ନଵରଙ୍ଗପୁର, ୧୬/୭ (ଆପ୍ର): ନବରଙ୍ଗପୁର ଜିଲ୍ଲା ଓ ଦୌରା ଜଜ୍ ସୁବ୍ରତ ମହାନ୍ତି ଏକ ହତ୍ୟା ମାମଲାର ବିଚାର କରି ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଆସାମୀ ଜଣକ ହେଉଛନ୍ତି, ପାପଡାହାଣ୍ଡି ଥାନା ପ୍ରଧାନୀଗୁଡା ଗାଁର ଜଗା ଗୌଡ଼ । ୨୦ ଜଣ ସାକ୍ଷ୍ୟ ଓ ୨୫ଟି ଦସ୍ତାବିଜକୁ ଆଧାର କରି ଜଗାଙ୍କୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ସେଇଭଳି ୧୦ ହଜାର ଟଙ୍କା ଜୋରିମାନା ଆଦାୟ କରିବାକୁ ନିର୍ଦ୍ଦେଶ ଦେଇଛନ୍ତି। ଅନାଦେୟ ହେଲେ ଆହୁରୀ ୧ ବର୍ଷ ସଶ୍ରମ କାରାଦଣ୍ଡ ଭୋଗିବାକୁ ପଡ଼ିବ ବୋଲି ଶୁଣାଣୀ କରିଛନ୍ତି। ଏହାସହ ମୃତକ ପରିବାରକୁ ଆବଶ୍ୟକତା ଅନୁଯାୟୀ ଅନୁକମ୍ପା ମୂଳକ ସହାୟତା ରାଶି ପ୍ରଦାନ କରିବାକୁ ଜିଲ୍ଲା ଆଇନ ସେବା ପ୍ରାଧିକରଣଙ୍କୁ ସୁପାରିଶ କରିଛନ୍ତି।
ଏହି ମାମଲାକୁ ପରିଚାଳନା କରୁଥିବା ସରକାରୀ ଓକିଲ ମନୋଜ କୁମାର ଏକ୍କାଙ୍କ ସୂଚନା ଅନୁଯାୟୀ, ଗତ ୨୦୨୩ ନଭେମ୍ବର ୩୦ ତାରିଖରେ ପୂର୍ବ ଶତ୍ରୁତାକୁ କେନ୍ଦ୍ରକରି ପ୍ରଧାନୀ ଗୁଡା ପେଟ୍ରୋଲ ପମ୍ପ ନିକଟ ବାଲିଗୁଡା ରାସ୍ତାର ଦେଇ ଏକ ବାଇକରେ ଲକ୍ଷ୍ମଣ ଗୈ।ଡ଼ ଚାଷ ଜମିକୁ ଯାଉଥିବା ବେଳେ ଗାଁର ଜଗା ଗୈଡ ଏକ ଟାଙ୍ଗିଆରେ ଲକ୍ଷ୍ମଣଙ୍କ ମୁଣ୍ଡକୁ ବାରମ୍ବାର ଚୋଟ ପରେ ଚୋଟ ମାରିଥିଲା। ଫଳରେ ରକ୍ତ ଜୁଡୁବୁଡୁ ଅବସ୍ଥାରେ ରାସ୍ତାରେ ହିଁ ଲକ୍ଷ୍ମଣ ଟଳି ପଡ଼ିଥିଲେ। ତାଙ୍କୁ ଗୁରୁତର ଅବସ୍ଥାରେ ପାପଡାହାଣ୍ଡି ଡାକ୍ତରଖାନାକୁ ଅଣାଯାଇଥିଲା। ସେଠାରେ ଡ଼ାକ୍ତର ଲକ୍ଷ୍ମଣଙ୍କୁ ମୃତ ଘୋଷଣା କରିଥିଲେ।
ଏନେଇ ମୃତ ଲକ୍ଷ୍ମଣଙ୍କ ସାନ ଭାଇ ତୁଳାରାମ ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ପୁଲିସ ଅଭିଯୁକ୍ତ ଜଗାଗୈଡଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଏହି ମାମଲାର ବିଚାର କରି ଜିଲ୍ଲା ଓ ଦୈରାଜଜ ସୁବ୍ରତ ମହାନ୍ତି ଅଭିଯୁକ୍ତ ଜଗାଙ୍କୁ ହତ୍ୟା ଅଭିଯୋଗରେ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି।
