ନୂଆଦିଲ୍ଲୀ: ବାଂଲାଦେଶରେ ହିନ୍ଦୁ ଓ ସଂଖ୍ୟାଲଘୁ ମାନଙ୍କ ଉପରେ ହିଂସା ଥମିବାର ନାଁ ଧରୁନି। ଇସଲାମିୟ ଉଗ୍ରପନ୍ଥୀଙ୍କ ଆକ୍ରମଣରେ ଭୟଭୀତ ଅବସ୍ଥାରେ ଦିନକାଟୁଛନ୍ତି ସେଠାକାର ସଂଖ୍ୟାଲଘୁ ଗୋଷ୍ଠୀ। ଉଗ୍ରପନ୍ଥୀମାନେ ବିଭିନ୍ନ ଧର୍ମାନୁଷ୍ଠାନ ଭାଙ୍ଗିବା ସହ ହିନ୍ଦୁ ମାନଙ୍କ ଉପରେ ଆକ୍ରମଣ ଜାରି ରଖିଛନ୍ତି। ତେବେ ଏହାକୁ ନେଇ ମହମ୍ମଦ ୟୁନୁସଙ୍କ ନେତୃତ୍ବାଧୀନ କାମଚଳା ସରକାରର ନେତାଙ୍କ ମନ୍ତବ୍ୟ ଏବେ ଚର୍ଚ୍ଚାରେ ରହିଛି।
ବାଂଲାଦେଶର ଜଣେ ଉଚ୍ଚସ୍ତରୀୟ ଅଧିକାରୀ ଏକ ଗଣମାଧ୍ୟମକୁ ସାକ୍ଷାତକାର ଦେଇ ନିଜ ବୟାନ ରଖିଛନ୍ତି। ଶେଖ ହସୀନାଙ୍କ ଶାସନ କାଳ ଅପେକ୍ଷା ବର୍ତ୍ତମାନର ସମୟକାରେ ହିନ୍ଦୁମାନେ ଦେଶରେ ସବୁଠୁ ଅଧିକ ସୁରକ୍ଷିତ ଅଛନ୍ତି। ତା ସହ ସଂଖ୍ୟାଲଘୁ ମାନେ ହିଂସାର ଶିକାର ହେଉଛନ୍ତି ବୋଲି ଭାରତୀୟ ଗଣମାଧ୍ୟମ ଭୁଲ ଖବର ପ୍ରଚାର କରୁଛି ବୋଲି ସେ କହିଛନ୍ତି। ମହମ୍ମଦ ଯୁନୁସଙ୍କ ସରକାରରେ ମିଡିଆ ସଚିବ ଥିବା ଶାଫିକୁଲ ଆଲମ ଭାରତର ଏକ ଗଣମାଧ୍ୟମକୁ ସାକ୍ଷାତକାର ଦେଇ କିଛି ଏପରି କହିଛନ୍ତି।
ସୂଚନା ମୁତାବକ ଗତ ଅଗଷ୍ଟ ମାସରେ ଶେଖ ହସିନାଙ୍କ ସରକାର ଭାଙ୍ଗି ଯାଇଥିଲା। ଏହାପରେ ବିଭିନ୍ନ ଉଗ୍ରପନ୍ଥୀ ଗୋଷ୍ଠୀମାନେ ହିନ୍ଦୁ ମାନଙ୍କ ଉପରେ ଆକ୍ରମଣ କରିବା ସହ ସେମାନଙ୍କ ଧର୍ମାନୁଷ୍ଠାନ ଉପରେ ଆକ୍ରମଣ ଜାରି ରଖିଛନ୍ତି। ଏହା ବିରୋଧରେ ବାଂଲାଦେଶରେ ରହୁଥିବା ହିନ୍ଦୁ ମାନେ ବିକ୍ଷୋପ ପ୍ରଦର୍ଶନ କରିଆସୁଥିଲେ। ତେବେ ନିକଟରେ ତିନିଜଣ ହିନ୍ଦୁ ସନ୍ନ୍ୟାସିଙ୍କୁ ଗିରଫ କରିବା ପରେ ବାଂଲାଦେଶରେ ବିକ୍ଷୋପ ପ୍ରଦର୍ଶନ ବଢିଥିଲା। ଯାହାର ସିଧାସଳଖ ପ୍ରଭାବ ପଡୋଶୀ ଦେଶ ଭାରତ ଉପରେ ପଡିଥିଲା। ଏବେ ଭାରତରେ ବାଂଲାଦେଶର ସଂଖ୍ୟା ଲଘୁଙ୍କ ଉପରେ ହେଉଥିବା ଆକ୍ରମଣକୁ ନେଇ ବିବାଦ ତେଜିବା ଆରମ୍ଭ କରିଛି।
ଇସ୍କନ ସମ୍ପର୍କରେ ପଚାରିବାରୁ ଆଲମ ଏହାକୁ ନେଇ ଭିନ୍ନ ମତ ଦେଇଛନ୍ତି। ସେ କହିଛନ୍ତି ଆମେ ହିନ୍ଦୁ ମାନଙ୍କୁ ଦୁର୍ଗାପୂଜା କରିବାକୁ ଦେଇଥିଲୁ। ଇସ୍କନକୁ ନେଇ ଆମର ସେମିତି କିଛି ଲକ୍ଷ ନାହିଁ। ଓଲଟା ହିଂସା ସମୟରେ ଇସ୍କନ ମନ୍ଦିରକୁ ସୁରକ୍ଷା ଦେବାକୁ ଆମେ ସୁରକ୍ଷା କର୍ମୀଙ୍କୁ ପଠାଇଥିଲୁ।
ଖବର ମୁତାବକ, ବିଗତ ସପ୍ତାହରେ, ବାଙ୍ଗଲାଦେଶରେ ଇସ୍କନକୁ ବ୍ୟାନ କରିବା ପାଇଁ କୋର୍ଟରେ ଆବେଦନ କରାଯାଇଥିଲା। ଶୁଣାଣୀ ସମୟରେ ବାଂଲାଦେଶର ଆଟର୍ଣ୍ଣୀ ଜେନେରାଲ ଇସ୍କନକୁ ଏକ ଧାର୍ମିକ ମୌଳବାଦୀ ସଂଗଠନ ବୋଲି କହିଥିଲେ। ତେବେ କୋର୍ଟ ଇସ୍କନକୁ ବ୍ୟାନ ନକରିବା ସପକ୍ଷରେ ରାୟ ଦେଇଥିଲେ। ଏହାର ଦିନକପରେ ବାଂଲାଦେଶର ଅଧିକାରୀମାନେ ଇସ୍କନ ସହ ଜଡିତ ୧୭ ଜଣ ଲୋକଙ୍କ ବ୍ୟାଙ୍କ ଆକାଉଣ୍ଟକୁ ଫ୍ରିଜ କରିଦେଇଥିଲେ।
