କଟକ,୧୩/୧୨: କ୍ରୀଡ଼ାବିତ୍ ଦୂତୀ ଚାନ୍ଦଙ୍କ କାର୍ ୧୬ ନଂ. ଜାତୀୟ ରାଜପଥର କଟକ ମଧୁପାଟଣା ଛକ ନିକଟରେ ଦୁର୍ଘଟଣାଗ୍ରସ୍ତ ହୋଇଛି। ଦୂତୀ ତାଙ୍କ ବିଏମ୍ଡବ୍ଲୁ କାର୍ରେ ଯାଜପୁରରୁ ଭୁବନେଶ୍ୱର ଯାଉଥିବା ବେଳେ ମଧୁପାଟଣା ଛକ ନିକଟରେ ଏକ ଟ୍ରକ୍ ଚେଚିସ୍ ଗାଡ଼ି ଧକ୍କା ଦେଇଥିଲା । ଦୁର୍ଘଟଣାରେ ଦୂତୀଙ୍କର କୌଣସି କ୍ଷତି ହୋଇନଥିବା ବେଳେ ତାଙ୍କ ଗାଡ଼ି କ୍ଷତିଗ୍ରସ୍ତ ହୋଇଛି । ଏନେଇ ଦୂତୀଙ୍କ ପକ୍ଷରୁ ମଧୁପାଟଣା ଥାନାରେ ଏକ ଏତଲା ଦିଆଯାଇଛି । ପୁଲିସ୍ ଦୁର୍ଘଟଣାଗ୍ରସ୍ତ କାର୍ ଓ ଦୁର୍ଘଟଣା ଘଟାଇଥିବା ଟ୍ରକ୍କୁ ଜବତ କରି ତଦନ୍ତ ଜାରି ରଖିଛି । ଦୁର୍ଘଟଣା ଘଟାଇଥିବା ଗାଡ଼ିଟି ଜାମସେଦ୍ପୁରରୁ ବେଙ୍ଗାଲୁର ଅଭିମୁଖେ ଯାଉଥିଲା ବୋଲି ଜଣାଯାଇଛି ।
ସୂଚନାଯୋଗ୍ୟ, ଜାତୀୟ ରାଜପଥର ମଧୁପାଟଣା ଅଞ୍ଚଳରେ ବାରମ୍ବାର ଦୁର୍ଘଟଣା ଘଟୁଛି । ନିକଟରେ ଥିବା ମଧୁପାଟଣା ଥାନା ଓ ଟ୍ରାଫିକ୍ ଥାନା ପକ୍ଷରୁ ମଧ୍ୟ ଦୁର୍ଘଟଣା ଆଶଙ୍କାକୁ ଏଡ଼ାଇବା ପାଇଁ କୌଣସି ପ୍ରତିକାରତ୍ମକ ପଦକ୍ଷେପ ନିଆଯାଉନାହିଁ । ସେହିପରି ଏନ୍ଏଚ୍ଆଇ କର୍ତ୍ତୃପକ୍ଷଙ୍କ ପକ୍ଷରୁ ଦୁର୍ଘଟଣା ନିୟନ୍ତ୍ରଣ ପାଇଁ କୌଣସି ପଦକ୍ଷେପ ନିଆଯାଉନାହିଁ । ଫଳରେ ଏହି ଅଞ୍ଚଳ ଏବେ ଦୁର୍ଘଟଣା ପ୍ରବଣ ଇଲାକା ହୋଇଯାଇଛ ବୋଲି ବୁଦ୍ଧିଜୀବୀ ମହଲରେ ମତପ୍ରକାଶ ପାଇଛି ।
