କଟକ,୨୬/୦୧: ରାଜ୍ୟର ୧୦ଟି ଜନବସତି ବିହୀନ ଦ୍ୱୀପରେ ଉଡ଼ିଛି ଜାତୀୟ ପତାକା । ସ୍ୱାଧୀନତା ପରେ ଭାରତ ଇତିହାସରେ ଏହା ପ୍ରଥମ ଘଟଣା । ଗତ ନଭେମ୍ବର ମାସରେ ଆୟୋଜିତ ସର୍ବଭାରତୀୟ ଆରକ୍ଷୀ ମହାନିର୍ଦ୍ଦେଶକ (ଡିଜି-ଆଇଜି) ସମ୍ମିଳନୀରେ ଯୋଗଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏଭଳି କରିବା ପାଇଁ ନିର୍ଦ୍ଦେଶ ଦେଇଥିଲେ । ଏହି କ୍ରମରେ ସାଧାରଣତନ୍ତ୍ର ଦିବସର ଅବ୍ୟବହିତ ପୂର୍ବରୁ ଓଡ଼ିଶାର ୧୦ଟି ଉପକୂଳ ଦ୍ୱୀପକୁ ଚିହ୍ନଟ କରାଯାଇ ସେଠାରେ ଜାତୀୟ ପତାକା ଉତ୍ତୋଳନ କରାଯାଇଛି ।
ଜନବସତି ବିହୀନ ଦ୍ୱୀପପୁଞ୍ଜ ଗୁଡିକରେ ଭାରତର ଗର୍ବ ଏବଂ ସାର୍ବଭୌମତ୍ୱ ପ୍ରଦର୍ଶନ କରିବା ହେଉଛି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଜୀଙ୍କ ଦ୍ୱାରା ପରିକଳ୍ପିତ ଚିନ୍ତାଧାରାର ଉଦ୍ଦେଶ୍ୟ । ସାଧାରଣତନ୍ତ୍ର ଦିବସ କିମ୍ବା ତାର ପୂର୍ବଦିନ ପତାକା ଉଡ଼ାଇବାକୁ ମୋଦିଜୀ ପରାମର୍ଶ ଦେଇଥିଲେ । ମୋଦିଜୀଙ୍କ ଏହି ପରିକଳ୍ପନାକୁ ସାକାର କରିବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତ୍ୱରିତ ପଦକ୍ଷେପ ନେଇଥିଲେ। ତେଣୁ ସେଭଳି ଦ୍ୱୀପ ଚିହ୍ନଟ କରିବାକୁ ଡିଜିପି ଯୋଗେଶ ବାହାଦୂର ଖୁରାନିଆଙ୍କୁ କିଛି ଦିନ ପୂର୍ବେ ମୁଖ୍ୟମନ୍ତ୍ରୀ ଶ୍ରୀ ମାଝୀ ନିର୍ଦ୍ଦେଶ ଦେଇଥିଲେ । ଏହି କ୍ରମରେ ଓଡ଼ିଶାର ୧୦ଟି ଉପକୂଳ ଦ୍ୱୀପକୁ ଚିହ୍ନଟ କରାଯାଇଛି । ବାଲେଶ୍ୱର ଜିଲ୍ଲାର ସୁବର୍ଣ୍ଣ ଦ୍ୱୀପ, ଭଦ୍ରକ ଜିଲ୍ଲାର ନୟା ଟାପୁ ଦ୍ୱୀପ, ଉଡ଼ାବାଲି, କନିକା, ଲଙ୍ଗ ହ୍ୱିଲର,ସର୍ଟ ଆଇଲାଣ୍ଡ, ସ୍ମଲ ହ୍ୱିଲର ଏବଂ ଜଗତସିଂହପୁର ଜିଲ୍ଲାର ବୋଇତରାକୁଦ, ଜଟାଧାର ତଣ୍ଡା ଏବଂ ବରକୁଦ ଦ୍ୱୀପରେ ଜାତୀୟ ପତାକା ଉଡ଼ାଇବାକୁ ନିଷ୍ପତ୍ତି ନିଆଯାଇଥିଲା । ନିଷ୍ପତ୍ତି ଅନୁସାରେ ଶନିବାର ସମସ୍ତ ଦ୍ୱୀପରେ ଜାତୀୟ ପତାକା ଉତ୍ତୋଳନ କରାଯାଇଛି।
ସୂଚନାଯୋଗ୍ୟ, ଓଡ଼ିଶା ପୁଲିସର ସାମୁଦ୍ରିକ ଥାନା ପକ୍ଷରୁ ଏହି ଦ୍ୱୀପଗୁଡ଼ିକୁ ସର୍ଭେ କରାଯାଇ ଜାତୀୟ ପତାକା ଉତ୍ତୋଳନ କରାଯାଇଛି ।
