ଭୁବନେଶ୍ୱର ୨୭/୦୧: ବ୍ରହ୍ମପୁର ସହରରେ ଆତଙ୍କ ଖେଳାଇଲେ ଦୁର୍ବୃତ୍ତ। ବିଳମ୍ବିତ ରାତିରେ ବୁଲାଇଲେ ଖଣ୍ଡା। ବିଜୁପୁର କାଳୀ ମନ୍ଦିର ନିକଟରେ ଦୁଇ ଯୁବକଙ୍କୁ ଗୋଡାଇ ଗୋଡାଇ ହାଣିଲେ। ଏତିକିରେ ରାଗ ଶାନ୍ତ ହେଲାନି ଗଲା ବେଳେକୁ ବନ୍ଧୁକରୁ ବ୍ଲାଙ୍କ ଫାଇରିଂ କରି ଘଟଣାସ୍ଥଳରୁ ଫେରାର ହୋଇଗଲେ ୧୫ରୁ ଅଧିକ ଯୁବକ। ପୂର୍ବ ଶତ୍ରୁତାରୁ ଏଭଳି କାଣ୍ଡ ଭିଆଇଥିବା ସନ୍ଦେହ କରାଯାଉଛି। ଦୁଇ ଯୁବକଙ୍କୁ ରକ୍ତାକ୍ତ ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଚିକିତ୍ସା ଜାରି ରହିଛି।
ସୂଚନା ମୁତାବିକ, ରବିବାର ବିଳମ୍ବିତ ରାତିରେ ବିଜୁପୁର କାଳୀ ମନ୍ଦିର ନିକଟରେ ସୁଜନ ଓ ତାଙ୍କର ଜଣେ ସାଙ୍ଗ କୌଣସି କାମରେ ଯାଉଥିଲେ । ଏହି ସମୟରେ ୧୫ରୁ ଅଧିକ ଯୁବକ ବାଇକ୍ ଏବଂ ସ୍କୁଟିରେ ଆସି ଖଣ୍ଡାରେ ଅତର୍କିତ ଆକ୍ରମଣ କରିଥିଲେ । ରାସ୍ତାରେ ଗୋଡାଇ ଗୋଡାଇ ଯୁବକଙ୍କୁ ହାଣିବାରେ ଲାଗିଥିଲେ ଦୁର୍ବୃତ୍ତମାନେ। ତେବେ ଏହି ଆକ୍ରମଣରେ ଜଣେ ଯୁବକଙ୍କ ହାତ,ମୁଣ୍ଡ, ଶରୀର ବିଭିନ୍ନ ଅଂଶ ଖଣ୍ଡା ଚୋଟ ବାଜିଥିଲା। ଯୁବକଙ୍କ ଜଣକ ରକ୍ତାକ୍ତ ଅବସ୍ଥାରେ ରାସ୍ତାରେ ପଡି ରହି ଚିତ୍କାର କରିଥିଲେ। ସେପଟେ ଦୁର୍ବୃତ୍ତମାନେ ଘଟଣାସ୍ଥଳରେ ବ୍ଲାଙ୍କ ଫାଇରିଂ କରି ଚମ୍ପଟ୍ ମାରିଥିଲେ। କିନ୍ତୁ ଗୁଳି କାହାକୁ ବାଜି ନଥିବା ସୂଚନା ମିଳିଛି। ଗୁରୁତର ଯୁବକଙ୍କୁ ଉଦ୍ଧାର କରାଯାଇ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ଘଟଣା ସଂପର୍କରେ ଖବର ପାଇ ସ୍ଥାନୀୟ ପୋଲିସ ତଦନ୍ତ ଆରମ୍ଭ କରିଥିବା ଜଣାପଡିଛି।
