ବାସୁଦେବପୁର,୧୧/୧୦: ରତାଙ୍ଗ ଗ୍ରାମରେ ଆତ୍ମହତ୍ୟା କଲେ ନବ ବିବାହିତା । ମୃତ ମହିଳା କରଞ୍ଜିଆ ଥାନା ରସମତଲା ଗ୍ରାମର ଲିପୁ ନାୟକଙ୍କ ସ୍ତ୍ରୀ ଶକୁନ୍ତଳା ପାତ୍ର ବୋଲି ଜଣାପଡିଛି । ମହିଳାଙ୍କ ଆତ୍ମହତ୍ୟାର କାରଣ ଅସ୍ପଷ୍ଟ ରହିଥିବା ବେଳେ ଭଦ୍ରକ ଜିଲ୍ଲା ବାସୁଦେବପୁର ଥାନା ରତାଙ୍ଗ ଗ୍ରାମରେ ଏଭଳି ଅଘଟଣ ଘଟିଛି ।
ସୂଚନା ମୁତାବକ, ଏକ ବର୍ଷ ପୂର୍ବରୁ ଲିପୁ ଓ ଶକୁନ୍ତଳା ପ୍ରେମ ବିବାହ କରିଥିଲେ । ନିଜର ପରିବାକୁ ଭୟକରି ଉଭୟ ବାସୁଦେବପୁର ରତାଙ୍ଗ ଅଞ୍ଚଳକୁ ଚାଲିଆସି ଏକ ଘର ଭଡ଼ା ନେଇ ରହୁଥିଲେ । ତେବେ ଗୁରୁବାର ରାତିରେ ଉଭୟ ଖାଇପିଇ ଶୋଇଥିଲେ । ତେବେ କୌଣସି କାରଣରୁ ଶକୁନ୍ତଳା ବେକରେ ଆପ୍ରୋନ ଲଗାଇ ଆତ୍ମହତ୍ୟା କରିଥିଲେ । ଶୁକ୍ରବାର ସକାଳୁ ଲିପୁ ଉଠି ଶକୁନ୍ତଳା ଆତ୍ମହତ୍ୟା କରିଥିବାର ଦେଖିବାକୁ ପାଇଥିଲେ । ଏହା ଦେଖି ତୁରନ୍ତ ଲିପୁ ଘର ମାଲିକକୁ ଡାକି ଶକୁନ୍ତଳାକୁ ସଂଜ୍ଞାହୀନ ଅବସ୍ଥାରେ ବାସୁଦେବପୁର ଡାକ୍ତରଖାନା ନେଇଆସିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରେ ଏହି ଘଟଣା ସମ୍ୱନ୍ଧରେ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ବାସୁଦେବପୁର ପୋଲିସ ପହଞ୍ଚି ମହିଳାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ମହିଳାଙ୍କ ଆତ୍ମହତ୍ୟା ପଛର କାରଣ ଖୋଜି ଘଟଣାର ତଦନ୍ତ ଚଳାଇଛି ବାସୁଦେବପୁର ପୋଲିସ ।
