ରାୟଗଡ଼ା, ୧୩/୦୮ : ଶ୍ରୀ ଅନ୍ନ ଅଭିଯାନର ଦ୍ୱିତୀୟ ପ୍ରମୁଖ କେନ୍ଦ୍ର ଭାବେ ପରିଚିତ ହୋଇଛି ରାୟଗଡ଼ା ଜିଲ୍ଲା । ସରକାର ଏହାର ପ୍ରଚାରପ୍ରସାର କରୁଛନ୍ତି । ଏହି ପ୍ରଦର୍ଶନକୁ ନେଇ ବିଭାଗୀୟ ଅଧିକାରୀମାନେ ବେଶ୍ ଉତ୍ସାହିତ ଅଛନ୍ତି । ଅଥଚ ଜିଲ୍ଲାରେ ମିଲେଟ୍ ଚାଷ କମୁଥିବାବେଳେ ଉତ୍ପାଦନ ବଢ଼ୁଥିବାରୁ ସନ୍ଦେହ ସୃଷ୍ଟି ହୋଇଛି । ଏନେଇ ବିଧାନସଭାରେ ବିଧାୟକ ଟଙ୍କଧର ତ୍ରିପାଠୀଙ୍କ ପ୍ରଶ୍ନର ଉତ୍ତର ରଖିବାକୁ ଯାଇ କୃଷିମନ୍ତ୍ରୀ ଦେଇଥିବା ତଥ୍ୟ ଆହୁରି ଅଧିକ ସନ୍ଦେହ ଘେରକୁ ଟାଣି ନେଉଛି । କେତେ ବର୍ଷ ଚାଷର ପରିମାଣ ବଢ଼ିଥିବା ବେଳେ ଉତ୍ପାଦନ କମ୍ ଏବଂ ଆଉ କେତେକ ବର୍ଷ ଚାଷ ପରିମାଣ କମିଲେ ବି ରେକର୍ଡ ସୃଷ୍ଟି କଲା ଭଳି ଉତ୍ପାଦନ ହୋଇଛି । କୃଷକ ମହଲରେ ଏଭଳି ତଥ୍ୟର ବିଶ୍ୱସନିୟତା ନେଇ ଅନେକ ସନ୍ଦେହ ଉପୁଜିଛି । ତେଣୁ ବିଭାଗୀୟ କାର୍ଯ୍ୟଶୈଳୀର ତଦନ୍ତ ହେବା ଆବଶ୍ୟକ ବୋଲି ଅଞ୍ଚଳବାସୀ ଦାବି କରିଛନ୍ତି ।
କୃଷିମନ୍ତ୍ରୀଙ୍କ ତଥ୍ୟ ଅନୁଯାୟୀ, ୨୦୧୭ ମସିହାରୁ ସରକାରଙ୍କ କୃଷି ଓ କୃଷକ ସଶକ୍ତୀକରଣ ବିଭାଗ ଅଧୀନରେ କାର୍ଯ୍ୟକାରୀ ହୋଇଥିଲା ଶ୍ରୀ ଅନ୍ନ ଅଭିଯାନ(ମିଲେଟ ମିଶନ) । ସେହିବର୍ଷ ଜିଲ୍ଲାରେ ମିଲେଟ୍ ଚାଷ ୩୫୧.୪ ହେକ୍ଟରରୁ ବଢ଼ି ୧୦ ହଜାର ୯୭୮ ହେକ୍ଟର ହୋଇଥିଲା । ଉତ୍ପାଦନ ୩୦୪୬. ୬ କ୍ୱିଣ୍ଟାଲରୁ ୧ ଲକ୍ଷ ୧୪ ହଜାର ୭୨୨ କ୍ୱିଣ୍ଟାଲ ରହିଥିଲା । ୨୦୧୭-୧୮ରୁ ୨୦୨୧-୨୨ ପର୍ଯ୍ୟନ୍ତ ଉଭୟ ଚାଷ ଜମି ଓ ଉତ୍ପାଦନ କ୍ରମବର୍ଦ୍ଧିଷ୍ଣୁ ଭାବେ ସ୍ଥିର ରହିଥିଲା । ୨୦୨୨-୨୩ ପରଠାରୁ ସ୍ଥିତି ବିଗିଡିବାରେ ଲାଗିଲା । ୨୦୨୧-୨୨ରେ ୧୦ ହଜାର ୯୭୮.୧ ହେକ୍ଟରରେ ଚାଷ କରାଯାଇଥିଲା । ସେଥିରୁ ୧ ଲକ୍ଷ ୧୪ ହଜାର ୭୨୨.୨ କ୍ୱିଣ୍ଟାଲ ଉତ୍ପାଦନ ହୋଇଥିଲା । ଏହି ସମୟରେ ଉକ୍ତ ଅଭିଯାନ ସଫଳତା ଶିଖର ଛୁଇଁଥିଲା । ୨୦୨୨-୨୩ ରେ କମି ୬୭୪୧. ୮ ହେକ୍ଟର ଜମିରେ ଚାଷ ହୋଇଥିଲା । ୮୬ ହଜାର ୨୯୫ କ୍ୱିଣ୍ଟାଲ ଉତ୍ପାଦନ ହୋଇଥିଲା । ୨୦୨୩-୨୪ ରେ ଚାଷ ଜମିର ପରିମାଣ ୯୦୨୯. ୮ ହେକ୍ଟର ବଢ଼ିଥିବା ବେଳେ କେବଳ ୫୯ ହଜାର ୮୬୭. ୬ କ୍ୱିଣ୍ଟାଲ୍ ଫସଲ ଅମଳ ହୋଇଥିଲା । ଯାହାକି ପୂର୍ବବର୍ଷ ଗୁଡିକ ଅପେକ୍ଷା ଉତ୍ପାଦନସ୍ତରରେ ବେଶ ହ୍ରାସ ଘଟିଥିବା ଦେଖିବାକୁ ମିଳଛି । ୨୦୨୪-୨୫ ବର୍ଷରେ ୯୧୮୪. ୭ ହେକ୍ଟର ଜମିରେ ଚାଷ କରାଯାଇଥିଲା । ତଥାପି ୧ ଲକ୍ଷ ୧୭ ହଜାର ୧୯୬.୧ କ୍ୱିଣ୍ଟାଲ ଉତ୍ପାଦନ ହୋଇଥିଲା । ତେଣୁ ମନ୍ତ୍ରୀଙ୍କୁ ବିଭାଗ ପକ୍ଷରୁ ଦିଆଯାଇଥିବା ଏହି ତଥ୍ୟ ଅନେକ ସନ୍ଦେହ ସୃଷ୍ଟି କରୁଛି ।
୨୦୨୪-୨୫ ରେ କମ ପରିମାଣ ଜମିରେ ଚାଷ ହୋଇଥିବା ବେଳେ କିପରି ରେକର୍ଡ ଉତ୍ପାଦନ ସମ୍ଭବ ହୋଇପାରିଲା । ୨୦୨୩-୨୪ ରେ ଚାଷ ଜମିର ପରିମାଣ ବୃଦ୍ଧି ସତ୍ତ୍ଵେ ଉତ୍ପାଦନ କାହିଁକି ଧୀମେଇଗଲା ତାହା ତଦନ୍ତ ସାପେକ୍ଷ । ଯୋଜନାର ସଫଳ ରୂପାୟନ ଏବଂ ମିଛ ପ୍ରଶଂସା ସାଉଁଟିବା ପାଇଁ ଚାଷ ବଦଳରେ ବାହାର ରାଜ୍ୟରୁ ଆମଦାନୀ କରାଯାଉଛି । ଉତ୍ପାଦନ ସଂଖ୍ୟାକୁ ପରିବର୍ତ୍ତନ କରାଯାଉଥିବା କୃଷକ ନେତାମାନେ ଅଭିଯୋଗ କରିଛନ୍ତି । ଜିଲ୍ଲାର କେତେକ ବ୍ଲକ୍ରେ ନିୟୋଜିତ ଥିବା ଘରୋଇ ସଂସ୍ଥା ଏବଂ ଏସ୍ଏଚ୍ଜି ବାହାର ରାଜ୍ୟରୁ ମାଣ୍ଡିଆ କିଣି କାଗଜ କଲମରେ ଚାଷ ଓ ଉତ୍ପାଦନକୁ ସୀମିତ ରଖିବାରେ ସକ୍ରିୟ ଥିବା ଅଭିଯୋଗ ହେଉଛି । ମିଲେଟ୍ ଚାଷ ପାଇଁ ଏଠିକା ପରିବେଶ ଓ ଜଳବାୟୁ ବେଶ ଅନୁକୂଳ । ଅଞ୍ଚଳରେ କୃଷି ପରମ୍ପରାର ପୁନରୁଦ୍ଧାର, କୃଷକମାନଙ୍କ ପାଇଁ ଉପଯୁକ୍ତ ବଜାର ସୃଷ୍ଟି, ପରମ୍ପରାଗତ କୃଷି ପ୍ରଣାଳୀକୁ ପ୍ରୋତ୍ସାହନ ତଥା ଖାଦ୍ୟ ସୁରକ୍ଷା ସୁନିଶ୍ଚିତ କରିବା ଶ୍ରୀ ଅନ୍ନ ଅଭିଯାନର ଉଦ୍ଦେଶ୍ୟ । କିନ୍ତୁ ବାସ୍ତବ ଚିତ୍ର କିନ୍ତୁ ଅଲଗା । ଜିଲ୍ଲାରେ ମିଲେଟ ମିଶନ କାର୍ଯ୍ୟକାରିତା ତଥା ସଫଳତାକୁ ନେଇ ସମୀକ୍ଷା କରାଯିବା ପାଇଁ ଦାବି ହୋଇଛି । ଏ ସମ୍ପର୍କରେ ଭାରପ୍ରାପ୍ତ ଜିଲ୍ଲା ମୁଖ୍ୟ କୃଷି ଅଧିକାରୀ ସେଖ୍ ହସନ୍ କହିଛନ୍ତି, କ୍ଷେତ୍ରରେ ଥିବା କର୍ମଚାରୀ ଯେଉଁ ରିପୋର୍ଟ ଦେଉଛନ୍ତି ତାହା ସରକାରଙ୍କୁ ଜଣାଇ ଦିଆଯାଉଛି । ସେଥିରେ କୌଣସି ତ୍ରୁଟି ନାହିଁ । ପାଣିପାଗ ଅନୁସାରେ ଓ ଉନ୍ନତ କୃଷି ପ୍ରଣାଳୀ ଯୋଗୁଁ ଉତ୍ପାଦନ ବଢ଼ିଥାଏ ।
