ଭୁବନେଶ୍ୱର,୧୯/୧୦: ଓଲିଉଡ ଅଭିନେତା ବୁଦ୍ଧାଦିତ୍ୟ ମହାନ୍ତିଙ୍କ ନାଁରେ ଛାତ୍ର କଂଗ୍ରେସ କ୍ୟାପିଟାଲ ଥାନାରେ ଏତଲା ଦେଇଛି । ଅଭିଯୋଗ କରିଛି, ଗ୍ୟାଙ୍ଗଷ୍ଟାର୍ ଲରେନ୍ସ ବିଷ୍ଣୋଇକୁ ସରକାରୀ ଗୁପ୍ତଚର ସଂସ୍ଥା ବୋଲି ପରୋକ୍ଷରେ ଦର୍ଶାଇଛନ୍ତି ବୁଦ୍ଧାଦିତ୍ୟ । ଭାରତର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ହତ୍ୟା ପାଇଁ ଉସ୍କାଉଛନ୍ତି । ଏନେଇ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଛାତ୍ର କଂଗ୍ରେସ ଦାବି କରିଛି ।
ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନ କହିଛନ୍ତି ଯେ ବୁଦ୍ଧାଦିତ୍ୟ ଫେସ୍ବୁକରେ କରିଥିବା ପୋଷ୍ଟରେ ଆମେରିକାର ସିଆଇଏ ଓ ଜର୍ମାନର ଗେଷ୍ଟପା ସହ ଲରେନ୍ସ ବିଷ୍ଣୋଇକୁ ତୁଳନା କରିଥିଲେ । ଏମିତିକି ବାବା ଶିଦ୍ଦିକିଙ୍କ ହତ୍ୟା ପରେ ରାହୁଲ ଗାନ୍ଧୀଙ୍କ ପାଳି ପଡ଼ିବ ବୋଲି ତାଙ୍କ ଫେସବୁକ୍ ଆଇଡିରେ ପୋଷ୍ଟ କରିଛନ୍ତି । ଅର୍ଥାତ୍ ବିରୋଧୀ ଦଳର ନେତାଙ୍କୁ କିପରି ହତ୍ୟା କରାଯିବ, ସେନେଇ ତାଙ୍କ ପୋଷ୍ଟିଂ ମାଧ୍ୟମରେ ଲରେନ୍ସକୁ ଉସ୍କାଉଛନ୍ତି । ବୁଦ୍ଧାଦିତ୍ୟଙ୍କୁ ଗିରଫ କରିବାକୁ ସେ ଦାବି କରିଛନ୍ତି ।
ଅନ୍ୟପଟେ ଏହି ପୋଷ୍ଟକୁ ନେଇ ଝଡ଼ ସୃଷ୍ଟି ହେବା ପରେ ବୁଦ୍ଧାଦିତ୍ୟ ଏହାକୁ ଫେସ୍ବୁକରୁ ହଟାଇ ଦେଇଛନ୍ତି । ଏହାସହ ଅନ୍ୟ ଏକ ପୋଷ୍ଟରେ ଉଲ୍ଲେଖ କରିଛନ୍ତି, ଏଭଳି ମନ୍ତବ୍ୟ ଉଦ୍ଦେଶ୍ୟମୂଳକ ନଥିଲା । ତଥାପି ଯଦି କାହାରିକୁ ବାଧିଛି, ସେନେଇ ମୁଁ ଦୁଃଖିତ । ଛାତ୍ର କଂଗ୍ରେସ ନେତା ଶୁଭମ୍ ରାଜ, ବିଶ୍ୱଭୂଷଣ ମହାପାତ୍ର, ଗଣେଶ ଦାସ, ଶାହରୁକ୍ ଖାନ୍, ସୁନିଲ୍ କୁମାର୍ ଗାନ୍ଧୀ, ସିଦ୍ଧାନ୍ତ ଓମ୍ ପ୍ରକାଶ, ପ୍ରତୀକ ଦାସ ପ୍ରମୁଖ ଥାନାରେ ଉପସ୍ଥିତ ଥିଲେ ।