ଭୁବନେଶ୍ୱର,୨୦/୧୦: କମିଶନରେଟ୍ ପୁଲିସ ପକ୍ଷରୁ ଚାଲିଥିବା ‘ସେଫ୍ ସିଟି ଡ୍ରାଇଭ୍’ ଅଭିଯାନରେ ଗତକାଲି ରାତିରେ ୨୩ ମଦ୍ୟପ ଚାଳକଙ୍କୁ ଅଟକ ରଖାଯିବା ସହ ସେମାନଙ୍କ ଠାରୁ ୧୩,୫୦୦ ଟଙ୍କା ଜରିମାନା ଆଦାୟ କରାଯାଇଛି ।
କମିଶନରେଟ୍ ପୁଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଗତକାଲି ରାତିରେ ଭୁବନେଶ୍ୱର ସହରାଞ୍ଚଳରେ ଥିବା କ୍ୟାପିଟାଲ, ଖାରବେଳନଗର, ଧଉଳି, ଖଣ୍ଡଗିରି, ଜଟଣୀ, ବାଲିପାଟଣା, ଲକ୍ଷ୍ମୀସାଗର, ମଞ୍ଚେଶ୍ୱର, ମୈତ୍ରୀବିହାର, ଚନ୍ଦ୍ରଶେଖରପୁର, ନନ୍ଦନକାନନ ଓ ଚନ୍ଦକା ଥାନା ଅଧୀନରେ ଥିବା ବିଭିନ୍ନ ସ୍ଥାନରେ ସଂପୃକ୍ତ ଥାନା ଆଇଆଇସି ଓ ଏସିପିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ନାଇଟ ବ୍ୱକିଙ୍ଗ କରାଯାଇଥିଲା। ଏହି ଧରପଗଡ଼ ଅଭିଯାନରେ ଆଇନ ଉଲଙ୍ଘନକାରୀ ତଥା ମଦ୍ୟପ ଗାଡିଚାଳକଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ସ୍ୱରୂପ ସଂପୃକ୍ତ ଥାନାରେ ମାମଲା ରୁଜୁ କରା ଯାଇଥିଲା । କେତେକ କ୍ଷେତ୍ରରେ ପିଆର ଦିଆଯାଇଥିଲା । ଅନ୍ୟ କେତେକ ସ୍ଥଳେ ଆଇନ ଉଲଂଘନକାରୀଙ୍କ ନିକଟରୁ ଓଡିଶା ମୋଟର ଯାନ ଆଇନ ଏବଂ ଓଡିଶା ସହରାଞ୍ଚଳ ପୁଲିସ ଆଇନ ଅନୁଯାୟୀ ଜରିମାନା ଆଦାୟ କରଯାଇଥିଲା ।
ଏହି କ୍ରମରେ ମୋଟ ୨୦ ଜଣ ଆଇନ ଉଲଂଘନକାରୀଙ୍କ ନାମରେ ସଂପୃକ୍ତ ଥାନା ମାନଙ୍କରେ ପିଆର ଦିଆଯାଇଥିଲା । ମୋଟ ୩ଟି ୪ଚକିଆ ଯାନ ଓ ୨୦ଟି ୨ଚକିଆ ଯାନ ଜବତ କରାଯାଇଥିବା ବେଳେ ୨୩ ଜଣ ଉଲଂଘନକାରୀଙ୍କ ନିକଟରୁ ମୋଟ ୧୩,୫୦୦ ଟଙ୍କା ଜରିମାନା ଆଦାୟ କରଯାଇଥିଲା । ଏହି ଅଭିଯାନ ଆଗକୁ ମଧ୍ୟ ଜାରି ରହିବ ବୋଲି କମିଶନରେଟ୍ ପୁଲିସ ପକ୍ଷରୁ କୁହାଯାଇଛି ।