ପୁରୀ, ୦୯/୦୩: ଶ୍ରୀମନ୍ଦିର ରୋଷଶାଳାରେ ଅଭାବ ଦେଖାଗଲାଣି ଓମ୍ଫେଡ୍ ଘିଅ । ଆବଶ୍ୟକ ଅନୁଯାୟୀ ଘିଅ ଓମ୍ଫେଡ୍ କର୍ତ୍ତୁପକ୍ଷ ଯୋଗାଇ ପାରୁନାହାନ୍ତି । ଦିନକ ଆଗରୁ ବରାଦ୍ କରିବା ସତ୍ତେ୍ୱ ମିଳୁନି ଘିଅ । ଏପରିକି ୩ରୁ ୪ ଦିନ ଅପେକ୍ଷା କରିବାକୁ ପଡୁଛି ବୋଲି କହିଛନ୍ତି ସୁଆରମହାସୁଆର ସେବକ ମଧୁସୂଦନ ସୁଆର ।
ସେ କହିଛନ୍ତି, ରାଜ୍ୟ ସରକାର ଓ ଶ୍ରୀମନ୍ଦିର ପ୍ରଶାସନର ନିଷ୍ପତ୍ତି ଅନୁଯାୟୀ ଶ୍ରୀମନ୍ଦିରରେ କେବଳ ଓମଫେଡ୍ ଘିଅ ବ୍ୟବହାର କରାଯାଉଛି। ମହାପ୍ରସାଦଠୁ ଆରମ୍ଭ କରି ଶୁଖିଲି ଭୋଗ ପ୍ରସ୍ତୁତିରେ ଓମ୍ଫେଡ ଘିଅ ବ୍ୟବହାର ହେଉଛି । ଦିନକୁ ପାଖାପାଖି ୧୦୦ ଟିଣ(୧୫ଲିଟର) ଆବଶ୍ୟକ । ହେଲେ ନିଯୋଗ ନିକଟରେ ଆବଶ୍ୟକ ମୁତାବକ ଘିଅ ମହଜୁଦ ରଖିବାରେ ଓମ୍ଫେଡ୍ କର୍ତ୍ତୃପକ୍ଷ ଫେଲ ମାରିଛନ୍ତି । ଆଜକୁ ୩ ଦିନ ହେଲାଣି ଜଣେ କି ଦୁଇ ଜଣ ନୁହଁନ୍ତି ୩୦ରୁ ଉଦ୍ଧ୍ୱର୍ ସୂପକାର ଘିଅ ଲାଗି ହନ୍ତସନ୍ତ ହେଲାଣି । ସେମାନେ ଏକ ପ୍ରକାର ବ୍ୟବସାୟରେ ହାତ ବାନ୍ଧି ବସିଛନ୍ତି । ତେବେ ଏନେଇ ପଚାରିବାରୁ କେବେ ଘିଅ ଆସିବ ତାହାର ସ୍ପଷ୍ଟ ଉତ୍ତର ମିଳି ପାରୁନାହିଁ ।
ଅନ୍ୟପକ୍ଷରେ ଆବଶ୍ୟକତାଠାରୁ କମ୍ ଘିଅ ବାହାରୁ ଅଣାଯାଉଛି । କେବଳ ଓମ୍ଫେଡ୍ ବ୍ରାଣ୍ଡ ବ୍ୟବହାର ଲାଗି କହିଥିବା ବେଳେ ବାହାର ବଜାରରୁ ଅଧିକ ଦରରେ କିଣିବାକୁ ପଡୁଛି । ପ୍ରଥମରୁ ଆସୁଥିବା ଘିଅ ଭଲ ରହିଥିଲା । ଏବେ ଟିଣରୁ ଟେଳା ଟେଳା ବାହାରିବା ସହ ବାସ୍ନା ନାହିଁ ବୋଲି ଶ୍ରୀ ସୁଆର କହିଛନ୍ତି । ତେବେ ଏହାକୁ ନେଇ ସୂପକାର ସେବକଙ୍କ ମଧ୍ୟରେ ଅସନ୍ତୋଷ ଦେଖାଯାଉଛି । ତେଣୁ କର୍ତ୍ତୃପକ୍ଷ ଏହା ଉପରେ ଦୃଷ୍ଟି ଦେବାକୁ ଶ୍ରୀ ସୁଆର ଦାବି କରିଛନ୍ତି । ଏସମ୍ପର୍କରେ ଶ୍ରୀମନ୍ଦିର ଉନ୍ନୟନ ପ୍ରଶାସକ ଦେବବ୍ରତ ସାହୁ କୁହନ୍ତି, ଉକ୍ତ ଘଟଣା ସମ୍ପର୍କରେ ସୁଆର ମହାସୁଆର ନିଯୋଗ ଏବଂ ଓମ୍ଫେଡ୍ କର୍ତ୍ତୃପକ୍ଷଙ୍କ ସହ ଆଲୋଚନା କରାଯାଇ ସମସ୍ୟା ସମାଧାନ କରାଯିବ ।
