ଭୁବନେଶ୍ଵର, ୨୮/୦୧ : ରାଜଧାନୀରେ ମାତିଛନ୍ତି ଲୁଟେରା। ଥମୁନି ଲୁଟ୍ ଛିନତାଇ ଘଟଣା। ଚୋରଙ୍କୁ କାବୁ କରିବାରେ ଫେଲ୍ କମିଶନରେଟ୍ ପୋଲିସ। ଭିଆଇପି କଲୋନୀରେ ପୁଣି ପଶିଲା ଚୋର। ନୟାପଲ୍ଲୀ N2ରେ ଲୁଟ୍ ଉଦ୍ୟମ ହୋଇଛି। ସ୍ଥାନୀୟ ଲୋକେ ଏବଂ ପିସିଆର୍ ମିଶି ଚୋରକୁ କାବୁ କରିଛନ୍ତି। ନୟାପଲ୍ଲୀ ଥାନା ପୋଲିସ ଅଭିଯୁକ୍ତକୁ ଅଟକ ରଖି ପଚରାଉଚରା କରୁଛି।
ସୂଚନାନୁଯାୟୀ, ସୋମବାର ବିଳମ୍ଵିତ ରାତିରେ ନୟାପଲ୍ଲୀ N2ରେ ଭିଆଇପି କଲୋନୀରେ ଚୋରି ଉଦ୍ୟମ ହୋଇଛି। ଏକାଧିକ ଡୁପ୍ଲେକ୍ସ କ୍ୟାମ୍ପସରେ ପଶି ଜଣେ ଯୁବକ ଚୋରି ଉଦ୍ୟମ କରୁଥିଲା। ସୁରକ୍ଷା କର୍ମୀ, ଘର ମାଲିକାଣୀ ଓ ସ୍ଥାନୀୟ ଲୋକେ ଚୋରକୁ ଦେଖି ପାଟି କରିବାରୁ ସେ ଏକ ନଡ଼ିଆ ଗଛରେ ଚଢି ଯାଇଥିଲା। ବିଲ୍ଡିଂ ରୁ ବିଲ୍ଡିଂ ଦେଇ ଖସିଯିବା ବେଳେ ପିସିଆର୍ ଭ୍ୟାନ୍ ଚୋରକୁ ପିଛା କରିଥିଲା। ଉଭୟ ପିସିଆର ଓ ସ୍ଥାନୀୟ ଲୋକେ ମିଶି ଚୋରକୁ କାବୁ କରିଥିଲେ। ଖବର ପାଇ ଘଟଣାସ୍ଥଳରେ ଟ୍ଵିନ୍ ସିଟି ପୋଲିସ କମିଶନର, ଭୁବନେଶ୍ଵର ଡିସିପି, ସ୍ପେଶଲ୍ ସ୍କ୍ୱାର୍ଡ, ଜୋନ-୫ ଏସିପି, ନୟାପଲ୍ଲୀ ଥାନା ଅଧିକାରୀ ପହଞ୍ଚିଥିଲେ। ତେବେ ନୟାପଲ୍ଲୀ ଥାନା ପୋଲିସ ଚୋରକୁ ଅଟକ ରଖି ପଚରାଉଚରା କରୁଛି।
ଏହି ଖବରଟିକୁ ପଢନ୍ତୁ-ବେଳାମାର୍ଗରେ କାର୍କୁ ଧକ୍କା ଦେଲା ହାଇୱା, ହୁତୁହୁତୁ ହୋଇ ଜଳିଗଲା କାର୍
ଗତ ୨୫ ତାରିଖ ବିଳମ୍ବିତ ରାତିରେ N2ରେ ରହୁଥିବା ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରୁ ଲୁଟ୍ ହୋଇଥିଲା। ଏବେ ସେହି ଗଳିରେ ଆଉ ଏକ ଘଟଣା ସ୍ଥାନୀୟ ଲୋକଙ୍କ ମନରେ ଭୟ ସୃଷ୍ଟି କରିଛି।
