ବ୍ରହ୍ମପୁର,୨୮/୧୧: ପୂର୍ବ ଶତ୍ରୁତାକୁ ନେଇ ମରଣାନ୍ତକ ଆକ୍ରମଣ । ସମ୍ପର୍କୀୟ ଦାଦାଙ୍କ ଆକ୍ରମଣରେ ଚାଲିଗଲା ପୁତୁରାର ଜୀବନ । ଘଟଣା ପରେ ଦୁଇ ଆକ୍ରମଣକାରୀ ଘଟଣା ସ୍ଥଳରୁ ଫେରାର ହୋଇଛନ୍ତି । ଗଞ୍ଜାମ ଜିଲ୍ଲା ସଦର ଥାନା ଅନ୍ତର୍ଗତ ରୋହିଗାଁ ବଡ଼ ସାହିରେ ଏଭଳି ହତ୍ୟାକାଣ୍ଡ ହୋଇଛି । 

ସୂଚନା ମୁତାବକ, ଯୁବକ ଜଣକ ଘରେ ଏକା ଥିଲେ । ଏହି ସମୟରେ ଯୁବକଙ୍କ ସମ୍ପର୍କୀୟ ଦାଦା ଏବଂ ତାଙ୍କ ପୁଅ ଘରକୁ ଆସିଥିଲେ । ଘରକୁ ଆସି ଉଭୟ ଯୁବକଙ୍କୁ ଅତର୍କିତ ଆକ୍ରମଣ କରିଥିଲେ । ଫଳରେ ଯୁବକ ଜଣକ ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ । ଏହା ଦେଖି ତାଙ୍କ ପଡ଼ୋଶୀ ଘର ଲୋକେ ଦୌଡ଼ି ଆସିଥିଲେ । ଯୁବକ ଜଣକ ମୃତ ଅବସ୍ଥାରେ ତଳେ ପଡ଼ି ରହି ଥିବାର ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ସଦର ଥାନା ପୋଲିସ ପହଞ୍ଚି ଯୁବକଙ୍କ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ । ତେବେ ପୂର୍ବ ଶତ୍ରୁତାକୁ ନେଇ ଏହି ହତ୍ୟାକାଣ୍ଡ ହୋଇଥିବା ନେଇ ପୋଲିସ ପକ୍ଷରୁ ସୂଚନା ମିଳିଛି ।