ଭୁବନେଶ୍ୱର,୨୧/୦୨: ବେନିୟମ କାମକୁ ନେଇ ଚର୍ଚ୍ଚାରେ ବୌଦ୍ଧ ଜିଲ୍ଲା ମନମୁଣ୍ଡା ଥାନା ପୋଲିସ । ପୂର୍ବରୁ ଗଞ୍ଜେଇ ମାମଲାରେ ଜବତ ହୋଇଥିବା ଗାଡ଼ିକୁ ବ୍ୟବହାର କରୁଛି ପୋଲିସ । ବେଆଇନ ଭାବରେ ନମ୍ବର ପ୍ଲେଟ୍ରେ ଷ୍ଟିକର୍ ମାରି ବ୍ୟବହାର ହେଉଛି ପିକଅପ୍ ଗାଡ଼ି । ଉକ୍ତ ଗାଡ଼ିରେ ଥାନାରୁ କୋର୍ଟକୁ ଗଞ୍ଜେଇ ପରିବହନ କରୁଛି ପୋଲିସ । ବୌଦ୍ଧ ଜିଲ୍ଲାରେ ଏଭଳି କିଛି ଦୃଶ୍ୟ ଦେଖିହାକୁ ମିଳିଛି ।
ସୂଚନା ମୁତାବକ, କିଛି ଦିନ ତଳେ ଟିଲାଟିଙ୍ଗା ଗ୍ରାମ ନିକଟରୁ ୫ କ୍ବିଣ୍ଟାଲ ଗଂଜେଇ ଜବତ କରିଥିଲା ପୋଲିସ । ଉକ୍ତ ଗଞ୍ଜେଇକୁ ମାଜିଷ୍ଟ୍ରେଟଙ୍କ ସାମ୍ନାରେ ଓଜନ କରାଯିବା ପରେ ଜବତ କରି ଥାନାକୁ ଆଣି ମାମଲା ରୁଜୁ କରାଯାଇଥିଲା । ଜବତ ଗଞ୍ଜେଇକୁ କଣ୍ଟାମାଳ କୋର୍ଟରେ ପ୍ରଦର୍ଶନ ପାଇଁ ଏକ ଗାଡ଼ିରେ ନେଇଥିଲେ । ହେଲେ ଆଶ୍ଚର୍ଯ୍ୟର କଥା ଯେ, କଣ୍ଟାମାଳ କୋର୍ଟକୁ ପ୍ରଦର୍ଶନ ପାଇଁ ଗଞ୍ଜେଇ ଯେଉଁ ଗାଡ଼ିରେ ପରିବହନ କରାଯାଇଛି, ତାହା ପୋଲିସ ଗାଡି କିମ୍ବା କୌଣସି ଭଡା ଗାଡ଼ି ନୁହେଁ । ଗଞ୍ଜେଇ ଚାଲାଣ ମାମଲାରେ ଜାନୁୟାରୀ ମାସ ୯ ତାରିଖରେ ଶରଧାପାଲି ଗ୍ରାମ ନିକଟରୁ ଜବତ ହୋଇଥିବା ପିକଅପ୍ ଭ୍ୟାନ୍ରେ ପରିବହନ କରୁଥିବା ଦେଖିବାକୁ ମିଳିଛି । ଏଥି ସହିତ ଜବତ ଗାଡ଼ିର ଆଗ ଓ ପଛରେ ଥିବା ନମ୍ବର୍ ପ୍ଲେଟରେ ଷ୍ଟିକର ଲାଗିଥିବା ମଧ୍ୟ ଦେଖିବାକୁ ମିଳିଛି । ଉକ୍ତ ଗାଡ଼ିର ଡାଲାରେ ଜଣେ ଶ୍ରମିକଙ୍କୁ ଗଞ୍ଜେଇ ବସ୍ତା ଉପରେ ଅତି ବିପଦଜନକ ଅବସ୍ଥାରେ ବସାଇ ନେଉଥିବା ଦେଖିବାକୁ ମିଳିଛି । ତେବେ ପୋଲିସ କିଭଳି ବେନିୟମ ଭାବରେ ଖୁଲମଖୁଲା ଜବତ ଗାଡ଼ିକୁ ବ୍ୟବହାର କରୁଛି, ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
