ତିଗିରିଆ, ୬/୬: ତିଗିରିଆ ଥାନା ଅନ୍ତର୍ଗତ ହାଟମାଳ ପଞ୍ଚାୟତ ବିଷ୍ଣୁପୁର ଗ୍ରାମରେ ମାଙ୍କଡ଼ ଦୌରାତ୍ମ୍ୟକୁ ନେଇ ଗ୍ରାମବାସୀ ଅତିଷ୍ଠ ହୋଇ ପଡିଲେଣି । ଗ୍ରାମରେ ଘୁରିବୁଲି ଗୋଟିଏ ପରେ ଗୋଟିଏ ଲୋକଙ୍କୁ ଆକ୍ରମଣ କରି ରକ୍ତାକ୍ତ କରୁଥିବା ଏହି ମାଙ୍କଡକୁ ତୁରନ୍ତ ଅଞ୍ଚଳରୁ ଘଉଡାଇବା ପାଇଁ ଦାବି ହେବ ପରେ ବନ ବିଭାଗ ପକ୍ଷରୁ ବହୁ ଥର ଉଦ୍ୟମ ସତ୍ତ୍ୱେ କର୍ମଚାରୀ ମାଙ୍କଡକୁ କାବୁ କରିବାରେ ବିଫଳ ହୋଇଛନ୍ତି । 

ଏପରି ସ୍ଥଳେ ଏବେ ଗ୍ରାମବାସୀ ଉକ୍ତ ମାଙ୍କଡକୁ କାବୁ କରିବାକୁ ପ୍ରୟାସ ଜାରି କରିଛନ୍ତି । ଗ୍ରାମରେ  ଏକ ମାସରୁ ଉର୍ଦ୍ଧ୍ବ ଦିନ ଧରି ମାଙ୍କଡ଼ ଦୌରତ୍ମ୍ୟ ବଢିବାରେ ଲାଗିଛି । ଏହାରି ଭିତରେ ମାଙ୍କଡ଼ ଆକ୍ରମଣରେ ବିଷ୍ଣୁପୁର ଏବଂ ପଡୋଶୀ କଣ୍ଠିପୁର ଗ୍ରାମର ୭ ରୁ ଉର୍ଦ୍ଧ୍ବ ବ୍ୟକ୍ତି ଆହତ ହୋଇ ଚିକିତ୍ସିତ ହୋଇଥିବା ଜଣାପଡ଼ିଛି । ଏହା ଆଜି ସନ୍ଧ୍ୟାରେ ମଧ୍ୟ ଗ୍ରାମର ଯୁବକ ଲିଜୁନୁ ସାମଲଙ୍କୁ ଉକ୍ତ ମାଙ୍କଡ଼ ଆକ୍ରମଣ କରିଥିବା ଜଣାପଡ଼ିଛି l ଏହା ପରେ ଗ୍ରାମବାସୀ ଠେଙ୍ଗା ବାଡ଼ି ଧରି ମାଙ୍କଡ଼କୁ ଧରିବା ପାଇଁ ଚେଷ୍ଟା ଜାରି ରଖିଛନ୍ତି l ଏହା ଛଡ଼ା ଲୋକମାନଙ୍କର ଘରେ ପଶି ଆସବାବପତ୍ର ସହିତ ଖାଦ୍ୟ ସାମଗ୍ରୀ ନଷ୍ଟ  କରୁଛି ।  

ମାଙ୍କଡ଼ ଆକ୍ରମଣ ବଢି ଚାଲିଥିବାରୁ ଗ୍ରାମବାସୀଙ୍କ ପକ୍ଷରୁ ମାଙ୍କଡ଼କୁ ଧରିବାକୁ ଚେଷ୍ଟା କରାଯାଉଥିବା ଦେଖା ଯାଇଛି l ଆଉ କୌଣସି ଅଘଟଣ ଘଟିବା ପୂର୍ବରୁ ଉକ୍ତ ମାଙ୍କଡ଼ଙ୍କୁ ବନବିଭାଗ କାବୁ କରିବାକୁ ତୁରନ୍ତ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି ।