୁ କୁହାଯାଇଛି ଯେ, ପାକିସ୍ତାନୀ ସେନା ଓ ଅନୁପ୍ରବେଶକାରୀମାନେ ପ୍ରଥମେ ଗୁଳିଚାଳନା ଆରମ୍ଭ କରିଥିଲେ। କିନ୍ତୁ ଭାରତୀୟ ସେନା ଏହାର ଦୃଢ଼ ଜବାବ ଦେଇ ପାକିସ୍ଥାନର ଅନୁପ୍ରବେଶ ପ୍ରୟାସକୁ ବିଫଳ କରିଦେଇଛି। ଏହି ଘଟଣା କୃଷ୍ଣା ଘାଟି ଅଞ୍ଚଳରେ ଘଟିଥିବା ବେଳେ ଉଭୟ ପକ୍ଷ ମଧ୍ୟରେ ଅନେକ ସମୟ ଧରି ଗୁଳିବିନିମୟ ଚାଲିଥିଲା। ଭାରତୀୟ ସେନା ସମ୍ପୂର୍ଣ୍ଣ ପ୍ରସ୍ତୁତି ସହ ଏହି ଅଞ୍ଚଳରେ ମୁତୟନ ରହିଛି ବୋଲି ସୂଚନା ପ୍ରଦାନ କରିଛି।
ସୂଚନା ଅନୁସାରେ, ସାମ୍ପ୍ରତିକ ମାସରେ ପାକିସ୍ତାନ ପକ୍ଷରୁ ଏହା ପ୍ରଥମ ଯୁଦ୍ଧବିରତି ଉଲ୍ଲଂଘନ ଘଟଣା। ଯାହାକୁ ଭାରତୀୟ ସେନା ସ୍ୱୀକାର କରିବା ସହ ଏହା ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହା ପୂର୍ବରୁ ଫେବୃଆରୀ ମାସରେ ମଧ୍ୟ କୃଷ୍ଣା ଘାଟି ସେକ୍ଟରରେ ସମାନ ଢଙ୍ଗରେ ଗୁଳିବିନିମୟର ଖବର ପ୍ରକାଶ ପାଇଥିଲା। ଭାରତୀୟ ସେନା ପକ୍ଷରୁ କୌଣସି ଜୀବନହାନି କିମ୍ବା ସମ୍ପତ୍ତି କ୍ଷୟକ୍ଷତି ହୋଇନଥିବା ସୂଚନା ମିଳିଛି।
ଦକ୍ଷିଣ ପିର ପଞ୍ଜାଲ ଅଞ୍ଚଳରେ ଗତ ଦୁଇ ମାସ ମଧ୍ୟରେ ସୀମାପାର ଗୁଳିଚାଳନା ଘଟଣାରେ ନାଟକୀୟ ଭାବେ ବୃଦ୍ଧି ପରିଲକ୍ଷିତ ହୋଇଛି। ସେନା ସୂତ୍ରରୁ ପ୍ରକାଶ ଯେ, ପାକିସ୍ତାନ ଏହି ଅଞ୍ଚଳରେ ବାରମ୍ବାର ଅନୁପ୍ରବେଶର ପ୍ରୟାସ କରୁଛି। କିନ୍ତୁ ପ୍ରତ୍ୟେକ ଥର ଭାରତୀୟ ସେନା ଏହାକୁ ବିଫଳ କରିଦେଉଛି। ତେବେ ଖବର ଲେଖା ହେବା ଯାଏ ଏହି ଘଟଣାରେ କେତେଜଣ ମୃତାହତ ହୋଇଛନ୍ତି ତାହା ସ୍ପଷ୍ଟ ହୋଇ ନାହିଁ।
