ଘଟଗାଁ, ୨୬/୦୬ : ଜଙ୍ଗଲକୁ ଛତୁ ଆଣିବାକୁ ଯାଇଥିବା ବେଳେ ଆକ୍ରମଣ କଲେ ୩ ଭାଲୁ। ଚାଲିଗଲା ବୃଦ୍ଧଙ୍କ ଜୀବନ। କେନ୍ଦୁଝର ଜିଲ୍ଲା ଘଟଗାଁ ଥାନା ଅଧିନ କୋଲିପଶି ଗ୍ରାମକୁ ଲାଗିଥିବା ଅଟେଇ ସଂରକ୍ଷିତ ଜଙ୍ଗଲରେ ଏହି ଘଟଣା ଘଟିଛି। ବନ ବିଭାଗ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନାନୁଯାୟୀ, ଗୁରୁବାର ଭୋର୍ ସମୟରେ ଘଟଗାଁ ଥାନା ଅଧୀନ କୋଲିପଶୀ ଗ୍ରାମର ଜଣେ ବୃଦ୍ଧ ଛତୁ ଆଣିବା ପାଇଁ ଅଟେଇ ସଂରକ୍ଷିତ ଜଙ୍ଗଲକୁ ଯାଇଥିଲେ। ଏହି ସମୟରେ ୩ଟି ଭାଲୁ ତାଙ୍କୁ ଅତର୍କିତ ଆକ୍ରମଣ କରିଥିଲେ। ବୃଦ୍ଧଙ୍କ ଚିତ୍କାର ଶୁଣି ଛତୁ ପାଇଁ ଜଙ୍ଗଲକୁ ଯାଇଥିବା ଆଉ କିଛି ବ୍ୟକ୍ତି ଘଟଣାସ୍ଥଳରେ ପହଞ୍ଚିଥିଲେ। ହେଲେ ବୃଦ୍ଧଙ୍କ ମୃତ୍ୟୁ ହୋଇଥିବା ଦେଖି ବନ ବିଭାଗକୁ ଖବର ଦେଇଥିଲେ। ଘଟଣାସ୍ଥଳରେ ଘଟଗାଁ ବନ ବିଭାଗ ଏବଂ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି।
ବନ ବିଭାଗ ତରଫରୁ ଡାକବାଜି ଯନ୍ତ୍ର ସାହାଯ୍ୟରେ ଜଙ୍ଗଲକୁ ଏକୁଟିଆ ନଯିବାକୁ ଏବଂ ରାତି ସମୟରେ ନଯିବାକୁ ସଚେତନ କରାଯାଉଥିଲେ ବି ଗ୍ରାମବାସୀ ସଚେତନ ହେଉ ନାହାଁନ୍ତି। ଯେଉଁଥିପାଇଁ ଏଭଳି ଅଘଟଣ ଘଟୁଛି ବୋଲି ଚର୍ଚ୍ଚା ହେଉଛି। ତେବେ ମୃତକଙ୍କ ପରିବାରକୁ ବନ ବିଭାଗ ତରଫରୁ ସହାୟତା ମିଳିବ ବୋଲି ବନ ବିଭାଗର ଅଧିକାରୀ କହିଛନ୍ତି।
