ନୂଆଦିଲ୍ଲୀ,୧୦/୦୧: ଟାଟା ଟ୍ରଷ୍ଟର ଅଧ୍ୟକ୍ଷ ନୋଏଲ ଟାଟାଙ୍କ ଝିଅ ମାୟା ଏବଂ ଲିହ ଟାଟା ରତନ ଟାଟା ଇଣ୍ଡଷ୍ଟ୍ରିଆଲ ଇନ୍ଷ୍ଟିଚ୍ୟୁଟ (ଏସ୍ଆର୍ଟିଆଇଆଇ) ଟ୍ରଷ୍ଟି ବୋର୍ଡରେ ସାମିଲ ହୋଇଛନ୍ତି । ଇକୋନୋମିକ୍ସ ଟାଇମ୍ସ ଏ ନେଇ ଏକ ରିପୋର୍ଟ ପ୍ରକାଶ କରିଛି । ଏହା ଟାଟା ଗ୍ରୁପର ହୋଲ୍ଡିଂ କମ୍ପାନି ଟାଟା ସନ୍ସର ପ୍ରମୁଖ ସେୟାର ହୋଲ୍ଡରଙ୍କ ମଧ୍ୟରୁ ଅନ୍ୟତମ । ୨ ଭଉଣୀ ଅର୍ନାଜ କୋତୱାଲ ଏବଂ ଫ୍ରେଡି ତଲାତିଙ୍କ ସ୍ଥାନରେ ଅବସ୍ଥାପିତ ହେବେ । ଏହା ସହ ନୋଏଲ ଟାଟାଙ୍କ ପିଲାମାନେ ଟାଟା ଟ୍ରଷ୍ଟ ବୋର୍ଡରେ ସାମିଲ ହୋଇଛନ୍ତି ।
ତେବେ ଏମାନେ ୨ ପ୍ରମୁଖ ଟ୍ରଷ୍ଟ ସାର ରତନ ଟାଟା ଟ୍ରଷ୍ଟ ଆଣ୍ଡ୍ ଆଲାଏଡ ଟ୍ରଷ୍ଟ ଏବଂ ସାର ଦୋରାବ୍ଜି ଟ୍ରଷ୍ଟ ଆଣ୍ଡ୍ ଆଲାଏଡ ଟ୍ରଷ୍ଟରେ ସାମିଲ ହୋଇନାହାନ୍ତି । ମାୟା ଟାଟା କ୍ୟାପିଟାଲରୁ ନିଜ କ୍ୟାରିୟର ଆରମ୍ଭ କରିଥିଲେ । ବର୍ତ୍ତମାନ ସେ ଟାଟା ଡିଜିଟାଲ ଅଧିନ ଟାଟା ନ୍ୟୁ ଆପ୍ ପରିଚାଳନା ଟିମରେ କାର୍ଯ୍ୟ କରୁଛନ୍ତି ।
ସେହିଭଳି ଲିହ ଟାଟା ଇଣ୍ଡିଆନ ହୋଟେଲ୍ସରେ ଉପସଭାପତି ଭାବେ କାର୍ଯ୍ୟରତ । ସେ ଆଇଇ ବିଜନେସ ସ୍କୁଲରୁ ମାର୍କେଟିଂରେ ମାଷ୍ଟର ଡିଗ୍ରୀ ହାସଲ କରିଛନ୍ତି । ସେବା ନିବୃତ ଟ୍ରଷ୍ଟି ଅର୍ନାଜ କୋତୱାଲ ବୋର୍ଡରେ ଏହି ପରିବର୍ତ୍ତନକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି । ଏ ନେଇ ସେ ଅନ୍ୟ ଟ୍ରଷ୍ଟିମାନଙ୍କୁ ଚିଠି ଲେଖିଛନ୍ତି । ନୂଆ ଟ୍ରଷ୍ଟି ନିଯୁକ୍ତ କରିବା ଲାଗି ଯେଉଁ ଭଳି ତାଙ୍କୁ ଇସ୍ତଫା ଦେବାକୁ କୁହାଗଲା ତାହା ଠିକ୍ ନ ଥିବା କହିଛନ୍ତି ଶ୍ରୀ କୋତୱାଲ ।
