ଉଦଳା, ୦୪/୦୯ : ପ୍ରେମ ବିବାହ ପରେ ବୋହୂକୁ ବାରମ୍ବାର ଯୌତୁକ ପାଇଁ ନିର୍ଯାତନା ଦେଲେ । ଶେଷରେ ଶାଶୁ ଏବଂ ଜେଜେମା ଶାଶୁ ମିଶି ବୋହୂକୁ ବିଷ ପିଆଇଲେ । ସ୍ୱାମୀ ଭଣ୍ଡାରିପାଳ ଗ୍ରାମର ସୁଦର୍ଶନ ବିନ୍ଧାଣୀ ଏବଂ ସ୍ତ୍ରୀ କୋଳିଅଳମ ଗ୍ରାମର ସୀତା ନାଏକ ବୋଲି ଜଣାପଡ଼ିଛି । ଉଦଳା ବ୍ଲକ ଅନ୍ତର୍ଗତ କପ୍ତିପଦା ଥାନା ଭଣ୍ଡାରିପାଳ ଗ୍ରାମରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଭଣ୍ଡାରିପାଳ ଗ୍ରାମର ସୁଦର୍ଶନ ବିନ୍ଧାଣୀ ଆଜକୁ ୯ ମାସ ପୂର୍ବରୁ କୋଳିଅଳମ ଗ୍ରାମର ସୀତା ନାଏକଙ୍କୁ ଭଲ ପାଇ ବିବାହ କରିଥିଲେ । ହେଲେ ବିବାହ ପର ଠାରୁ ବିଭିନ୍ନ ସମୟରେ ସୀତାଙ୍କୁ ମାନସିକ ଏବଂ ଶାରୀରିକ ନିର୍ଯ୍ୟାତନା ଦେଇଆସୁଥିଲେ ସୁଦର୍ଶନ ଏବଂ ତାଙ୍କ ପରିବାର ଲୋକେ । ବିଶେଷକରି ବାପଘରୁ ଯୌତୁକ ଆଣିବାକୁ ଦାବି କରି ଆସୁଥିଲେ । ହେଲେ ଶେଷରେ ମଙ୍ଗଳବାର ସୀତା ନାଏକଙ୍କୁ ତାଙ୍କ ଶାଶୁ ଏବଂ ଜେଜେମା ଶାଶୁ ମିଶି ବିଷ ପିଆଇ ଦେଇଥିଲେ । ଏ ବିଷୟରେ ପଡ଼ୋଶୀଲୋକେ ସୀତାଙ୍କ ବାପଘର ଲୋକଙ୍କୁ ଖବର ଦେଇଥିଲେ । ଖବର ପାଇ ସୀତାଙ୍କ ବାପଘର ଲୋକେ ଘଟଣାସ୍ଥଳରେ ପହଞ୍ଚିଥିଲେ । ସେଠାରେ ପହଞ୍ଚି ସୀତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଉଦଳା ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ ।ସେଠାରେ ଚିକିତ୍ସାରତ ଥିବାବେଳେ ସୀତାଙ୍କ ମାଆ କପ୍ତିପଦା ଥାନାରେ ଏକ ଲିଖିତ ଅଭିଯୋଗ କରିଛନ୍ତି । ଉକ୍ତ ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।