ନୂଆଦିଲ୍ଲୀ: ସଂସଦର ମୌସୁମୀ ଅଧିବେଶନରେ ଅପରେସନ ସିନ୍ଦୂର ଏବଂ ପହଲଗାମ ଆକ୍ରମଣ ଉପରେ ଆଲୋଚନା ଚାଲିଛି। ପହଲଗାମ ଆକ୍ରମଣର ଆତଙ୍କବାଦୀଙ୍କୁ ଧରିବାରେ ବିଫଳତା ଏବଂ ଅପରେସନ ସିନ୍ଦୂର ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଭାରତ-ପାକିସ୍ତାନ ଯୁଦ୍ଧବିରତି ଘୋଷଣାକୁ ନେଇ ବିରୋଧୀ ଦଳ ମୋଦୀ ସରକାରଙ୍କୁ ଟାର୍ଗେଟ କରିଛନ୍ତି। ଏସବୁ ମଧ୍ୟରେ, ହାଇଦ୍ରାବାଦ ସାଂସଦ ଏବଂ ଅଲ୍ ଇଣ୍ଡିଆ ମଜଲିସ୍-ଏ-ଇତ୍ତେହାଦୁଲ୍ ମୁସଲିମିନ୍ (AIMIM) ମୁଖ୍ୟ ଅସଦୁଦ୍ଦିନ୍ ଓୱେସି ଲୋକସଭାରେ ପର୍ଯ୍ୟଟନ ମନ୍ତ୍ରଣାଳୟକୁ ପଚାରିଥିଲେ ଯେ, ପହଲଗାମ୍ ଆକ୍ରମଣ ପରେ ଜମ୍ମୁକାଶ୍ମୀରରେ ପର୍ଯ୍ୟଟନ କେତେ କ୍ଷତିଗ୍ରସ୍ତ ହୋଇଛି ଏବଂ ପର୍ଯ୍ୟଟକଙ୍କ ସଂଖ୍ୟା କେତେ ହ୍ରାସ ପାଇଛି ? 

ସେ ବିଷୟରେ ସରକାରଙ୍କ ପାଖରେ କୌଣସି ତଥ୍ୟ ଅଛି କି ? ଏହାର ଜବାବରେ, ସରକାର କହିଛନ୍ତି ଯେ, ଗତ ବର୍ଷ ପ୍ରାୟ ୨ କୋଟି ୩୫ ଲକ୍ଷ ଘରୋଇ ପର୍ଯ୍ୟଟକ ଜମ୍ମୁକାଶ୍ମୀର ଗସ୍ତ କରିଥିଲେ । ଏହି ସମୟରେ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ପ୍ରାୟ ୬୫ ହଜାର ଥିଲା। କିନ୍ତୁ ଏହି ବର୍ଷର ପ୍ରଥମ ୬ ମାସରେ କେବଳ ୯୬ ଲକ୍ଷ ଘରୋଇ ପର୍ଯ୍ୟଟକ ଏବଂ ପ୍ରାୟ ୨୦ ହଜାର ବିଦେଶୀ ପର୍ଯ୍ୟଟକ ଜମ୍ମୁକାଶ୍ମୀର ଗସ୍ତ କରିଛନ୍ତି । ଏହି ବର୍ଷର ଅଧା ବିତିଯାଇଛି କିନ୍ତୁ ପର୍ଯ୍ୟଟକଙ୍କ ସଂଖ୍ୟା ଗତ ବର୍ଷ ତୁଳନାରେ ଅଧାରୁ ବହୁତ କମ୍ ରହିଛି । 

ପ୍ରଥମ ୬ ମାସରେ କେବଳ ଏକ ତୃତୀୟାଂଶ ବିଦେଶୀ ପର୍ଯ୍ୟଟକ ଜମ୍ମୁକାଶ୍ମୀର ଆସିଛନ୍ତି । ଘରୋଇ ପର୍ଯ୍ୟଟକଙ୍କ ସଂଖ୍ୟା ଅଧାରୁ କମ୍ ହୋଇଛି । କିନ୍ତୁ ଗତ କିଛି ବର୍ଷର ତଥ୍ୟ ଉପରେ ନଜର ପକାଇଲେ, ଜାଣିବାକୁ ମିଳିଛି ଯେ, ଜମ୍ମୁ କାଶ୍ମୀରକୁ ଆସୁଥିବା ଘରୋଇ ପର୍ଯ୍ୟଟକଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇଛି । ୨୦୨୧ ରେ ଏହି ସଂଖ୍ୟା ମାତ୍ର ୧ କୋଟି ୧୩ ଲକ୍ଷ ଥିଲା । ୨୦୨୪ ସୁଦ୍ଧା ଏହା ଦ୍ୱିଗୁଣିତ ହୋଇଥିଲା । ସେହିଭଳି ପହଲଗାମ ଆକ୍ରମଣ ଯୋଗୁଁ ହୋଇଥିବା ଆର୍ଥିକ କ୍ଷତିର ଆକଳନ ସରକାର କରିଛନ୍ତି କି ବୋଲି ପ୍ରଶ୍ନରେ କେନ୍ଦ୍ର ସରକାର ସ୍ପଷ୍ଟ ଭାବରେ କହିଛନ୍ତି ଯେ, ଏ ସମ୍ପର୍କରେ କୌଣସି ଠୋସ୍ ତଥ୍ୟ ନାହିଁ । ପର୍ଯ୍ୟଟନର ଉନ୍ନତି ପାଇଁ ସରକାର କଣ ନିଷ୍ପତ୍ତି ନେଇଛନ୍ତି ପ୍ରଶ୍ନରେ, ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ଅନେକ ପ୍ରୟାସ କରାଯାଇଛି ବୋଲି ଜବାବ ମିଳିଛି ।

ପର୍ଯ୍ୟଟନ ମନ୍ତ୍ରଣାଳୟ ଏହାର ଅଭିଯାନ ଏବଂ କାର୍ଯ୍ୟକ୍ରମ ମାଧ୍ୟମରେ ପର୍ଯ୍ୟଟନକୁ ପ୍ରୋତ୍ସାହିତ କରିଛି। ଏଥିପାଇଁ, ଦେଖୋ ଆପନା ଦେଶ ଅଭିଯାନ, ଚଲୋ ଇଣ୍ଡିଆ ଅଭିଯାନ ଏବଂ ଅନ୍ତର୍ଜାତୀୟ ପର୍ଯ୍ୟଟନ ମାର୍ଟ, ଭାରତ ପର୍ବ ଭଳି କାର୍ଯ୍ୟକ୍ରମ ଆରମ୍ଭ କରାଯାଇଛି ବୋଲି ସରକାରଙ୍କ ପକ୍ଷରୁ ସଂସଦରେ କୁହାଯାଇଛି ।