ନୂଆଦିଲ୍ଲୀ: ଦକ୍ଷିଣ କୋରିଆରେ ଜରୁରିକାଳୀନ ମାର୍ଶଲ ଲ’ ଲାଗୁ କରିଛନ୍ତି ରାଷ୍ଟ୍ରପତି ୟୁନ ସୁକ୍ ୟୋଲ । ବିରୋଧୀ ଦଳ ସଂସଦକୁ ନିୟନ୍ତ୍ରଣ କରିବା, ଉତ୍ତର କୋରିଆକୁ ସହାନୁଭୂତି ଦେଖାଇବା ଏବଂ ସରକାରକୁ ପଙ୍ଗୁ କରିବାକୁ ଷଡ଼ଯନ୍ତ୍ର କରୁଥିବା ଅଭିଯୋଗ କରି ରାଷ୍ଟ୍ରପତି ୟୋଲ୍ ଏଭଳି ନିଷ୍ପତ୍ତି ନେଇଛନ୍ତି । ଦେଶର ବଜେଟ ବିଲକୁ ନେଇ ସଂସଦରେ ଅଚଳାବସ୍ଥା ଜାରି ରହିଥିଲା । ଏଭଳି ସ୍ଥିତିରେ, ଉତ୍ତର କୋରିଆର କମ୍ୟୁନିଷ୍ଟ ବାହିନୀ କବଳରୁ ଦେଶକୁ ରକ୍ଷା କରିବା ପାଇଁ ଏପରି ପଦକ୍ଷେପର ଆବଶ୍ୟକତା ରହିଛି ବୋଲି କହିଛନ୍ତି ରାଷ୍ଟ୍ରପତି ୟୋଲ ।
ଟେଲିଭିଜନ୍ ବାର୍ତ୍ତା ମାଧ୍ୟମରେ ଦେଶରେ ଜରୁରୀ ମାର୍ଶଲ ଲ’ ଘୋଷଣା କରାଯିବା, ଉତ୍ତର କୋରିଆରେ ରାଜନୈତିକ ସଂକଟକୁ ଦର୍ଶାଉଛି । ଆଉ ଏହି ସମୟ ଦକ୍ଷିଣ କୋରିଆ ଲାଗି ବହୁ ଗୁରୁତ୍ବପୂର୍ଣ୍ଣ । ୨୦୨୨ରେ ଦେଶର ରାଷ୍ଟ୍ରପତି ହୋଇଥିବା ୟୁନ ସୁକ୍ ୟୋଲଙ୍କୁ ନ୍ୟାସନାଲ୍ ଆସେମ୍ବଲିରେ ବହୁ ଆହ୍ବାନର ସାମ୍ନା କରିବାକୁ ପଡ଼ିଥିଲା । ବିରୋଧୀଙ୍କ ହଙ୍ଗାମାରେ ଚିନ୍ତିତ ହୋଇପଡ଼ିଥିଲେ ୟୋଲ୍ । ଦେଶର ସାମ୍ବିଧାନିକ ବ୍ୟବସ୍ଥାକୁ ରକ୍ଷା କରିବା ଲାଗି ମାର୍ଶଲ ଲ’ର ଆବଶ୍ୟକତା ରହିଛି ବୋଲି ୟୋଲ୍ କହିଛନ୍ତି ।
ଦେଶବାସୀଙ୍କୁ ସମ୍ବୋଧନ କରି ରାଷ୍ଟ୍ରପତି ୟୋଲ କହିଛନ୍ତି, ‘ଉଦାରବାଦୀ ଦକ୍ଷିଣ କୋରିଆକୁ ପଡ଼ୋଶୀ ଉତ୍ତର କୋରିଆର କମ୍ୟୁନିଷ୍ଟ ଫୋର୍ସ ପକ୍ଷରୁ ବିପଦ ସୃଷ୍ଟି ହୋଇଛି । ଏଥିସହ ଦେଶ ବିରୋଧୀ ତତ୍ତ୍ୱ ଏବେ ମାତିଛନ୍ତି। ସେମାନଙ୍କୁ ନିପାତ କରିବା ଓ ଦେଶର ସୁରକ୍ଷା ପାଇଁ ମୁଁ ଏମର୍ଜେନ୍ସି ସାମାରିକ ଆଇନ ଲାଗୁ କରୁଛି । ଲୋକଙ୍କ କଥା ନଭାବି ବିରୋଧୀ ଦଳ କେବଳ ସରକାରୀ ନୀତିକୁ ଅଚଳ କରିବାକୁ ଚେଷ୍ଟା କରୁଛନ୍ତି । ଅନାସ୍ଥା ଆଣିବା, ସ୍ୱତନ୍ତ୍ର ତଦନ୍ତକୁ ବିରୋଧ କରିବା ଓ ସେମାନଙ୍କ ନେତାମାନଙ୍କୁ ସୁରକ୍ଷା ଦେବା ପାଇଁ ବିରୋଧୀ କେବଳ ଅପଚେଷ୍ଟା କରୁଛନ୍ତି।’ ତେବେ ରାଷ୍ଟ୍ରପତିଙ୍କ ଏହି ପଦକ୍ଷେପ ଦେଶର ଶାସନ ଓ ଗଣତନ୍ତ୍ର ଉପରେ କଣ ପ୍ରଭାବ ପକାଇବ, ସେନେଇ କିଛି ସ୍ପଷ୍ଟ ହୋଇନାହିଁ।
ଆସନ୍ତା ବର୍ଷର ବଜେଟ୍ ବିଲକୁ ନେଇ ୟୋନଙ୍କ ପିପୁଲ ପାୱାର ପାର୍ଟି ଓ ମୁଖ୍ୟ ବିରୋଧୀ ଡେମୋକ୍ରାଟିକ ପାର୍ଟି ମଧ୍ୟରେ ତିକ୍ତତା ଜାରି ରହିଥିବା ବେଳେ ଏମର୍ଜେନ୍ସି ମାର୍ଶଲ ଲ’ ଲାଗୁ କରାଯାଇଛି । ବିରୋଧୀ ସାଂସଦମାନେ ଗୋଟିଏ ସଂସଦୀୟ କମିଟି ଜରିଆରେ ନିଜ ଇଚ୍ଛାରେ ବଜେଟ ପ୍ରସ୍ତୁତ କରିଥିଲେ । ସରକାର ପ୍ରସ୍ତୁତ କରିଥିବା ବଜେଟକୁ ସେମାନେ ଅଗ୍ରାହ୍ୟ କରିଦେଇଛନ୍ତି । ରାଷ୍ଟ୍ରପତି ୟୋନ କହିଛନ୍ତି, ‘ଆମ ନ୍ୟାସନାଲ ଆସେମ୍ବଲି ଏବେ ଅପରାଧୀଙ୍କ ଭୂସ୍ୱର୍ଗ ପାଲଟିଯାଇଛି । ନ୍ୟାୟିକ ଓ ପ୍ରଶାସନିକ ବ୍ୟବସ୍ଥାକୁ ଅଚଳ କରିବା ପାଇଁ ବିଧେୟକର ଡ୍ରାମା କରାଯାଉଛି । ବିରୋଧୀ ଦଳର ସାଂସଦମାନେ ଏ ସରକାରକୁ ହଟାଇବାକୁ ଚାହୁଁଛନ୍ତି। ସେମାନେ ଦେଶ ବିରୋଧୀ ତତ୍ତ୍ୱଙ୍କ ସହ ହାତ ମିଳାଇଛନ୍ତି। ହେଲେ ମୁଁ ଦେଶ ବିରୋଧୀ ତତ୍ତ୍ୱମାନଙ୍କୁ ହଟାଇ ଦେଶକୁ ପୁଣି ସ୍ୱାଭାବିକ ଅବସ୍ଥାକୁ ଫେରାଇ ଆଣିବା ପାଇଁ ସଂକଳ୍ପବଦ୍ଧ।’
