କଟକ, ୦୫/୧୨: ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ପକ୍ଷରୁ ହେବାକୁ ଥିବା ଓଡ଼ିଶା ସେକେଣ୍ଡାରୀ ସ୍କୁଲ୍ ଶିକ୍ଷକ ଯୋଗ୍ୟତା ପରୀକ୍ଷା (ଓଏସ୍ଏସ୍ଟିଇଟି)-୨୦୨୪ ପାଇଁ ରାଜ୍ୟରେ ୫୦ ହଜାରରୁ ଅଧିକ ପରୀକ୍ଷାର୍ଥୀ ଆବେଦନ କରିଛନ୍ତି । ପେପର୍-୧ରେ ପରୀକ୍ଷା ଦେବା ପାଇଁ ୪୭ ହଜାରରୁ ଅଧିକ ଅବେଦନ କରିଥିବା ବେଳେ ପେପର୍-୨ ପାଇଁ ୩ ହଜାର ୩ ଶହରୁ ଅଧିକ ପରୀକ୍ଷାର୍ଥୀ ଆବେଦନ କରିଥିବା ସୂଚନା ମିଳିଛି । ୫୦ ହଜାରରୁ ଅଧିକ ପରୀକ୍ଷାର୍ଥୀ ଏହି ପରୀକ୍ଷା ଦେଉଥିବାରୁ ପରୀକ୍ଷା ଆୟୋଜନ ପାଇଁ ବିଭିନ୍ନ ଜିଲ୍ଲାରେ ୧୮୨ଟି କେନ୍ଦ୍ର ଚୟନ କରାଯାଇଛି । ପରୀକ୍ଷା ସମ୍ପର୍କରେ ଖୁବ୍ଶୀଘ୍ର ବିଜ୍ଞପ୍ତି ପ୍ରକାଶ ବୋଲି ବୋର୍ଡ ସୂତ୍ରରୁ ସୂଚନା ମିଳିଛି ।
ଆସନ୍ତା ଜାନୁଆରୀରେ ଏହି ପରୀକ୍ଷା କରାଇବା ପାଇଁ ବୋର୍ଡ ପକ୍ଷରୁ ପ୍ରସ୍ତୁତି ଚାଲିଥିବା ଶୁଣିବାକୁ ମିଳୁଛି । ଏ ସମ୍ପର୍କରେ ବିଜ୍ଞପ୍ତି ପ୍ରକାଶ ପରେ ବୋର୍ଡ ପକ୍ଷରୁ ପରୀକ୍ଷାର୍ଥୀଙ୍କ ଆଡମିଟ୍ କାର୍ଡ ୱେବ୍ସାଇଟ୍ରେ ଉପଲବ୍ଧ କରାଯିବ ବୋଲି ଜଣେ ଅଧିକାରୀ କହିଛନ୍ତି । ୧୫୦ ନମ୍ବର ବିଶିଷ୍ଟ ଏହି ପରୀକ୍ଷା ଓଏମ୍ଆର୍ରେ ହେବ । ଓଏସ୍ଏସ୍ଟିଇଟିରେ ସାଧାରଣ ବର୍ଗର ପରୀକ୍ଷାର୍ଥୀଙ୍କ ଲାଗି ପାସ୍ ମାର୍କ ୬୮ ନମ୍ବର ରହିଛି । ଏସ୍ସି, ଏସ୍ଟି, ଶାରୀରିକ ଭିନ୍ନକ୍ଷମଙ୍କ ପାଇଁ ପାସ୍ ମାର୍କ ୫୩ ରହିଛି । ପେପର୍-୧, ପେପର୍-୨ ପରୀକ୍ଷା ଲାଗି ସମାନ ମାର୍କ ରହିଛି ।
ସୂଚନାଯୋଗ୍ୟ, ଓଏସ୍ଏସ୍ଟିଇଟି ଆବେଦନ ପାଇଁ ଗତ ନଭେମ୍ବର ୧୯ରୁ ଡିସେମ୍ବର ୧ ତାରିଖ ପର୍ଯ୍ୟନ୍ତ ସମୟ ଧାର୍ଯ୍ୟ ରହିଥିଲା । ଏଥିଲାଗି ବୋର୍ଡ ପକ୍ଷରୁ ଦିଆଯାଇଥିବା ଲିଙ୍କ୍ ଆଧାରରେ ପ୍ରାର୍ଥୀମାନେ ଅନ୍ଲାଇନ୍ରେ ଫର୍ମ ପୂରଣ କରିଥିଲେ ।
