ଚଣ୍ଡିଗଡ଼,୧୭/୧୦: ହରିଆଣାରେ ନାୟବ ସିଂହ ସୈନି ହିଁ ମୁଖ୍ୟମନ୍ତ୍ରୀ ହେବେ । ବୁଧବାର ପଞ୍ଚକୁଲାରେ ଅନୁଷ୍ଠିତ ବିଜେପି ବିଧାୟକ ଦଳର ବୈଠକରେ ସେ ସର୍ବସମ୍ମତିକ୍ରମେ ନେତା ନିର୍ବାଚିତ ହୋଇଛନ୍ତି । ବୈଠକରେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ, ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ମୋହନ ଯାଦବ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ଉପସ୍ଥିତ ଥିଲେ । ବିଧାୟକ କୃଷ୍ଣ କୁମାର ବେଦୀ ସୈନିଙ୍କ ନାମ ପ୍ରସ୍ତାବ ରଖିଥିଲେ । ଅନିଲ ଭିଜ୍ ଓ ଆରତି ରାଓ ସମର୍ଥନ କରିଥିଲେ । ଏହାପରେ ସୈନି ରାଜଭବନ ଯାଇ ରାଜ୍ୟପାଳ ବନ୍ଦାରୁ ଦତ୍ତାତ୍ରେୟଙ୍କ ନିକଟରେ ସରକାର ଗଠନ ଲାଗି ଦାବି ଉପସ୍ଥାପନ କରିଥିଲେ ।
ଗୁରୁବାର ପୂର୍ବାହ୍ନ ୧୧ଟାରେ ପଞ୍ଚକୁଲାର ଦଶହରା ପଡ଼ିଆରେ ସୈନି ସରକାରଙ୍କ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ । ସେଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ସମେତ ଏନ୍ଡିଏ ଶାସିତ ରାଜ୍ୟମାନଙ୍କର ମୁଖ୍ୟମନ୍ତ୍ରୀ ଓ ଅନ୍ୟ ବହୁ ବରିଷ୍ଠ ନେତା ଉପସ୍ଥିତ ରହିବେ । ସଦ୍ୟ ଅନୁଷ୍ଠିତ ବିଧାନସଭା ନିର୍ବାଚନରେ ହରିଆଣାର ୯୦ ବିଧାନସଭା ଆସନ ମଧ୍ୟରୁ ବିଜେପି ୪୮ଟିରେ ଜିତିଥିଲା ।
ଗୁରୁବାର ହରିଆଣାର ମୁଖ୍ୟମନ୍ତ୍ରୀ ଭାବେ ସୈନି ଶପଥ ନେବା ପରେ ଚଣ୍ଡିଗଡ଼ରେ ଏନ୍ଡିଏ ଶାସିତ ରାଜ୍ୟଗୁଡ଼ିକର ମୁଖ୍ୟମନ୍ତ୍ରୀ ଓ ଉପ ମୁଖ୍ୟମନ୍ତ୍ରୀଙ୍କ ସମ୍ମିଳନୀ ଅନୁଷ୍ଠିତ ହେବ । ଏଥିରେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗଦେବେ । ସମ୍ମିଳନୀରେ ବିଜେପିରୁ ମୋଟ ୧୩ ରାଜ୍ୟର ମୁଖ୍ୟମନ୍ତ୍ରୀ ଓ ୧୬ ଉପ ମୁଖ୍ୟମନ୍ତ୍ରୀ ସାମିଲ ହେବାକୁ ଥିବା ବେଳେ ମହାରାଷ୍ଟ୍ର, ଆନ୍ଧ୍ର ପ୍ରଦେଶ, ବିହାର, ସିକ୍କିମ, ନାଗାଲାଣ୍ଡ ଏବଂ ମେଘାଳୟ ଭଳି ଏନ୍ଡିଏ ନେତୃତ୍ୱାଧୀନ ସରକାରର ମୁଖ୍ୟମନ୍ତ୍ରୀମାନେ ବି ଯୋଗଦେବେ । ରାଷ୍ଟ୍ରୀୟ ବିକାଶ ଭଳି ଗୁରୁତ୍ୱପୂର୍ଣ୍ଣ ଏଜେଣ୍ଡାକୁ ନେଇ ସମ୍ମିଳନୀରେ ଆଲୋଚନା ହେବ । ସେହିଭଳି ସମ୍ବିଧାନର ଅମୃତ ମହୋତ୍ସବ ଏବଂ ଗଣତନ୍ତ୍ରର ହତ୍ୟା ଉଦ୍ୟମର ୫୦ ବର୍ଷ ପୂର୍ତ୍ତି ଉତ୍ସବ ଆୟୋଜନ ସଂକ୍ରାନ୍ତରେ ବି ଚର୍ଚ୍ଚା ହେବ ।