ତିଗିରିଆ, ୬/୬: କଥାରେ ଅଛି ତୁଳସୀ ଦୁଇ ପତ୍ରରୁ ବାସେ । ଠିକ୍ ସେହିପରି ବୟସରେ ବହୁ ଛୋଟ ହେଲେ ମଧ୍ୟ ବିଶ୍ବ ଦରବାରରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି ତିଗିରିଆ ବ୍ଲକର ଅମ୍ଳାଶୁଂ । ଛୋଟ ସିନା କାମ କିନ୍ତୁ ବଡ । ନିଜର ବୁଦ୍ଧି ଏବଂ ଆତ୍ମବିଶ୍ୱାସ ପାଇଁ ଆଜି ଏହି କୁନି ଶିଶୁ ବଡ ରେକର୍ଡର ଅଧିକାରୀ ହୋଇପାରିଛି । କଟକ ଜିଲ୍ଲା ତିଗିରିଆ ବ୍ଲକ ହାଟମାଳ ପଞ୍ଚାୟତ ଅନ୍ତର୍ଗତ ଶୁଣ୍ଠୀପାଳ ଗ୍ରାମର ସୁନୀଲ କରଙ୍କ ପୁଅ ଅମ୍ଳାଶୁଂ । ତାଙ୍କ ନାଁ ଯେମିତି କାମ ମଧ୍ୟ ସେମିତି । ବୟସ ମାତ୍ର ୩ବର୍ଷ ୧୧ ମାସ । ଏହି ବୟସରେ ଅତି ସୁନ୍ଦର ଭାବରେ ସମସ୍ତ ସାଧାରଣଜ୍ଞାନ ପ୍ରଶ୍ନର ସଠିକ ଉତ୍ତର ରଖି ଇଣ୍ଡିଆ ବୁକ୍ ଅଫ ରେକର୍ଡରେ ଉତୀର୍ଣ୍ଣ ହୋଇଛନ୍ତି ଅମ୍ଳାଶୁଂ । ଏହି ଖବର ପ୍ରଚାରିତ ହେବା ପରେ ଚାରି ଆଡୁ ପ୍ରଶଂସାର ସୁଅ ଛୁଟିବାରେ ଲାଗିଛି ।

ଏତେ କମ୍ ବୟସରୁ ଏତେ ବଡ଼ ପ୍ରତିଭାର ଅଧିକାରୀ ସେ ଯେଉଁଥିପାଇଁ ଆଜି ପୁରା ଅଞ୍ଚଳ ତାଙ୍କ ପାଇଁ ଗର୍ବିତ । ୧୬ଟି କୀଟ, ୧୯ଟି ଫୁଲ, ୩୧ଟି ଫଳ, ୨୨ ପରିବା, ୨୮ ପଶୁ, ୨୨ ପକ୍ଷୀ, ୩୨ଟି ଅଙ୍ଗପ୍ରତ୍ୟଙ୍ଗ ର ଇଂରାଜି ରୁ ଓଡ଼ିଆ ଅନୁବାଦ, କମ୍ପୁଟରର ୨୦ଟି ଅଂଶ, ୩୦ ରଙ୍ଗ, ୧୬ ଜଣ ଚର୍ଚିତ ବ୍ୟକ୍ତିତ୍ୱ, ୩ ଟି rhymes, ବର୍ଷର ମାସ, ସପ୍ତାହ ଓ ଦିନ ଏବଂ ୩୧ଟି ଜାତୀୟ ସିମ୍ବଲ ସଠିକ ଭାବରେ କହିପାରୁଛନ୍ତି  ଅମ୍ଳାଶୁଂ l ଭଲ ଭାବେ କହିବା ପାଇଁ ପାଟି ଫିଟିନଥିବା ବେଳେ ଏବେ ଠାରୁ ସାଧାରଣ ଜ୍ଞାନ ସହିତ ବିଭିନ୍ନ ପ୍ରଶ୍ନର ଫଟାଫଟ ଉତ୍ତର ଦିଅନ୍ତି ସେ । ସବୁ କିଛି ଜାଣିବାର ଇଚ୍ଛା ଶକ୍ତି ଦେଖି ପରିବାର ଲୋକେ ତାଙ୍କୁ କିଛି ନୂଆ କରିବାର ଉଦ୍ୟମ କରିଥିଲେ । ପରିବାର ଲୋକେ ତାଙ୍କ ନାମକୁ ଇଣ୍ଡିଆ ବୁକ ଅଫ୍ ରେକର୍ଡରେ ସ୍ଥାନ ଦେବାକୁ ଆବେଦନ କରିଥିଲେ । ପରବର୍ତ୍ତୀ ସମୟରେ ମେ ୩ ତାରିଖ ୨୦୨୫ରେ ଇଣ୍ଡିଆ ବୁକ ଅଫ୍ ରେକର୍ଡରେ ସ୍ଥାନ ପାଇଛନ୍ତି । ପିଲାଟି ଦିନରୁ ପାଠ ପଢ଼ିବାର ପ୍ରବଳ ଇଚ୍ଛା ରହିଥିବା ଯୋଗୁଁ ତାଙ୍କୁ ଏଭଳି ସାଧାରଣଜ୍ଞାନ ସମ୍ପର୍କରେ ପଢ଼ାଯାଉଛି ।

ଯାହାକୁ କି ସେ କମ୍ ସମୟ ମଧ୍ୟରେ ମନେ ରଖିପାରୁଛନ୍ତି ବୋଲି କହିଛନ୍ତି ଅମ୍ଳାଶୁଂଙ୍କ ମା ସରୋଜିନୀ କର ଯିଏକି ଜଣେ ସାଧାରଣ ଗୃହିଣୀ l କୁନି ବୟସରେ ଅନନ୍ୟ ପ୍ରତିଭାର ଅଧିକାରୀ । ନିଜର ବିଚକ୍ଷଣ ବୁଦ୍ଧି ପାଇଁ ଆଜି ଇଣ୍ଡିଆ ବୁକ୍ ଅଫ୍ ରେକର୍ଡରେ ସ୍ଥାନ ପାଇଛନ୍ତି । ମାତ୍ର ୩ ବର୍ଷ ୧୧ ମାସ ବୟସରେ ନିଜ ମେଧାଶକ୍ତି ଓ ବୁଦ୍ଧିମତା ବଳରେ ସାଉଁଟିଛନ୍ତି ସଫଳତା । ଯେଉଁ ବୟସରେ ସେ ଖେଳକୁଦ କରି ସମୟ କଟାଇବା କଥା ସେହି ବୟସରେ ଚକିତ କଲା ଭଳି ପ୍ରତିଭା ତା ପାଖରେ ଦେଖିବାକୁ ମିଳିଛି । ତେବେ ଆଗକୁ ଏହିଭଳି ତାଙ୍କର ସଫଳତାର ଯାତ୍ରା ଜାରି ରହୁ ଏହାହିଁ ସମସ୍ତଙ୍କ ଆଶା ବୋଲି ତାଙ୍କ ଗ୍ରାମବାସି କହିଛନ୍ତି ।