ନୂଆଦିଲ୍ଲୀ,୦୪/୦୨: ଆମେରିକୀୟ ଟେକ୍ ଅରବପତି ବ୍ରାଏନ୍ ଜନସନ୍ଙ୍କୁ ଆପଣ ନିଶ୍ଚୟ ଜାଣିଥିବେ। ଇଏ ଏମିତି ଜଣେ ବ୍ୟକ୍ତି ଯିଏ ନିଜକୁ ସବୁଦିନ ପାଇଁ ଯୁବକ ରଖିବା ପାଇଁ ଏକ ଫର୍ମୁଲା ଉଦ୍ଭାବନ କରିଛନ୍ତି। ଏଥିପାଇଁ ସେ ପ୍ରତିବର୍ଷ ତାଙ୍କ ଶରୀର ପାଇଁ କୋଟି କୋଟି ଟଙ୍କା ଖର୍ଚ୍ଚ କରନ୍ତି। ବ୍ରାଏନ୍ ଜନସନ୍ ବର୍ତ୍ତମାନ ଭାରତ ଗସ୍ତରେ ଆସିଥିଲେ। ଏଠାରେ ସେ ଷ୍ଟକ୍ ବ୍ରୋକିଂ ଫାର୍ମ ଜେରୋଧାର ସହ-ପ୍ରତିଷ୍ଠାତା ନିଖିଲ କାମଥଙ୍କ ସହ ଏକ ପୋଡକାଷ୍ଟରେ ଯୋଗ ଦେଇଥିଲେ। କିନ୍ତୁ ଏହି ପୋଡକାଷ୍ଟ କେବଳ ୧୦ ମିନିଟ୍ ପାଇଁ ଚାଲିଲା। ଏହା ପରେ, ବ୍ରାଏନ୍ ମଝିରୁ ଉଠି ଚାଲିଯାଇଥିଲେ।
ପ୍ରଦୁଷଣକୁ ଦର୍ଶାଇଲେ କାରଣ:
ବ୍ରାଏନ୍ ଜନସନ୍ ନିଜେ ସୋସିଆଲ ମିଡିଆରେ ସ୍ୱୀକାର କରିଛନ୍ତି ଯେ ସେ ପୋଡକାଷ୍ଟ ମଝିରୁ ଉଠି ଚାଲିଯାଇଥିଲେ। ଏଥିପାଇଁ ସେ ପ୍ରଦୂଷଣକୁ ଦାୟୀ କରିଛନ୍ତି। ବ୍ରାଏନ୍ କହିଥିଲେ ଯେ 'ଯେତେବେଳେ ମୁଁ ଭାରତରେ ଥିଲି, ବାୟୁର ଗୁଣବତ୍ତା ଖରାପ ଥିବାରୁ ମୁଁ ଏହି ପୋଡକାଷ୍ଟ ଶୀଘ୍ର ଶେଷ କରିଦେଇଥିଲି।' କାମଥଙ୍କୁ ପ୍ରଶଂସା କରି ସେ କହିଥିଲେ, 'ନିଖିଲ କାମଥ ଜଣେ ଚମତ୍କାର ଉପସ୍ଥାପକ ଏବଂ ଆମେ ଏକାଠି ଭଲ ସମୟ ବିତାଇଛୁ।' ସମସ୍ୟାଟି ଥିଲା ଯେ ଯେଉଁ କୋଠରୀରେ ସୁଟିଂ ହେଉଥିଲା, ସେହି କୋଠରୀକୁ ବାହାର ପବନ ଆସୁଥିଲା ଏବଂ ଏହି କାରଣରୁ ମୁଁ ଆଣିଥିବା ଏୟାର ପ୍ୟୁରିଫାୟର ଠିକ୍ ଭାବରେ କାମ କରୁନଥିଲା।
ସରକାରଙ୍କ ଉପରେ ଉଠାଇଲେ ପ୍ରଶ୍ନ:
ବ୍ରାଏନ୍ ଜନସନ୍ କହିଛନ୍ତି ଯେ ଭାରତରେ ବାୟୁ ପ୍ରଦୂଷଣ ଏତେ ସାଧାରଣ ହୋଇଯାଇଛି ଯେ କେହି ଏହାର ବିପଦ ବିଷୟରେ ଚିନ୍ତା ମଧ୍ୟ କରନ୍ତି ନାହିଁ। କେହି ମାସ୍କ ପିନ୍ଧନ୍ତି ନାହିଁ। ଯଦି ଭାରତ କର୍କଟ ରୋଗ ସହିତ ଲଢ଼ିବା ପରିବର୍ତ୍ତେ ବାୟୁ ଗୁଣବତ୍ତା ଉନ୍ନତ କରିବ, ତେବେ ଲୋକଙ୍କ ସ୍ୱାସ୍ଥ୍ୟରେ ଉନ୍ନତି ଆସିବ। ମୁଁ ବୁଝିପାରୁନାହିଁ ଯେ ଭାରତର ନେତାମାନେ ବାୟୁ ଗୁଣବତ୍ତାକୁ କାହିଁକି ଜାତୀୟ ଜରୁରୀକାଳୀନ ଘୋଷଣା କରୁନାହାଁନ୍ତି। କିନ୍ତୁ ଏହା ବିଶ୍ବପାଇଁ ଢ଼େର ଖରାପ।'
