ସମ୍ବଲପୁର,୨୬/୧୦: ଚୋରବି ଜାଣିଲେଣି କ୍ଷେତରାଜପୁର ଥାନାର ଦୁର୍ବଳତା । ଅପାରଗ ଅଧିକାରୀକୁ ଦୁବର୍ଳ ବ୍ୟବସ୍ଥା ପାଇଁ ଏବେ ଚୋର ଖୋଲା ଧମକ ଦେଉଥିବା କୁହାଯାଉଛି । ଏଭଳି ଏକ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି । କ୍ଷେତରାଜପୁର ଥାନା ରେମେଡ ନିକଟ ଏକ ବ୍ୟବସାୟୀକ ପ୍ରତିଷ୍ଠାନରୁ କିଭଳି ଗାଡି ଚୋରି କରାଯିବ ସେନେଇ ଭିଡିଓରେ ଦୁର୍ବୃତ୍ତ ଖୋଲା ଚ୍ୟାଲେଞ୍ଜ କରୁଛନ୍ତି । ହେଲେ ଏହାକୁ ନେଇ ପୁଲିସ୍ କୌଣସି ଚୋରି ହୋଇନଥିବା କହିଛି ।
ସୋସିଆଲ୍ ମିଡିଆ ଇନଷ୍ଟାଗ୍ରାମରେ ‘ରୋଶନବ୍ଲଗ୍’ ନାମକ ଆକାଉଣ୍ଟ ଥିବା ବ୍ୟକ୍ତି ଏକ ରିଲ୍ ତିଆରି କରିଛନ୍ତି । ଯେଉଁଥିରେ ସେ କହୁଛନ୍ତି, ଯେଉଁ ସମୟରେ ତୁମେ ଶୋଇଯାଇଥିବା ସେହି ସମୟରେ ଆମେ ଗାଡି ଚୋରି କରିନେଉଛୁ । ଆମେ ଏକ ଶୋ ରୁମ ପାଖକୁ ଆସିଛୁ । ମୋ ପଖରେ ଥିବା ଗାଡିକୁ ଦେଖନ୍ତୁ । ଏଠାରୁ ପିକଅପ୍ ଉଠାଇବାର ଅଛି । ମୋର ବନ୍ଧୁଙ୍କୁ ଦେଖନ୍ତୁ ସେ ଏହାର ହିସାବ କରୁଛନ୍ତି, ଏହାର କେତେ ମୂଲ୍ୟ ହେବ । ପିକ୍ଅପ୍ର ମୂଲ୍ୟ ୩ରୁ ୪ ଲକ୍ଷ ଟଙ୍କା ବୋଲି ମଧ୍ୟ କହୁଛନ୍ତି । ଏଭଳି ଅନେକ ଚୋରି କରିଛୁ । ଏହା ବଦଳରେ ବହୁ ଟଙ୍କା ରୋଜଗାର କରିଛୁ । ଏବେ ମୋ ବନ୍ଧୁ ଯେଉଁ ଆଇ ଫୋନ୍ଟି କିଣିଛନ୍ତି, ତାହା ଚୋରି ପଇସାରୁ ବୋଲି ଖୋଲାଖୋଲି ସୋସିଆଲ୍ ମିଡିଆରେ କହୁଛନ୍ତି । ଯାହାକୁ ନେଇ କ୍ଷେତରାଜପୁର ଥାନାର କାର୍ଯ୍ୟଶୈଳି ଉପରେ ପ୍ରଶ୍ନ ଉଠିଛି ।
କେବଳ ଏହା ନୁହେଁ, କିଛି ମାସ ପୂର୍ବରୁ ସେହି ନୀଲଡୁଙ୍ଗୁରୀରୁ ୨ ଥର ମୋଟା ଅଙ୍କର ଚୋରି ହୋଇଥିଲା । ୨ ଜଣ ବ୍ୟକ୍ତିଙ୍କ ଠାରୁ ଲକ୍ଷାଧିକ ଟଙ୍କା ଚୋରି କରିଥିଲେ ଦୁର୍ବୃତ୍ତ । ହେଲେ ଆଜି ପର୍ଯ୍ୟନ୍ତ ଏହି ଚୋର ଧରାପଡିଲେ ନାହିଁ । ଏବେ ସୋସିଆଲ୍ ମିଡିଆରେ ଖୋଲା ଧମକ ମିଳୁଛି । ଯାହାକୁ ନେଇ ଜନସାଧାରଣଙ୍କ ସୁରକ୍ଷା ଉପରେ ସନ୍ଦେହ ସୃଷ୍ଟି ହୋଇଥିବା ଅଭିଯୋଗ ହୋଇଛି । ପୁଲିସ୍ ନାକ ତଳୁ ଚୋରି ହେଉଥିଲେ ମଧ୍ୟ ଚୋରର ଟେର୍ ପାଉନି ପୁଲିସ୍ । ଯାହାକୁ ନେଇ ଉଦବେଗ ପ୍ରକାଶ ପାଇଛି । ଏନେଇ ସମ୍ବଲପୁର ସଦର ଏସଡିପିଓ ତୋଫାନ ବାଗ୍ କହିଛନ୍ତି, ଚୋରି କରିବାକୁ କହୁଥିବା ୨ ପିଲା ଏକ ଅଟାକଳରେ କାମ କରନ୍ତି । ସେମାନେ କୌଣସି ଚୋରି କରିନାହାନ୍ତି । ତଥାପି ସେମାନଙ୍କୁ ଡାକି ତାଗିଦ କରାଯାଇଛି । ଏଭଳି ଭିଡିଓ ନ କରିବାକୁ କୁହାଯାଇଛି । ଏହାସହ ଗତ କିଛି ମାସ ମଧ୍ୟରେ ରେମେଡ ଅଞ୍ଚଳରୁ କିମ୍ବା କୌଣସି କମ୍ପାନିରୁ ଗାଡି ଚୋରି ହୋଇନାହିଁ
