ସମ୍ୱଲପୁର,୦୬/୧୧: ଘରେ ନିଆଁ ଲାଗି ଜିଅନ୍ତା ଜଳିଗଲେ ମା ଓ ଝିଅ । ଏହି ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ମୃତ ମା ସ୍ନେହଲତା ଦୀକ୍ଷିତ (୯୦) ଏବଂ ଝିଅ ସୈରେନ୍ଦ୍ରି ଦୀକ୍ଷିତ (୬୨) ବୋଲି ଜଣାପଡ଼ିଛି । ସମ୍ବଲପୁର ମାନେଶ୍ଵର ଅନ୍ତର୍ଗତ ହାଟପଦାରେ ଏଭଳି ଅଘଟଣ ଘଟିଛି। 

ସୂଚନା ମୁତାବକ, ମଙ୍ଗଳାବର ବିଳମ୍ୱିତ ରାତିରେ ଦୁଇ ମହଲା ଘରର ଉପର ରୁମ୍‌ରେ ମା ସ୍ନେହଲତା ଏବଂ ଝିଅ ସୈରେନ୍ଦ୍ରି ଶୋଇଥିଲେ । ଏହି ସମୟରେ ହଠାତ ଘରେ ନିଆଁ ଲାଗି ଯାଇଥିଲା । ଫଳରେ ମା ଝିଅ ସେହି ଘରେ ନିଆଁରେ ଜଳି ପ୍ରାଣ ହରାଇଥିଲେ । ଝିଅ ଅର୍ଦ୍ଧ ଦଗ୍ଧ ହୋଇଥିବା ବେଳେ ମା' ଶୋଇଥିବା ଅବସ୍ଥାରେ ସେମାନଙ୍କ ମୃତ୍ୟୁ ହୋଇ ଯାଇଥିଲା ।ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ଏବଂ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲା । ପରେ ପୋଲିସ ମୃତଦେହ ଦ୍ୱୟ ଜବତ କରିଛି ବ୍ୟବଚ୍ଛେଦ ପାଇଁ ପଠାଇଛି । ବୁଧବାର ସକାଳୁ ଏକ ସାଇଣ୍ଟିଫିକ ଟିମ୍‌ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି । ତେବେ ଏହା ହତ୍ୟା ନା ଆଉ କ'ଣ ଶବ ବ୍ୟବଛେଦ ରିପୋର୍ଟ ଆସିବା ପରେ ସ୍ପଷ୍ଟ ହେବ।