ଭାପୁର,୨୮।୯(ଆପ୍ର): ଶଙ୍ଖ ଭବନରେ ବିଜେଡି ଦଳର ସୁପ୍ରିମୋ ନବୀନ ପଟ୍ଟନାୟକଙ୍କ ସଭାପତିତ୍ବରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ଦଳର ସୁପ୍ରିମୋ ନବୀନ ପଟ୍ଟନାୟକ ଦଳୀୟ କର୍ମକର୍ତ୍ତାଙ୍କୁ ଗୁରୁମନ୍ତ୍ର ଦେଇଥିଲେ। ଦଳକୁ କେମିତି ଆହୁରି ସକ୍ରିୟ କରାଯିବ, ତୃଣମୂଳ ସ୍ତରରେ ଜନସାଧାରଣ ମାନଙ୍କ ସହିତ କିପରି ଯୋଡ଼ି ହୋଇ ରହିବେ ସେ ସମ୍ପର୍କରେ କର୍ମକର୍ତ୍ତାଙ୍କୁ କହିଥିଲେ। ବିରୋଧୀ ଦଳରେ ଥିବା ସତ୍ତ୍ବେ ଲୋକଙ୍କ ସହିତ କାମ କରିବାର ଆଦି ରଣନୀତି ପ୍ରସ୍ତୁତ କରିବା, ବିଜେପି ମିଛ ପ୍ରତିଶ୍ରୁତି ଦେଇ ସରକାର ଗଠନ ପରେ ପ୍ରତିଶ୍ରୁତି ପାଳନ କରୁ ନଥିବାରୁ ଏହାକୁ ଜନସାଧାରଣଙ୍କୁ ସଚେତନ କରିବା ଆଦି ନେଇ ଅକ୍ଟୋବର ୨ରୁ ଖଣ୍ଡପଡ଼ା ନିର୍ବାଚନ ମଣ୍ଡଳୀରୁ ଜୋନ ସ୍ତରୀୟ ପଦଯାତ୍ରା କରି ଲୋକଙ୍କ ପାଖରେ ପହଞ୍ଚାଇବା ସହିତ ସଦସ୍ୟ ସ°ଗ୍ରହ ଅଭିଯାନ ଉପରେ ଗୁରୁମନ୍ତ୍ର ଦେଇଥିଲେ ନବୀନ।
ବରିଷ୍ଠ ନେତା ଦେବୀ ପ୍ରସାଦ ମିଶ୍ରଙ୍କ ତତ୍ତ୍ୱାବଧାନରେ ଆୟୋଜିତ ଏହି ସମୀକ୍ଷା ବୈଠକରେ ନୟାଗଡ଼ ବିଧାୟକ ଡଃ ଅରୁଣ କୁମାର ସାହୁ , ନୟାଗଡ଼ ବିଜେଡି ସଭାପତି ତଥା ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା, ରଣପୁର ପୂର୍ବତନ ବିଧାୟକ ସତ୍ୟ ନାରାୟଣ ପ୍ରଧାନ, ଜିଲ୍ଲା ପରିଷଦ ଅଧ୍ୟକ୍ଷ ଇଂ ଦେବାଶିଷ ପଟ୍ଟନାୟକ, ବିଜେଡି ନେତ୍ରୀ ଇରାନୀ ରାୟ , ଖଣ୍ଡପଡ଼ା ନିର୍ବାଚନ ମଣ୍ଡଳୀର ଖଣ୍ଡପଡ଼ା ବ୍କକ ଉପାଧ୍ୟକ୍ଷ ଶିଶିର କୁମାର ସାହୁ ଓ ଭାପୁର ବ୍ଲକ ଉପାଧ୍ୟକ୍ଷ ବେଣୁଧର ପ୍ରଧାନ, ଭାପୁର ବ୍ଲକ ବିଜେଡି ସଭାପତି ଶିବ ପ୍ରସାଦ ଷଡ଼ଙ୍ଗୀ, ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର କୁମାର ଧଳ, ବିଜେଡି ବ୍କକ ଉପଦେଷ୍ଟା ସନ୍ତୋଷ କୁମାର ତ୍ରିପାଠୀ , ଭାପୁର ପଞ୍ଚାୟତ ସମିତିର ସମସ୍ତ ଜନପ୍ରତିନିଧି, ପଞ୍ଚାୟତ ସଭାପତି ସମେତ ସାଙ୍ଗଠନିକ କର୍ମକର୍ତ୍ତା ଯୋଗଦେଇଥିଲେ। ଶ୍ରୀ ପ୍ରଧାନ ତାଙ୍କ ଅଭିଭାଷଣରେ କହିଥିଲେ ଯେ ଖଣ୍ଡପଡ଼ା ନିର୍ବାଚନ ମଣ୍ଡଳୀ ହେଉଛି ବିଜେଡି ଗଡ । ଗତ ସାଧାରଣ ନିର୍ବାଚନରେ ଆମେ ଖଣ୍ଡପଡ଼ାରେ ପରାଜିତ ହୋଇଥିଲୁ ଦଳରେ ଥିବା କିଛି ଦଳ ବିରୋଧୀ କୁଚକ୍ରୀ ମାନଙ୍କ ପାଇଁ। ଆମେ ସବୁବେଳେ ନବୀନ ବାବୁଙ୍କ ସହ ଅଛୁ ରହିବୁ। ଲୋକମାନଙ୍କ ପାଇଁ କାମ କରିବୁ। ଗତ ନିର୍ବାଚନରେ ବିଜୁଜନତା ଦଳର ବିଜୟ ଓ ପରାଜୟ ଉପରେ ନବୀନ ପଟ୍ଟନାୟକ ସମୀକ୍ଷା କରିବା ସହ କିଭଳି ଆଗକୁ ସାଙ୍ଗଠନିକ କାର୍ଯ୍ୟରେ ବୃଦ୍ଧି ଘଟିବ ତାହା ଉପରେ ଆଲୋଚନା ହୋଇଥିବା ସୂଚନା ମିଳିଛି।
