ନରସିଂହପୁର, ୯/୬ : ରାସ୍ତାରୁ ପାଇଥିଲେ ଟଙ୍କା ଭର୍ତ୍ତି ବ୍ୟାଗ୍ ଓ ମୋବାଇଲ୍। ହେଲେ ଏହାକୁ ନିଜ ପାଖରେ ନରଖି ହଜାଇଥିବା ଲୋକଙ୍କୁ ଫେରାଇ ଦେଲେ। ଏପରି କାମ କରି ମାନବିକତାର ପରିଚୟ ଦେଇଛନ୍ତି କଟକ ଜିଲ୍ଲା ନରସିଂହପୁର ଅଞ୍ଚଳର ପ୍ରଶାନ୍ତ ମହାପାତ୍ର। ତାଙ୍କର ଏପରି ମହତ କାମ ପାଇଁ ତାଙ୍କୁ ସମସ୍ତେ ପ୍ରଶଂସା କରିଛନ୍ତି।
ସୂଚନାନୁଯାୟୀ, କଟକ ନରସିଂହପୁର ମୁଖ୍ୟ ରାସ୍ତାର ନରସିଂହପୁର ପଞ୍ଚମୁଖୀ ଛକ ନିକଟରୁ ପ୍ରଶାନ୍ତ ମହାପାତ୍ର ଗୋଟିଏ ବ୍ୟାଗ୍ ପାଇ ପ୍ରମେୟ ସାମ୍ବାଦିକ ଅଜୟ ପଣ୍ଡାଙ୍କୁ ଦେଇଥିଲେ। ସେଥିରେ ଗୋଟିଏ ମୋବାଇଲ ଫୋନ୍, ୧୭ଟି ପାଞ୍ଚ ଶହ ଟଙ୍କିଆ ଓ ୩୯ଟି ଦୁଇ ଶହ ଟଙ୍କିଆ ନୋଟ୍ ଥିଲା। ମୋଟ ୧୬ ହଜାର ୩୦୦ ଟଙ୍କା ସହିତ, ରୁପାର ଏକ ହନୁମାନ ମୂର୍ତ୍ତି ଥିଲା। ଏହାକୁ ଅଜୟ ପଣ୍ଡା ଫେସବୁକ୍ରେ ପୋଷ୍ଟ କରିବା ପରେ ମୋବାଇଲ୍ ଫୋନ୍ ଓ ଟଙ୍କା ରୋଜାଲିନ ମିଶ୍ରଙ୍କର ବୋଲି ଜଣାପଡ଼ିଥିଲା। ଏହାପରେ ରୋଜାଲିନଙ୍କୁ ତାଙ୍କର ଟଙ୍କା ଓ ବ୍ୟାଗ୍ ଫେରାଇ ଦିଆଯାଇଛି। ନିଃସ୍ଵାର୍ଥପର ଭାବେ ସଚ୍ଚୋଟତା ଦେଖାଇ ସବୁ ଫେରାଇ ଦେଇଥିବାରୁ ରୋଜାଲିନ୍ ପ୍ରଶାନ୍ତଙ୍କୁ ଧନ୍ୟବାଦ ଜଣାଇଛନ୍ତି।
ପୂର୍ବରୁ ପ୍ରଶାନ୍ତ ମଧ୍ୟ ମାଣିଆବନ୍ଧରୁ ରୁପା ପାଉଁଜି ଓ ସ୍କୁଲ ବ୍ୟାଗ୍ ପାଇ ପ୍ରମେୟ ସାମ୍ବାଦିକ ଅଜୟ ପଣ୍ଡାଙ୍କୁ ଜଣାଇଥିଲେ। ଏହାକୁ ମଧ୍ୟ ଫେସବୁକରେ ପୋଷ୍ଟ କରିବା ପରେ ସମ୍ପୃକ୍ତ ବ୍ୟକ୍ତି ତାଙ୍କର ହଜିଥିବା ରୁପା ପାଉଁଜି ଓ ସ୍କୁଲ ବ୍ୟାଗ୍ ଫେରି ପାଇଥିଲେ। ତେବେ ପ୍ରଶାନ୍ତଙ୍କ ସଚୋଟ୍ଟତା ପାଇଁ ତାଙ୍କୁ ବିଭିନ୍ନ ମହଲରେ ପ୍ରଶଂସା କରାଯାଉଛି।
