ବାରିପଦା,୨୬/୩ : ଶିମିଳିପାଳ ଜୈବମଣ୍ଡଳରୁ ନୂତନ ଅଦା ଜାତୀୟ ଉଦ୍ଭିଦର ଆବିଷ୍କାର ହୋଇଛି । ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱ ବିଦ୍ୟାଳୟ ବାରିପଦାର ଉଦ୍ଭିଦ ବିଜ୍ଞାନ ବିଭାଗର ସହକାରୀ ପ୍ରାଧ୍ୟାପକ ଡଃ ସୁଦାମ ଚରଣ ସାହୁ ଏବଂ ତାଙ୍କ ତତ୍ତ୍ୱାବଧାନରେ ଗବେଷଣାରତ ଛାତ୍ରୀ ସିଫନ ପ୍ରିୟଦର୍ଶିନୀଙ୍କ ଗବେଷଣାରୁ ଶିମିଳିପାଳ ସଂରକ୍ଷିତ ଜୈବ ମଣ୍ଡଳରୁ ଏହି ଅଦା ଜାତୀୟ ଉଦ୍ଭିଦ ଆବିଷ୍କୃତ ହୋଇଥିବା ନେଇ ସୂଚନା ମିଳିଛି ।
ପ୍ରାକ୍ ଗବେଷଣା ଲବ୍ଧ ତଥ୍ୟ ଅନୁଯାୟୀ ଓଡ଼ିଶାରେ ମୋଟ୍ ୮ ପ୍ରଜାତି ଏବଂ ୨୯ ଜାତିର ଅଦା ଜାତୀୟ ଉଦ୍ଭିଦ ଦେଖାଯାଏ । ଓଡ଼ିଶାରେ ଅଦା ଜାତୀୟ ଉଦ୍ଭିଦ ଉପରେ ପର୍ଯ୍ୟବେଶିତ ୩ ବର୍ଷର ଗବେଷଣା କାଳ ମଧ୍ୟରେ ଶିମିଳିପାଳ ଅନ୍ତର୍ଗତ କୁଳିପାଳ ଅଞ୍ଚଳରୁ ଏହି ନୂତନ ଉଦ୍ଭିଦଟି ଆବିଷ୍କାର କରାଯାଇଛି । ବିଶ୍ୱ ପ୍ରସିଦ୍ଧ ରଥଯାତ୍ରା ଦିନ ଏହି ଉଦ୍ଭିଦଟି ଗବେଷକ ମାନଙ୍କର ଅନୁସନ୍ଧାନ ତଥା ପର୍ଯ୍ୟବେକ୍ଷଣରୁ ପ୍ରାପ୍ତ ହୋଇଥିବାରୁ ମହାପ୍ରଭୁ ଶ୍ରୀ ଜଗନ୍ନାଥଙ୍କୁ ଉତ୍ସର୍ଗ କରି ତାଙ୍କ ନାମ ଅନୁଯାୟୀ ଜିଞ୍ଜିବର ଜଗନ୍ନାଥ ନାମକରଣ କରାଯାଇଛି ।
ଏହି ଉଦ୍ଭିଦଟି ଶିମିଳିପାଳର ଏକମାତ୍ର ଅଞ୍ଚଳରୁ ଠାବ କରାଯାଇଥିବାରୁ ଏହାର ସଂରକ୍ଷଣ ଏବଂ ସଂଖ୍ୟା ବୃଦ୍ଧିର ଆବଶ୍ୟକତା ରହିଛି ବୋଲି ଅନ୍ତର୍ଜାତୀୟ ଗବେଷଣା ମୂଳକ ପତ୍ରିକା ଫାଇଟୋଟାକ୍ସାରେ ପ୍ରକାଶ ପାଇଛି । ଶିମିଳିପାଳ ଏକ ଜୈବ ବିବିଧତାର କେନ୍ଦ୍ରସ୍ଥଳି ହୋଇଥିବାରୁ କନ୍ଦା/ଅଦା ଜାତୀୟ ଉଦ୍ଭିଦର ବ୍ୟବହାର ଏବଂ ଔଷଧୀୟ ଗୁଣବତ୍ତା ଉପରେ ଗବେଷଣା ନିହାତି ଜରୁରି ବୋଲି ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱ ବିଦ୍ୟାଳୟର ଉଦ୍ଭିଦ ବିଜ୍ଞାନ ଗବେଷକ ଡଃ ସାହୁ ମତପ୍ରକାଶ କରିଛନ୍ତି ।
