ନୂଆଦିଲ୍ଲୀ,୨୮।୭: ୟେମେନ ଜେଲ୍ରେ ଥିବା ଭାରତୀୟ ନର୍ସ ନିମିଷା ପ୍ରିୟାଙ୍କୁ ଫାଶୀ ଦଣ୍ଡ ଯଦିଓ ସ୍ଥଗିତ ହୋଇଛି, କିନ୍ତୁ ଚିନ୍ତା ସରିନି। ଖ୍ରୀଷ୍ଟିଆନ୍ ଧର୍ମ ପ୍ରଚାରକ କେଏ ପଲ୍ ଏକ ଭିଡିଓ ଜାରି କରି ୟେମେନ୍ର ହୁତି ପ୍ରଶାସନକୁ ନିମିଷା ପ୍ରିୟାଙ୍କୁ ମୁକ୍ତ କରିବାର ଅପିଲ କରିଛନ୍ତି। ଏହାଛଡା ସେ ନିମିଷାଙ୍କ ଫାଶୀ ଘୁଞ୍ଚାଇବା ପାଇଁ ହୁତି ପ୍ରଶାସନକୁ ଧନ୍ୟବାଦ ଜଣାଇଛନ୍ତି। ଏହା ମଧ୍ୟରେ ଭାରତରୁ ନିମିଷାଙ୍କ ସ୍ବାମୀ ଓ ଝିଅଙ୍କ ସହ ପୁରା ପରିବାର ୟେମେନରେ ପହଁଞ୍ଚିଛନ୍ତି। ସ୍ଥାନୀୟ ଏକ କୋର୍ଟ ନିମିଷାଙ୍କ ଫାଶୀ ତାରିଖ ୧୬ ଜୁଲାଇକୁ ଧାର୍ଯ୍ୟ କରିଥିଲେ। ତେବେ ସୁନ୍ନି ଗ୍ରାଣ୍ଡ ମୁଫତି କାନ୍ଥାପୁରମ୍ ଏପି ଅବୁବକର ମୁସାଲିୟାଙ୍କର ମଧ୍ୟସ୍ଥତା ପରେ ତାଙ୍କର ଫାଶୀ ତାରିଖ ଘୁଞ୍ଚାଇ ଦିଆଯାଇଥିଲା।
ନିମିଷାଙ୍କ ଝିଅ ମିଚେଲ ଓ ସ୍ବାମୀ ଥମସ୍ ବର୍ତ୍ତମାନ ୟେମେନର ସାନାରେ ଅଛନ୍ତି। ଭିଡିଓରେ ମିଚେଲ କହିଛନ୍ତି, ଆଇ ଲଭ ୟୁ ମା’। ଥମସ୍ ମଧ୍ୟ ନିମିଷାଙ୍କ ସଜା ଘୁଞ୍ଚାଇବା ପାଇଁ ହୁତି ପ୍ରଶାସନକୁ ଧନ୍ୟବାଦ ଦେଇଛନ୍ତି। ସେଭଳି ଇସାଇ ପାଦ୍ରି କିଲାରୀ ଆନନ୍ଦ ପଲ୍ ସ୍ପଷ୍ଟ ଭାବରେ ୟେମେନ ସରକାରଙ୍କୁ ଦୁନିଆରେ ଶାନ୍ତି ଓ ପ୍ରେମର ଉଦାହରଣ ସୃଷ୍ଟି କରିବାକୁ ନିମନ୍ତ୍ରଣ କରିଛନ୍ତି। କିଲାରୀ ଆନନ୍ଦ ଆନ୍ଧ୍ର ପ୍ରଦେଶରେ ରୁହନ୍ତି। ସେ ହେଉଛନ୍ତି ଆମେରିକୀୟ ସଂଗଠନ ଗ୍ଲୋବାଲ ପିସ୍ ଇନିଶିଏଟିଭର ସଂସ୍ଥାପକ।
କେଏ ପଲ୍ ହୁତି ବିଦ୍ରୋହୀଙ୍କ ନେତା ଅବଦୁଲ ମଲିକ୍ ଅଲ୍ ହୁତିଙ୍କୁ ନ୍ୟୁୟର୍କରେ ସେପ୍ଟେମ୍ବରରେ ହେବାକୁ ଥିବା ଗ୍ଲୋବାଲ ପିସ୍ ସମ୍ମିଳନୀରେ ସାମିଲ ହେବାର ନିମନ୍ତ୍ରଣ କରିଥିଲା। ସେ କହିଛନ୍ତି,ଘୃଣାଠାରୁ ପ୍ରେମ ଅଧିକ ଶକ୍ତିଶାଳୀ। ବହୁ ବର୍ଷର ଗୃହ ଯୁଦ୍ଧରୁ ପ୍ରଭାବିତ ୟେମେନ୍ରେ ଶାନ୍ତି ସ୍ଥାପିତ କରିବାର ପାଇଁ ଅବଦୁଲ ମଲିକ୍ ଅଲ୍ ହୁତିକୁ ଚେଷ୍ଟା କରିବା ଦରକାର। ଉଲ୍ଲେଖନୀୟ ଯେ, ଭାରତ ଓ ଆମେରିକା ସହିତ ବହୁ ଦେଶ ୟେମେନ୍ର ହୁତି ପ୍ରଶାସନକୁ ମାନ୍ୟତା ଦେଇନଥାନ୍ତି। ଏହି କାରଣରୁ ନିମିଷା ପ୍ରିୟାଙ୍କ ମାମଲାରେ ମଧ୍ୟସ୍ଥି ସହଜ ହେବନି।
