ନୂଆଦିଲ୍ଲୀ, ୨୬/୦୧: ମହାନଦୀ ଜଳ ବିବାଦର ସମାଧାନ ଆପୋସ ଆଲୋଚନା ମାଧ୍ୟମରେ କରାଯାଉ । ଶନିବାର ମହାନଦୀ ଜଳ ବିବାଦ ଟ୍ରିବ୍ୟୁନାଲର ଶୁଣାଣି ସମୟରେ ଆଡଭୋକେଟ୍ ଜେନେରାଲ ପିତାମ୍ବର ଆଚାର୍ଯ୍ୟ, ଓଡ଼ିଶା ଓ ଛତିଶଗଡ଼ ମଧ୍ୟରେ ମୁଖ୍ୟମନ୍ତ୍ରୀ କିମ୍ବା ସଚିବ ସ୍ତରରେ ଏହି ବିବାଦର ଆଲୋଚନା କରାଯିବାକୁ ପ୍ରସ୍ତାବ ଦେଇଛନ୍ତି । ଏହା ଉପରେ ଛତିଶଗଡ଼ ସରକାରଙ୍କ ଓକିଲ କୌଣସି ପ୍ରତିକ୍ରିୟା ଦେଇନଥିଲେ ।
ସୂତ୍ରରୁ ଜଣାପଡ଼ିଛି ଯେ, ଏ ନେଇ ଛତିଶଗଡ ସରକାରଙ୍କୁ ସେ ଓଡ଼ିଶାର ଆଭିମୁଖ୍ୟ ଜଣାଇବେ । ଓଡ଼ିଶାର ବିଜେପି ସରକାରଙ୍କ ଆଭିମୁଖ୍ୟ ହେଉଛି ବିଚାର ବିଭାଗ ଜରିଆରେ ବିବାଦର ସମାଧାନ ହେବା ଜଟିଳ ହେବ । କେନ୍ଦ୍ର ଓ ଉଭୟ ରାଜ୍ୟରେ ବିଜେପି ସରକାର ଥିବାରୁ ଆଲୋଚନାରେ ସମାଧାନ ସହଜ ହେବ । ମହାନଦୀ ଜଳ ବିବାଦ ଟ୍ରିବ୍ୟୁନାଲର ବର୍ତ୍ତମାନର ଅଧ୍ୟକ୍ଷା ବିଚାରପତି ବେଲା ଏମ୍.ତ୍ରିବେଦୀ କାର୍ଯ୍ୟ ଭାର ଗ୍ରହଣ କରିବା ପରେ ଶନିବାର ଥିଲା ପ୍ରଥମ ବୈଠକ । ପାଖାପାଖି ୨ ଘଣ୍ଟାରୁ ଅଧିକ ସମୟ ଧରି ଏହି ବିବାଦ ସମ୍ବନ୍ଧରେ ତାଙ୍କୁ ଅବଗତ କରାଯାଇଥିଲା । ଶ୍ରୀ ଆଚାର୍ଯ୍ୟ ମୌସୁମୀ ଓ ଅଣ ମୌସୁମୀ ସମୟରେ ମହାନଦୀ ଅବବାହିକା ଅଞ୍ଚଳର ସ୍ଥିତି ଅନୁଧ୍ୟାନ କରିବା ଲାଗି ଟ୍ରିବ୍ୟୁନାଲର ଅଧ୍ୟକ୍ଷାଙ୍କୁ ଆମନ୍ତ୍ରଣ କରିଥିଲେ । ଓଡ଼ିଶା ସରକାରଙ୍କ ନୂଆ ଆଭିମୁଖ୍ୟ ଜାଣିବା ପରେ ଛତିଶଗଡ଼ ସରକାର ତାଙ୍କ ମତାମତ ଟ୍ରିବ୍ୟୁନାଲକୁ ଜଣାଇବେ । ଏହାପରେ ପରବର୍ତ୍ତୀ ପଦକ୍ଷେପ ସମ୍ବନ୍ଧରେ ନିଷ୍ପତ୍ତି ନିଆଯିବ ବୋଲି ଜଣାପଡିଛି । ପୂର୍ବର ଅଧ୍ୟକ୍ଷ ଏ ଏମ୍ ଖାନୱିଲକରଙ୍କ ସମୟରେ ମହାନଦୀ ଜଳବିବାଦ ନେଇ ସାକ୍ଷ୍ୟ ଗ୍ରହଣ ଆରମ୍ଭ ହୋଇଥିଲା ।
