ରାଞ୍ଚି: ଝାଡ଼ଖଣ୍ଡର ସାହେବଗଞ୍ଜ ଜିଲ୍ଲାରେ ମଙ୍ଗଳବାର ଏକ ଭୟଙ୍କର ରେଳ ଦୁର୍ଘଟଣା ହୋଇଥିଲା। ଭୋର ସମୟରେ ଦୁଇଟି ମାଲବାହୀ ଟ୍ରେନ ମଧ୍ୟରେ ଧକ୍କା ହୋଇଥିଲା । ଏହି ଦୁର୍ଘଟଣାରେ ଦୁଇ ଜଣ ଲୋକୋ ପାଇଲଟଙ୍କ ମୃତ୍ୟୁ ହୋଇଛି । ଏକ ଖାଲି ମାଲବାହୀ ଟ୍ରେନ୍ କୋଇଲା ବୋଝେଇ ଟ୍ରେନ୍ ସହିତ ଧକ୍କା ହୋଇଥିଲା। ଏହି କାରଣରୁ ମାଲବାହୀ ଟ୍ରେନ୍ର ଇଞ୍ଜିନରେ ନିଆଁ ଲାଗିଯାଇଥିଲା। ଏବେ ଏହି ଦୁର୍ଘଟଣା ସହିତ ଜଡିତ ଏକ ଯନ୍ତ୍ରଣାଦାୟକ କଥା ସାମ୍ନାକୁ ଆସିଛି । ପ୍ରକୃତରେ, ସାହେବଗଞ୍ଜ ରେଳ ଦୁର୍ଘଟଣାରେ ମୃତ୍ୟୁବରଣ କରିଥିବା ଲୋକୋ ପାଇଲଟଙ୍କ ମଧ୍ୟରୁ ଜଣେ ସୋମବାର ଅବସର ନେବାର ଥିଲା ।
ଝାଡ଼ଖଣ୍ଡର ସାହେବଗଞ୍ଜରେ ଦୁଇଟି ମାଲବାହୀ ଟ୍ରେନ ମଧ୍ୟରେ ଧକ୍କା ହେବା ଫଳରେ ଲୋକୋ ପାଇଲଟ ଗଙ୍ଗେଶ୍ୱର ମଲଙ୍କ ମୃତ୍ୟୁ ହୋଇଛି। ସେ ଏପ୍ରିଲ ୧ ତାରିଖରେ ଚାକିରିରୁ ଅବସର ନେଇଥାନ୍ତେ ଏବଂ ଚାକିରିରେ ଥିବା ସମୟରେ ଏହା ତାଙ୍କର ଶେଷ ଯାତ୍ରା ଥିଲା। ସୂଚନା ଅନୁଯାୟୀ, ଲୋକୋ ପାଇଲଟଙ୍କ ଅବସର ଦିନ ତାଙ୍କ ସମ୍ପୂର୍ଣ୍ଣ ପରିବାର ଏକାଠି ରାତ୍ରୀଭୋଜନ କରିବାକୁ ଯୋଜନା କରିଥିଲେ । କିନ୍ତୁ ନିମିଷକରେ ସବୁ କିଛି ବଦଳାଗଲା । ସମସ୍ତଙ୍କୁ ପର କରି ଆରପାରିକୁ ଚାଲିଗଲେ ଗଙ୍ଗେଶ୍ୱର ।
ମୃତ ଲୋକୋ ପାଇଲଟ୍ ଗଙ୍ଗେଶ୍ୱର ମଲଙ୍କ ପରିବାର ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲାର ଜିଆଗଞ୍ଜରେ ରୁହନ୍ତି। ପରିବାର ଲୋକଙ୍କ କହିବା ଅନୁଯାୟୀ, କାମରୁ ଫେରିବା ପରେ ଏକାଠି ରାତ୍ରୀଭୋଜନ କରିବେ ବୋଲି ପ୍ରତିଶ୍ରୁତି ଦେଇଥିଲେ ଗଙ୍ଗେଶ୍ୱର । ଲୋକୋ ପାଇଲଟଙ୍କ ଝିଅ କହିଛନ୍ତି, ‘ଏପ୍ରିଲ ୧ ତାଙ୍କ ବାପାଙ୍କ ଶେଷ କାର୍ଯ୍ୟ ଦିବସ ଥିଲା। ସେ ତାଙ୍କ ସ୍ତ୍ରୀ, ପୁଅ ଏବଂ ଝିଅଙ୍କ ସହିତ ଭଲ ସମୟ ବିତାଇବାକୁ ଯୋଜନା କରିଥିଲେ।’ ସେ କହିଛନ୍ତି , ଆମେ ଶୁଣିଲୁ ଯେ ବାବା (ବାପା) ଫେରିବା ସମୟରେ ସିଗନାଲ ପଏଣ୍ଟରେ ଅପେକ୍ଷା କରିଥିଲେ, ବିପରୀତ ଦିଗରୁ ଆସୁଥିବା ଅନ୍ୟ ଏକ ମାଲବାହୀ ଟ୍ରେନର ଇଞ୍ଜିନ ସାମ୍ନାରୁ ତାଙ୍କ ଇଞ୍ଜିନକୁ ଧକ୍କା ଦେଇଥିଲା।
ସୂଚନା ଅନୁଯାୟୀ, ମଙ୍ଗଳବାର ଭୋର ପ୍ରାୟ ୩ଟା ସମୟରେ ସାହେବଗଞ୍ଜର ବରହେଟ ଥାନା ଅନ୍ତର୍ଗତ ଭୋଗନାଡିହ ନିକଟରେ ଦୁଇଟି ମାଲବାହୀ ଟ୍ରେନ୍ ଧକ୍କା ହୋଇଥିଲା । ମୁହାଁମୁହିଁ ଧକ୍କାରେ ଉଭୟ ମାଲବାହୀ ଟ୍ରେନର ଲୋକୋ ପାଇଲଟଙ୍କ ମୃତ୍ୟୁ ହୋଇଛି । ପୂର୍ବ ରେଳବାଇର ମୁଖପାତ୍ର କୌଶିକ ମିତ୍ର କହିଛନ୍ତି, ‘ଏହି ଘଟଣା NTPCର ଭିତ୍ତିଭୂମି ସହିତ ଜଡିତ । ମାଲବାହୀ ଟ୍ରେନ୍ ଏବଂ ଟ୍ରାକ୍ NTPCର । ଏହାର ଭାରତୀୟ ରେଳବାଇ ସହିତ କୌଣସି ସମ୍ପର୍କ ନାହିଁ।’
