ଗଞ୍ଜାମ,୦୬/୧୨: ମହାରଣା କୋଲନିରେ ଅଗ୍ନିକାଣ୍ଡ । ୩୩ କେଭିର ପାୱାରର ସହ ଏଲଟି ଲାଇନର ତ୍ରୁଟି ପୂର୍ଣ୍ଣ ସଂଯୋଗ ପାଇଁ ହଠାତ୍ ଜଳି ଯାଇଥିଲା ଘରର ମିଟର ବକ୍ସ । ପରେ ଘରର ଟିଭି, ଏସି, ଫ୍ରିଜ୍ ପରି ଅନେକ ଇଲେକ୍ଟ୍ରୋନିକ ଲରଞ୍ଜାମ ଜଳି ଯାଇଥିଲା । କଲୋନି ବାସୀ ଏହି ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛନ୍ତି । ଗଞ୍ଜାମ ଜିଲ୍ଲା ଆସିକା କଲେଜଛକ ସ୍ଥିତ ଗ୍ରିଡ ସବ ଷ୍ଟେସନ ସାମ୍ନା ମହାରଣା କୋଲନିରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଶୁକ୍ରବାର ସକାଳ ୮ ଟା ରେ ହଠାତ୍ କଲୋନିର ଘର ଗୁଡିକରେ ମିଟର ବୋର୍ଡ ପାଖରେ ବିସ୍ଫୋରଣ ହୋଇଥିଲା । ଏହା ସହ ଇଲେକ୍ଟ୍ରୋନିକ ସରଞ୍ଜାମ ଗୁଡିକରେ ମଧ୍ୟ ନିଆଁ ଲାଗି ଯାଇଥିଲା । ଫଳରେ ୮ରୁ ଉର୍ଦ୍ଧ୍ବ ଘରର ଲକ୍ଷାଧିକ ଟଙ୍କାର ଇଲେକ୍ଟ୍ରୋନିକ ସରଞ୍ଜାମ ପୋଡ଼ି ନଷ୍ଟ ହୋଇଯାଇଥିବା ବେଳେ ଅଳ୍ପକେ ବର୍ତ୍ତିଥିଲେ କଲୋନି ବାସୀ । ଏହି ଦୁର୍ଘଟଣାରେ ଅନେକ ଲୋକ ଓ ଛୋଟ ଛୋଟ ପିଲାଙ୍କୁ ବିଦ୍ୟୁତ୍ ଆଘାତ ଲାଗିଥିବା ମଧ୍ୟ ଜଣା ପଡ଼ିଛି । ତେବେ ବିଭିନ୍ନ ସମୟରେ ବିଦ୍ୟୁତ୍ ବିଭାଗର ଅବହେଳା କାରଣରୁ ଏସବୁ ଘଟୁଥିବା ଲୋକେ କହିଛନ୍ତି । ଅପର ପକ୍ଷରେ ବିଦ୍ୟୁତ୍ ବିଭାଗର ନୂଆଁଗାଁ ବିଭାଗୀୟ ସେସ୍କନ ଏସଡିଓ କହିଛନ୍ତି ଯେ, ମରାମତି କାମ ସହ ଏହି ଘଟଣାର ତଦନ୍ତ ଚାଲିଛି । ତଦନ୍ତ ପରେ ହିଁ ଘଟଣା ପଛର ପ୍ରକୃତ କାରଣ ଜଣାପଡ଼ିବ ବୋଲି ସେ କହିଛନ୍ତି ।
