ମାଲକାନଗିରି, ୨୪।୫ (ଆପ୍ର): ନାବାଳିକାକୁ ଅପହରଣ ଓ ଦୁଷ୍କର୍ମ ମାମଲାର ବିଚାର କରି ମାଲକାନଗିରି ଅତିରିକ୍ତ ଜିଲ୍ଲା ଦୌରା ଜଜ ଶାନ୍ତୁନୁ କୁମାର ଦାସ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି।
ମାଲକାନଗିରି ଜିଲ୍ଲାର ଏମଭି ନମ୍ବର ଥିବା ଗ୍ରାମର ଜନୈକା ନାବାଳିକାକୁ ଉମରକୋଟ ଥାନା ଅନ୍ତର୍ଗତ ଇନ୍ଦ୍ରପୁରୀ ଗ୍ରାମର ୟାଦବ ଗାଇନ(୨୭) ଗତ ୧୬.୬.୨୦୧୯ରେ ଅପହରଣ କରି ନେଇଥିଲା। ପରିବାର ଲୋକେ ଝିଅକୁ ବହୁତ ଖୋଜାଖୋଜି କରିଥିଲେ ମଧ୍ୟ କୌଣସି ଠିକଣା ମିଳିନଥିଲା। ପରେ ୧୯.୬.୨୦୧୯ରେ ମାଲକାନଗିରି ଥାନାରେ ବାପା ପୀଡିତା ଝିଅ ନିଖୋଜ ନେଇ ଏତଲା ଦାୟର କରିଥିଲେ। ଏତଲାକୁ ଭିତ୍ତି କରି ପୁଲିସ ତଦନ୍ତ ଆରମ୍ଭ କରିଥିଲା। ତଦନ୍ତରେ ଜଣାପଡିଥିଲା ଯେ ଝିଅଟିକୁ ଉମରକୋଟ ଅଂଚଳର କେହି ଅପହରଣ କରି ନେଇଛି। ଜଗଦଲପୁରର ଏକ ଭଡା ଘରୁ ଝିଅଟିକୁ ଉଦ୍ଧାର କରିଥିଲେ। ବିବାହର ପ୍ରଲୋଭନ ଦେଖାଇ ଝିଅକୁ ଅଭିଯୁକ୍ତ ୟାଦବ ବାରମ୍ବାର ଦୁଷ୍କର୍ମ କରିଥିଲା। ପରେ ଝିଅର ଡାକ୍ତରୀମାଇନା କରି ଅଭିଯୁକ୍ତ ନାମରେ କେଶ ଦାୟର କରାଯାଇ ଗିରଫ କରାଯାଇଥିଲା। ମାଲକାନଗିରି ଅତିରିକ୍ତ ଜିଲ୍ଲା ଦୌରା ଜଜ ଶାନ୍ତୁନୁ କୁମାର ଦାସ ସମସ୍ତ ସାକ୍ଷ ପ୍ରମାଣକୁ ଭିତ୍ତି କରି ଅଭିଯୁକ୍ତ ୟାଦବକୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏହି କେଶକୁ ସରକାରଙ୍କ ତରଫରୁ ସ୍ପେଶାଲ ପିପି ଲମ୍ବୋଦର ତୁରୁକୁ ପରିଚାଳନା କରୁଥିଲେ।
