ଭାପୁର,୩୧/୧୦: ଫତେଗଡ ଥାନା ଅନ୍ତର୍ଗତ ଗୋଳାପୋଖରୀ ପଞ୍ଚାୟତ ତରବାଲୋ ଗ୍ରାମରେ ବେଆଇନ ବାଣ ତିଆରିବେଳେ ବିସ୍ଫୋରଣ ଘଟି ଗୁରୁତର ଥିବା ବ୍ୟକ୍ତି ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସିତ ବେଳେ ମୃତ୍ୟୁ ଘଟିଥିବା ସୂଚନା। ଘଟଣାରୁ ପ୍ରକାଶ ଗୋଳାପୋଖରୀ ପଞ୍ଚାୟତ ତରବାଲୋ ଗ୍ରାମର ଆନନ୍ଦ ଦଳେଇଙ୍କ ପୁଅ ଧନେଶ୍ଵର ଦଳେଇ ବାଣ ତିଆରି କରି ବିକ୍ରି କରିଥାନ୍ତି । ଆଗକୁ ଦୀପାବଳି ପର୍ବକୁ ଦୃଷ୍ଟିରେ ରଖି ଘର ଭିତରେ ବାଣ ତିଆରି କରୁଥିଲେ । ୨୬ ତାରିଖ ସକାଳେ ବାଣ ଭିଡୁଥିବାବେଳେ ବାଣ ବିସ୍ଫୋରଣ ଘଟି ଧନେଶ୍ଵର ଦଳେଇଙ୍କ ହାତ, ଗୋଡ, ଦେହ ୬୦ପ୍ରତିଶତ ପୋଡ଼ି ଯାଇଥିବାବେଳେ ଘର ଭାଙ୍ଗି ଯାଇଥିଲା।
ଗୁରୁତର ଭାବରେ ଭାପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଥିଲେ। ଅବସ୍ଥା ଗୁରୁତର ଥିବାରୁ ଡାକ୍ଟର ଭୁବନେଶ୍ୱର ସ୍ଥାନାନ୍ତରିତ କରିଥିଲେ । ଫତେଗଡ ପୋଲିସ ପହଞ୍ଚି ଏକ ମାମଲା ରୁଜୁ କରିବା ସହିତ କିଛି ବାଣ ଓ ସାମଗ୍ରୀ ଜବତ କରିଥିଲା । ଆଜି ମେଡିକାଲରେ ଚିକିତ୍ସିତ ହେଉଥିବାବେଳେ ଧନେଶ୍ଵର ଦଳେଇଙ୍କ ମୃତ୍ୟୁ ଘଟିଥିଲା। ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଥିଲା। ଶୋକାକୁଳ ପରିବେଶରେ ଆଜି ସନ୍ଧ୍ୟାରେ ଶ୍ମଶାନରେ ଶବ ସତ୍କାର କରାଯାଇଥିବା ମୃତ ପରିବାରଙ୍କ ଠାରୁ ସୂଚନା ମିଳିଛି।
