ରାୟଗଡ଼ା, ୦୭/୦୫ : ରାୟଗଡ଼ାରୁ ନିଖୋଜ ନାବାଳିକା ହରିୟାଣାରୁ ଉଦ୍ଧାର। ୯୧ ହଜାର ଟଙ୍କାରେ ବିକି ଦେଇଥିଲା ଦଲାଲ। ୨ ଜଣଙ୍କୁ ବାନ୍ଧିଲା ପୋଲିସ। ତେବେ ନାବାଳିକାଙ୍କୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ୨ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
ସୂଚନାନୁଯାୟୀ, ବିଷମକଟକ ଥାନା ସିକବନ୍ଧ ଗାଁର ଜଣେ ନାବାଳିକା ମାର୍ଚ୍ଚ ମାସରେ ସମ୍ପର୍କୀୟଙ୍କ ବିବାହ ଉତ୍ସବରେ ଯୋଗ ଦେବାକୁ ଆସି ନିଖୋଜ ହୋଇଯାଇଥିଲେ। ପରିବାର ଲୋକେ ବହୁ ଖୋଜାଖୋଜି କରିବା ପରେ ଝିଅର ପତ୍ତା ନମିଳିବାରୁ ମେ ୧ ତାରିଖରେ ମୁନିଗୁଡ଼ା ଥାନାରେ ଏତଲା ଦେଇଥିଲେ। ପୋଲିସ ଏତଲା ଆଧାରରେ ଏକ ଟିମ୍ ଗଠନ କରି ବିଭିନ୍ନ ସ୍ଥାନରେ ରେଡ୍ କରିଥିଲା। ତେବେ ନାବାଳିକାକୁ ହରିୟାଣା ଜିନ୍ଧ ଜିଲ୍ଲାରୁ ନାବାଳିକାଙ୍କୁ ଉଦ୍ଧାର କରାଯାଇଛି। ନାବାଳିକାଙ୍କୁ ମୁନିଗୁଡ଼ା ଅଞ୍ଚଳର ୨ ଜଣ ଦଲାଲ ଖଜୁରୀପଦା ଗାଁର ସାୟାବତି କିଲ୍ଲାକା ଓ ଟିକରପଡ଼ାର ଗୋପାଳ ନାଗ ହରିୟାଣାରେ ୯୧ ହଜାର ଟଙ୍କାରେ ବିକ୍ରି କରିଦେଇଥିଲେ। ପୂର୍ବରୁ ହରିୟାଣା ଓ ରାଜସ୍ଥାନ ଅଞ୍ଚଳରେ ବିବାହ ପାଇଁ ଝିଅ ଅଭାବ ଯୋଗୁଁ ମୁନିଗୁଡ଼ା ଓ ଆଖାପାଖ ଅଞ୍ଚଳରୁ ଅନେକ ଝିଅଙ୍କୁ ଦଲାଲମାନେ ମୋଟା ଅଙ୍କର ଅର୍ଥରେ ବିକ୍ରି କରୁଥିବା ଅଭିଯୋଗ ହେଉଥିଲା। ଏହି ଘଟଣା ପରେ ଅଧିକ ଛାନଭିନ୍ ଚଳାଇଛି ପୋଲିସ।