ନୂଆଦିଲ୍ଲୀ: ଉତ୍ତର କୋରିଆ ନିରନ୍ତର ଭାବେ ଏହାର ଯୁଦ୍ଧ କ୍ଷମତା ବୃଦ୍ଧି କରିବାରେ ଲାଗିଛି । ଦେଶ ଏବେ ଦୁଇଟି ନୂତନ ବାୟୁ ବିରୋଧୀ କ୍ଷେପଣାସ୍ତ୍ର ବିକଶିତ କରିଛି। ଉତ୍ତର କୋରିଆ ନେତା କିମ୍ ଜୋଙ୍ଗ ଉନ୍ ଏହି କ୍ଷେପଣାସ୍ତ୍ର ଗୁଡ଼ିକର ଯାଞ୍ଚ କରିଛନ୍ତି। ଏହା ବିଶ୍ୱାସ କରାଯାଏ ଯେ, ଦକ୍ଷିଣ କୋରିଆ ଏବଂ ଆମେରିକାର ମିଳିତ ସାମରିକ ଅଭ୍ୟାସ ମଧ୍ୟରେ ଉତ୍ତର କୋରିଆ ଏହାର କ୍ଷମତା ପ୍ରଦର୍ଶନ କରିଛି।
ଉତ୍ତର କୋରିଆର ସରକାରୀ କୋରିଆନ୍ ସେଣ୍ଟ୍ରାଲ୍ ନ୍ୟୁଜ୍ ଏଜେନ୍ସି କହିଛି ଯେ, ଶନିବାର ହୋଇଥିବା ଏହି ପରୀକ୍ଷଣ ପ୍ରମାଣିତ କରିଛି ଯେ, କ୍ଷେପଣାସ୍ତ୍ର ଗୁଡ଼ିକ ଡ୍ରୋନ୍ ଏବଂ କ୍ରୁଜ୍ କ୍ଷେପଣାସ୍ତ୍ର ଭଳି ବାୟୁ ବିପଦର ମୁକାବିଲା କରିବାରେ ପ୍ରଭାବଶାଳୀ ହେବ । କିମ୍ ଆସନ୍ତା ବର୍ଷ ଅନୁଷ୍ଠିତ ହେବାକୁ ଥିବା ଏକ ପ୍ରମୁଖ ରାଜନୈତିକ ସମ୍ମିଳନୀ ପୂର୍ବରୁ ପ୍ରତିରକ୍ଷା ବୈଜ୍ଞାନିକ ମାନଙ୍କୁ ଅନେକ ଗୁରୁତ୍ୱପୂର୍ଣ୍ଣ କାର୍ଯ୍ୟ ନ୍ୟସ୍ତ କରିଛନ୍ତି। ତଥାପି, କେଉଁ କ୍ଷେପଣାସ୍ତ୍ର ପରୀକ୍ଷଣ କରାଯାଇଥିଲା ଏବଂ ଏହା କେଉଁଠି ହୋଇଥିଲା ତାହା ସ୍ପଷ୍ଟ ନୁହେଁ?
ଏହି ପରୀକ୍ଷଣ ଏପରି ସମୟରେ ହୋଇଛି ଯେତେବେଳେ ଦକ୍ଷିଣ କୋରିଆର ନୂତନ ରାଷ୍ଟ୍ରପତି ଲି ଜାଏ ମ୍ୟୁଙ୍ଗ ଜାପାନ ପ୍ରଧାନମନ୍ତ୍ରୀ ଶିଗେରୁ ଇଶିବାଙ୍କ ସହ ଏକ ଶିଖର ସମ୍ମିଳନୀ ପାଇଁ ଟୋକିଓ ଗସ୍ତରେ ଅଛନ୍ତି। ଏହି ଶିଖର ସମ୍ମିଳନୀରେ, ସେ ଉତ୍ତର କୋରିଆର ପରମାଣୁ ମହତ୍ତ୍ୱାକାଂକ୍ଷା ସମେତ ସାଧାରଣ ଚ୍ୟାଲେଞ୍ଜର ମୁକାବିଲା ପାଇଁ ଆମେରିକା ସହିତ ଦ୍ୱିପାକ୍ଷିକ ସହଯୋଗ ଏବଂ ତ୍ରିପାକ୍ଷିକ ସହଭାଗୀତାକୁ ମଜବୁତ କରିବାକୁ ପ୍ରତିଶ୍ରୁତି ଦେଇଛନ୍ତି।
