୨୦୩୬ ସୁଦ୍ଧା ଏକ ବିକଶିତ ଓଡ଼ିଶା ଗଢ଼ିବାକୁ ଏବଂ ୨୦୪୭ ସୁଦ୍ଧା ଭାରତ ପାଇଁ ଆମର ଆକାଂକ୍ଷା ପୂରଣ କରିବାକୁ, ଆମକୁ ଆମ ମହିଳାମାନଙ୍କର ଆର୍ଥିକ ଭିତ୍ତିକୁ ନିରନ୍ତର ସୁଦୃଢ଼ କରିବାକୁ ପଡ଼ିବ । ଆମେ ନିଜର ପହଞ୍ଚକୁ ବିସ୍ତାର କରିବା, ଆମର ପ୍ରୟାସକୁ ବୃଦ୍ଧି କରିବା ଏବଂ ଓଡ଼ିଶାର କୌଣସି ମହିଳା ଯେପରି ପଛରେ ଛାଡ଼ି ନହେବେ ତାହା ସୁନିଶ୍ଚିତ କରିବା ପାଇଁ ଦୃଢ଼ ସଂକଳ୍ପବଦ୍ଧ ।
ମହିଳା ସଶକ୍ତିକରଣ କେବଳ ଏକ ନୀତିଗତ ପ୍ରସଙ୍ଗ କିମ୍ବା ରାଜନୈତିକ ଆଭିମୁଖ୍ୟ ନୁହେଁ, ଏହା ଏକ ସମୃଦ୍ଧ ସମାଜର ମୂଳଦୁଆ । ଭାରତର ଯଶସ୍ୱୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଙ୍କ ପ୍ରେରଣାଦାୟୀ ମାର୍ଗଦର୍ଶନ ଓ ଓଡ଼ିଶାର ଲୋକପ୍ରିୟ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱରେ ଆମେ ‘ଲକ୍ଷପତି ଦିଦି' ନାମରେ ଏକ ଅଭିନବ ଓ ପ୍ରଭାବଶାଳୀ ଅଭିଯାନ ମାଧ୍ୟମରେ ମହିଳାମାନଙ୍କର ସାମାଜିକ ତଥା ଅର୍ଥନୈତିକ ସ୍ଥିତିକୁ ସୁଦୃଢ଼ କରିବା ଦିଗରେ ଏକ ଯୁଗାନ୍ତକାରୀ ପଦକ୍ଷେପ ଆରମ୍ଭ କରିଛୁ ।
ଯେବେ ମୁଁ ମହିଳା ସଶକ୍ତିକରଣର ବିକାଶ ପଥ ଉପରେ ଦୃଷ୍ଟିପାତ କରେ, ରାଜ୍ୟର କୋଣ ଅନୁକୋଣରେ ସାକ୍ଷାତ ହୋଇଥିବା ମହିଳାମାନଙ୍କ କଥା ମୋ ସ୍ମୃତିପଟଳରେ ଜୀବନ୍ତ ହୋଇଉଠେ, ଯେଉଁ ମହିଳାମାନେ ଏକଦା କେବଳ ଆର୍ଥିକ ସ୍ୱାଧୀନତା ପାଇବା ନିମନ୍ତେ ସଂଘର୍ଷ କରୁଥିଲେ, ଆଜି ସେମାନେ ସଫଳ ଉଦ୍ୟୋଗର ନେତୃତ୍ୱ ନେଉଛନ୍ତି ।
ଆମ ସରକାରଙ୍କ ଲକ୍ଷ୍ୟଭିତ୍ତିକ ପ୍ରୟାସ ନିରନ୍ତର ଭାବେ ପ୍ରତ୍ୟେକ ମହିଳାଙ୍କ ଅନ୍ତର୍ନିହିତ ସାମର୍ଥ୍ୟକୁ ଜାଗ୍ରତ କରିବା ଦିଗରେ ଉଦ୍ୟମରତ, ଯଦ୍ଦ୍ୱାରା ସେମାନେ ଓଡ଼ିଶାର ବିକାଶ କାହାଣୀରେ ଅଗ୍ରଣୀ ଭୂମିକା ନିର୍ବାହ କରିପାରିବେ । ଗଭୀର ଦାୟିତ୍ୱବୋଧ ସହିତ ଆମେ ୨୦୨୭ ସୁଦ୍ଧା ଓଡ଼ିଶାରେ ୨୫ଲକ୍ଷ ଲକ୍ଷପତି ଦିଦି ସୃଷ୍ଟି କରିବାର ଲକ୍ଷ୍ୟ ଦିଗରେ ଅଗ୍ରସର ହେଉଛୁ । ଏହି ଦୂରଦର୍ଶୀ ପରିକଳ୍ପନା ଆମ ରାଜ୍ୟର ବିକାଶ ଯାତ୍ରାକୁ ନୂତନ ଦିଗନ୍ତ ପ୍ରଦାନ କରୁଛି ଏବଂ ଆଗାମୀ ପିଢ଼ି ପାଇଁ ସମୃଦ୍ଧି ଓ ସମାନତାର ମାର୍ଗ ପ୍ରଶସ୍ତ କରୁଛି । ଆଜି ସୁଦ୍ଧା ଓଡ଼ିଶାରେ ମୋଟ୍ ୮ଲକ୍ଷରୁ ଅଧିକ ଲକ୍ଷପତି ଦିଦି ସୃଷ୍ଟି କରାଯାଇଛି, ଯେଉଁଥିରେ ଆକାଂକ୍ଷୀ ଏବଂ ଆଦିବାସୀ ଜିଲ୍ଲାରେ ୧ଲକ୍ଷ ୬୬ହଜାରରୁ ଅଧିକ ଜଣ ଲକ୍ଷପତି ଦିଦି ଅଛନ୍ତି ।
ମିଶନ ଶକ୍ତି ସହାୟତାରେ, ଓଡ଼ିଶା ଜୀବିକା ମିଶନ (ଓଏଲଏମ) ଏହି ଉଲ୍ଲେଖନୀୟ ପଦକ୍ଷେପକୁ କାର୍ଯ୍ୟକାରୀ କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛି । ମହିଳାମାନଙ୍କ ଆର୍ଥିକ ସଶକ୍ତିକରଣ ପ୍ରତି ଆମର ଦୃଷ୍ଟିକୋଣ କେବଳ ଆର୍ଥିକ ସହାୟତା ନୁହେଁ ବରଂ ବ୍ୟାପକ ତାଲିମ, ଦକ୍ଷତା ବୃଦ୍ଧି, ଆର୍ଥିକ ସାକ୍ଷରତା ଏବଂ ବଜାର ସଂଯୋଗକୁ ମଧ୍ୟ ଅନ୍ତର୍ଭୁକ୍ତ କରେ । ଆମେ ଏକ ପରିବେଶ ସୃଷ୍ଟି କରିଛୁ ଯାହା ପ୍ରତ୍ୟେକ ମହିଳାଙ୍କୁ ତାଙ୍କ ଉଦ୍ୟୋଗୀ ଯାତ୍ରାର ପ୍ରାରମ୍ଭିକ ପର୍ଯ୍ୟାୟରୁ ଆରମ୍ଭ କରି ତାଙ୍କ ଉଦ୍ୟୋଗର ବିପଣନ ଏବଂ ବିସ୍ତାର ପର୍ଯ୍ୟନ୍ତ ସମର୍ଥନ ଯୋଗାଇବା ସୁନିଶ୍ଚିତ କରିବ ।
ଲକ୍ଷପତି ଦିଦି ଅଭିଯାନରେ ଇତିମଧ୍ୟରେ ଓଡ଼ିଶାରେ ୮ଲକ୍ଷରୁ ଅଧିକ ମହିଳା ଉଦ୍ୟୋଗୀଙ୍କ ଜୀବନକୁ ପରିବର୍ତ୍ତନ କରିଛି, ଯାହାକି ଅତ୍ୟନ୍ତ ସ୍ୱଳ୍ପ ସମୟ ମଧ୍ୟରେ ହାସଲ କରାଯାଇଥିବା ଏକ ଉଲ୍ଲେଖନୀୟ ମାଇଲଖୁଣ୍ଟ । ଏହି ସଫଳତା କେବଳ ସଂଖ୍ୟାରେ ସୀମିତ ନୁହେଁ, ବରଂ ଆମର ଗ୍ରାମୀଣ ମହିଳାମାନଙ୍କ ମଧ୍ୟରେ, ବିଶେଷକରି ଦୂରବର୍ତ୍ତୀ ଏବଂ ଆଦିବାସୀ ଅଞ୍ଚଳର ମହିଳାମାନଙ୍କ ମଧ୍ୟରେ ଥିବା ଦୃଢ଼ ସଂକଳ୍ପ ଏବଂ ପ୍ରତିଭାର ଏକ ପ୍ରମାଣ । ପ୍ରତ୍ୟେକ କାହାଣୀ, ପ୍ରତ୍ୟେକ ସଫଳତା, ପ୍ରତ୍ୟେକ ପରିବର୍ତ୍ତିତ ପରିବାର ଆଶାର ଏକ ଆଲାକବର୍ତ୍ତିକା, ଯାହା ଏକ ଆତ୍ମନିର୍ଭରଶୀଳ ଏବଂ ଆର୍ଥିକ ଭାବରେ ସମୃଦ୍ଧ ତଥା ବିକଶିତ ଓଡ଼ିଶା ଅଭିମୁଖେ ପଥ ଆଲୋକିତ କରୁଛି ।
ଏକ ଉଲ୍ଲେଖନୀୟ ସଫଳତାରେ, ଓଡ଼ିଶା ଲକ୍ଷପତି ଦିଦି ଅଭିଯାନକୁ ସଫଳତାର ସହ କାର୍ଯ୍ୟକାରୀ କରି ଦେଶବ୍ୟାପୀ ଦ୍ୱିତୀୟ ସ୍ଥାନ ହାସଲ କରିଛି, ଯାହା ମହିଳାମାନଙ୍କୁ ବାର୍ଷିକ ଅତି କମ୍ରେ ୧ଲକ୍ଷ ଟଙ୍କା ରାଜଗାର କରିବାକୁ ସକ୍ଷମ କରୁଛି । ଏହି ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ମହିଳାମାନଙ୍କର, ବିଶେଷକରି ଗ୍ରାମୀଣ, ଆଦିବାସୀ ଏବଂ ଆକାଂକ୍ଷୀ ଅଞ୍ଚଳରେ, ସାମାଜିକ ତଥା ଅର୍ଥନୈତିକ ସ୍ଥିତିକୁ ସୁଦୃଢ଼ କରିବା ପ୍ରତି ରାଜ୍ୟର ଅଟଳ ପ୍ରତିବଦ୍ଧତାକୁ ଦର୍ଶାଏ । କେବଳ ୨୦୨୪-୨୫ ବର୍ଷ ମଧ୍ୟରେ ଓଡିଶା ୧୬.୧୯ଲକ୍ଷ ଲକ୍ଷପତି ଦିଦି ସୃଷ୍ଟି କରିବାକୁ ଲକ୍ଷ୍ୟ ରଖିଥିଲା, ଯାହା ୧୭.୪୭ଲକ୍ଷ ସମ୍ଭାବ୍ୟ ଲକ୍ଷପତି ଦିଦି (ପିଏଲଡି) ଚିହ୍ନଟ କରି ସମସ୍ତ ନିର୍ଦ୍ଧାରିତ ଲକ୍ଷ୍ୟକୁ ଅତିକ୍ରମ କରିଛି । ଏହି ଲକ୍ଷ୍ୟର ପ୍ରଭାବଶାଳୀ ସଫଳତା ସୁନିଶ୍ଚିତ କରିବା ପାଇଁ, ଆଞ୍ଚଳିକ ପ୍ରଶିକ୍ଷଣ କାର୍ଯ୍ୟକ୍ରମ ଏବଂ ବ୍ୟବସାୟ ବିକାଶ ଯୋଜନା (ବିଡିପି) ରାଜ୍ୟବ୍ୟାପୀ କାର୍ଯ୍ୟକାରୀ କରାଯାଇଛି, ଯେଉଁଥିରେ ୧୬.୪୪ଲକ୍ଷ ସମ୍ଭାବ୍ୟ ଲକ୍ଷପତି ଦିଦି ପିଏଲଡି ପ୍ରଶିକ୍ଷିତ ହୋଇଛନ୍ତି ଏବଂ ୧୧ଲକ୍ଷ ବ୍ୟବସାୟ ବିକାଶ ଯୋଜନା ବିଡିପି ପ୍ରସ୍ତୁତ କରାଯାଇଛି ।
ଏହି ଅଭିଯାନକୁ ସୁଚାରୁ ଏବଂ ପ୍ରଭାବଶାଳୀ ଭାବରେ ପର୍ଯ୍ୟବେକ୍ଷଣ କରିବା ପାଇଁ, ରାଜ୍ୟ ଏବଂ ଜିଲ୍ଲାସ୍ତରରେ ଷ୍ଟିଅରିଂ କମିଟି ପ୍ରତିଷ୍ଠା କରାଯାଇଛି । ଏହି ଅଭିଯାନକୁ ଆହୁରି ସୁଦୃଢ଼ କରିବାପାଇଁ କମ୍ୟୁନିଟି ସପୋର୍ଟ ଷ୍ଟାଫ୍ (ସିଏସଏସ), ଷ୍ଟିଅରିଂ କମିଟି ସଦସ୍ୟ ଏବଂ ବିଭିନ୍ନ ବିଭାଗର ଅଧିକାରୀମାନଙ୍କୁ ନେଇ ଜିଲ୍ଲାସ୍ତରୀୟ କର୍ମଶାଳା ଆୟୋଜନ କରାଯାଇଛି, ଯାହା ସୁସଂଗତ ଏବଂ ପ୍ରଭାବଶାଳୀ କାର୍ଯ୍ୟାନ୍ୱୟନ ସୁନିଶ୍ଚିତ କରିବ।
ସରକାରଙ୍କ ଏକ ଅଗ୍ରଣୀ କାର୍ଯ୍ୟକ୍ରମ "ଲକ୍ଷପତି ଦିଦି ଯୋଜନା’କୁ ଅଧିକ ସୁଦୃଢ଼ କରିବାପାଇଁ ଓଡ଼ିଶା ସରକାର "ଲକ୍ଷପତି ଦିଦି ସହାୟିକା ଯୋଜନା’ ଘୋଷଣା କରିଛନ୍ତି, ଯାହା ମାଧ୍ୟମରେ ସମସ୍ତ କମ୍ୟୁନିଟି ସପୋର୍ଟ ଷ୍ଟାଫ୍ (ସିଏସଏସ) ଲକ୍ଷପତି ଦିଦି ସୃଷ୍ଟି କରିବା ଦିଗରେ କାର୍ଯ୍ୟ କରିବେ । ଯେହେତୁ କମ୍ୟୁନିଟି ସପୋର୍ଟ ଷ୍ଟାଫ୍ (ସିଏସଏସ) ତୃଣମୂଳସ୍ତରରେ ଲକ୍ଷପତି ଦିଦି ଯୋଜନାକୁ ସଫଳ ରୂପେ କାର୍ଯ୍ୟକାରୀ କରି ଅଧିକରୁ ଅଧିକ ସଂଖ୍ୟକ ଲକ୍ଷପତି ଦିଦି ସୃଷ୍ଟି ସୁନିଶ୍ଚିତ କରିବା ପାଇଁ ସେମାନଙ୍କର କ୍ଷମତା ବୃଦ୍ଧି ଏବଂ ବୁଝାମଣା ସ୍ତରକୁ ଉନ୍ନତ କରିବା ପାଇଁ ଅଧିକ ଗୁରୁତ୍ୱ ଦିଆଯାଇଛି । ଆର୍ଥିକ ସମ୍ବଳର ଗୁରୁତ୍ୱକୁ ସ୍ୱୀକାର କରି, ରିଭଲଭିଂ ଫଣ୍ଡ (ଆର୍ଏଫ୍) ଏବଂ କମ୍ୟୁନିଟି ଇନଭେଷ୍ଟମେଣ୍ଟ ଫଣ୍ଡ (ସିଆଇଏଫ୍) ଆବଣ୍ଟନ ଯଥାକ୍ରମେ ୧୫,୦୦୦ ଟଙ୍କାରୁ ୩୦,୦୦୦ ଟଙ୍କା ଏବଂ ୩୫ଲକ୍ଷ ଟଙ୍କାରୁ ୬୦ଲକ୍ଷ ଟଙ୍କାକୁ ବୃଦ୍ଧି କରାଯାଇଛି, ଯାହା ଗୋଷ୍ଠୀଗତ ସଂସ୍ଥାଗୁଡିକୁ କାର୍ଯ୍ୟକ୍ଷମ କରାଇ ଅଧିକ ମହିଳା ଉଦ୍ୟୋଗୀମାନଙ୍କୁ ସଶକ୍ତ କରିବ ।
ଏହି ପ୍ରୟାସଗୁଡ଼ିକର ରୂପାନ୍ତରକାରୀ ପ୍ରଭାବକୁ ଦର୍ଶାଉଥିବା ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ଥିଲା ନିକଟ ଅତୀତରେ ଆୟୋଜିତ ସୁଭଦ୍ରା ଶକ୍ତି ମେଳା ୨୦୨୫ । ଏହି ମେଳା ରାଜ୍ୟର ମହିଳା ଉଦ୍ୟୋଗୀମାନଙ୍କ ପାଇଁ ଏକ ବିଶାଳ ମଞ୍ଚ ପ୍ରଦାନ କରିଥିଲା, ଯେଉଁଥିରେ ୩୦୦ରୁ ଅଧିକ ଜଣ ସ୍ୱୟଂ ସହାୟକ ଗୋଷ୍ଠୀ ଏବଂ ଉତ୍ପାଦକ ଗୋଷ୍ଠୀ(ପିଜି) ର ସଦସ୍ୟା ପ୍ରଥମ ଥର ପାଇଁ ଅଂଶଗ୍ରହଣକାରୀ ଭାବେ ସାମିଲ ଥିଲେ। ମେଳାରେ ଅଂଶଗ୍ରହଣ କରିଥିବା ସମ୍ଭାବ୍ୟ ଲକ୍ଷପତି ଦିଦିଙ୍କ ମଧ୍ୟରୁ ୧୦୦୦ ଜଣରୁ ଅଧିକ ଲକ୍ଷପତି ଦିଦିରେ ପରିଣତ ହୋଇଛନ୍ତି। ଏହି ମେଳାଗୁଡ଼ିକ କେବଳ ଆର୍ଥିକ ଅଭିବୃଦ୍ଧି ପ୍ରଦାନ କରନ୍ତି ନାହିଁ, ବରଂ ଗୁରୁତ୍ୱପୂର୍ଣ୍ଣ ବଜାର ଅଭିଜ୍ଞତା ମଧ୍ୟ ପ୍ରଦାନ କରନ୍ତି, ଯାହା ଆତ୍ମବିଶ୍ୱାସ ଏବଂ ଉଦ୍ୟମୀ ଦକ୍ଷତା ନିର୍ମାଣ କରେ ।ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କର ଦେଶବ୍ୟାପୀ ତିନି କୋଟି ଲକ୍ଷପତି ଦିଦି ସୃଷ୍ଟି କରିବା ଲକ୍ଷ୍ୟ ଆମକୁ ଏକ ସ୍ପଷ୍ଟ ମାର୍ଗଦର୍ଶିକା ଏବଂ ନିରନ୍ତର ପ୍ରେରଣା ପ୍ରଦାନ କରିଛି । ଏହା ସହ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ଅଟଳ ସମର୍ଥନ ଏବଂ ଦୂରଦର୍ଶୀ ନେତୃତ୍ୱ ପାଇଁ ମୋର ଗଭୀର କୃତଜ୍ଞତା ଜ୍ଞାପନ କରିବାକୁ ଚାହେଁ। ତାଙ୍କର ମାର୍ଗଦର୍ଶନ ନିରନ୍ତର ଭାବେ ମହିଳା ସଶକ୍ତିକରଣକୁ ଓଡ଼ିଶାର ବିକାଶ ରଣନୀତିର ଏକ ମୁଖ୍ୟ ଉପାଦାନ ଭାବରେ ପ୍ରାଥମିକତା ଦେଇଛି ।
ଆଜି ଆମେ ଦେଖୁଥିବା ସଫଳତା ଓଏଲ୍ଏମ୍ର ସମର୍ପିତ ଅଧିକାରୀମାନଙ୍କ ଦ୍ୱାରା ସମ୍ଭବ ହୋଇଛି, ଯେଉଁମାନଙ୍କର ଅକ୍ଳାନ୍ତ ପ୍ରୟାସ ନୀତିଗୁଡ଼ିକ ଏକ ନିର୍ଦ୍ଦିଷ୍ଟ ସଫଳତାରେ ପରିଣତ କରିଛି । ତଥାପି ନିଃସନ୍ଦେହରେ, ପ୍ରକୃତ ନାୟିକା ଆମର ଏସଏଚଜି ସଦସ୍ୟା ଅଟନ୍ତି । ଉଦ୍ୟୋଗ ପରିଚାଳନା କରିବାର ସେମାନଙ୍କର ସାହସ, ନୂତନ ପ୍ରଯୁକ୍ତିବିଦ୍ୟା ଏବଂ ବଜାର ସହିତ ଖାପ ଖାଇବାର କ୍ଷମତା ଏବଂ ବାଧାବିଘ୍ନ ଅତିକ୍ରମ କରିବାରେ ସେମାନଙ୍କର ଦୃଢ଼ତା ସମସ୍ତଙ୍କ ପାଇଁ ଏକ ଅନୁପ୍ରେରଣାଦାୟୀ ଉଦାହରଣ ଭାବେ କାର୍ଯ୍ୟ କରେ । ସେମାନେ କେବଳ ହିତାଧିକାରୀ ନୁହଁନ୍ତି, ସେମାନେ ଆମର ଅଗ୍ରଗତିର ସହଭାଗୀ ଅଟନ୍ତି ।
ଲକ୍ଷପତି ଦିଦିମାନଙ୍କର ଉତ୍ପାଦନ ଏବଂ ଯୋଗାଣ କ୍ଷମତା ବୃଦ୍ଧି କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପରେ, ସମ୍ଭାବ୍ୟ ଲକ୍ଷପତି ଦିଦିମାନଙ୍କର ଆର୍ଥିକ କାର୍ଯ୍ୟକଳାପକୁ ପରିଚାଳନା କରିବା ତଥା ସେମାନଙ୍କ ଉତ୍ପାଦର ଗୁଣାତ୍ମକ ମୂଲ୍ୟ ବୃଦ୍ଧିକୁ ସୁଦୃଢ଼ କରିବା, ବଜାର ପ୍ରବେଶକୁ ବିସ୍ତାର କରିବା ଏବଂ ଆର୍ଥିକ ସ୍ୱାଧୀନତାକୁ ବୃଦ୍ଧି କରିବାପାଇଁ ଏକ ସଂରଚିତ ବଜାର ସଂଯୋଗ ରଣନୀତି ଆରମ୍ଭ କରାଯାଇଛି । ଇ-କମର୍ସ ପରି ଡିଜିଟାଲ୍ ପ୍ଲାଟଫର୍ମ ମାଧ୍ୟମରେ ଲକ୍ଷପତି ଦିଦିମାନଙ୍କୁ ବ୍ୟାପକ ବଜାର ସହିତ ସଂଯୋଗ କରିବା ପାଇଁ ଲକ୍ଷ୍ୟ ରଖାଯାଇଛି । ରପ୍ତାନି ସଂଯୋଗ ସ୍ଥାପନ କରିବା ପାଇଁ, ସରକାରୀ ରପ୍ତାନି ପ୍ରୋତ୍ସାହନ ଏଜେନ୍ସି ଏବଂ ଆଇଏସ୍ଓ, ଜୈବିକ ଏବଂ ଫେୟାର ଟ୍ରେଡ ପରି ପ୍ରମାଣପତ୍ର ସହିତ ସହଭାଗିତା କ୍ଷମତା ନିର୍ମାଣ, ଭିତ୍ତିଭୂମି ବିକାଶ ଏବଂ ଜାତୀୟ ବାଣିଜ୍ୟ ମେଳାରେ ଅଂଶଗ୍ରହଣ ଆଦି ନୂତନ ଅଭିନ ଯୋଜନାମାନ ସେମାନଙ୍କୁ ଅଧିକ ଉପାର୍ଜନ ପାଇଁ ସମର୍ଥନ କରିବ । ଏହି ମହିଳା ଉଦ୍ୟୋଗୀମାନଙ୍କର ପ୍ରେରଣାଦାୟୀ କାହାଣୀ, ବିଶ୍ୱବ୍ୟାପୀ ଉପଭୋକ୍ତାଙ୍କ ସହିତ ଗଭୀର ସମ୍ପର୍କ ସୃଷ୍ଟି କରିବାକୁ ଲକ୍ଷ୍ୟ କରାଯାଇଛି ।
ମୁଁ ଜାଣି ଖୁସି ହେଲି ଯେ ରଙ୍ଗର ପର୍ବ ହୋଲି ଉତ୍ସବକୁ ପାଳନ କରିବାପାଇଁ ୫୦ରୁ ଅଧିକ ସ୍ୱୟଂ ସହାୟକ ଗୋଷ୍ଠୀର ସଦସ୍ୟମାନେ ଜୈବିକ ରଙ୍ଗ ପ୍ରସ୍ତୁତ କରି ଲକ୍ଷପତି ଦିଦି ହୋଇପାରିଛନ୍ତି । ମୁଁ ଗର୍ବିତ ଯେ ବର୍ତ୍ତମାନ ସୁଦ୍ଧା ଓଡ଼ିଶାରେ ୮ଲକ୍ଷରୁ ଅଧିକ ଲକ୍ଷପତି ଦିଦି ସୃଷ୍ଟି ହୋଇଛନ୍ତି, ଯେଉଁଥିରେ ଉଲ୍ଲେଖନୀୟ ଭାବେ ଆକାଂକ୍ଷୀ ଏବଂ ଆଦିବାସୀ ଜିଲ୍ଲାଗୁଡ଼ିକରୁ ୧,୬୬,୫୦୫ଜଣ ଅଛନ୍ତି, ଯାହା ମହିଳା ସଶକ୍ତିକରଣ ପ୍ରତି ଆମର ପ୍ରତିବଦ୍ଧତାକୁ ଦର୍ଶାଉଛି । ୨୦୨୭ ସୁଦ୍ଧା ଆମର ଲକ୍ଷ୍ୟ ହେଉଛି ୨୫ଲକ୍ଷ ଲକ୍ଷପତି ଦିଦି ସୃଷ୍ଟି କରିବା, ଯାହା ଓଡ଼ିଶାର ସାମାଜିକ-ଅର୍ଥନୈତିକ ପରିଦୃଶ୍ୟରେ ଉଲ୍ଲେଖନୀୟ ଭାବେ ଉନ୍ନତି ଆଣିବ ।
ଆମ ସରକାର ମହିଳା ସଶକ୍ତିକରଣ ପ୍ରତି ନିଜର ପ୍ରତିବଦ୍ଧତାରେ ନିଷ୍ଠାବାନ ରହିଛନ୍ତି । ଆମେ ବୁଝୁଛୁ ଯେ, ୨୦୩୬ ସୁଦ୍ଧା ଏକ ବିକଶିତ ଓଡ଼ିଶା ଗଢ଼ିବାକୁ ଏବଂ ୨୦୪୭ ସୁଦ୍ଧା ଭାରତ ପାଇଁ ଆମର ଆକାଂକ୍ଷା ପୂରଣ କରିବାକୁ, ଆମକୁ ଆମ ମହିଳାମାନଙ୍କର ଆର୍ଥିକ ଭିତ୍ତିକୁ ନିରନ୍ତର ସୁଦୃଢ଼ କରିବାକୁ ପଡ଼ିବ । ଆମେ ନିଜର ପହଞ୍ଚକୁ ବିସ୍ତାର କରିବା, ଆମର ପ୍ରୟାସକୁ ବୃଦ୍ଧି କରିବା ଏବଂ ଓଡ଼ିଶାର କୌଣସି ମହିଳା ଯେପରି ପଛରେ ଛାଡ଼ି ନହେବେ ତାହା ସୁନିଶ୍ଚିତ କରିବା ପାଇଁ ଦୃଢ଼ ସଂକଳ୍ପବଦ୍ଧ ।
ଲକ୍ଷପତି ଦିଦିଙ୍କର ଯାତ୍ରା ଏବେ ମଧ୍ୟ ଜାରି ରହିଛି । ଆମେ ହାସଲ କରିଥିବା ପ୍ରତିଟି ମାଇଲଖୁଣ୍ଟ ସହିତ, ପ୍ରତିଟି ମହିଳାଙ୍କୁ ସଶକ୍ତ କରିବା, ପ୍ରତିଟି ଜୀବନକୁ ସ୍ପର୍ଶ କରିବା ସହିତ ଆମେ ବିକଶିତ ଓଡ଼ିଶାର ଦୃଷ୍ଟି ଆଡ଼କୁ ଏକପାଦ ଆଗକୁ ବଢ଼ୁଛୁ । ଆସନ୍ତୁ, ଆମେ ଏହି ଯାତ୍ରାରେ ଏକତ୍ର, ହାତରେ ହାତ ମିଶାଇ ଚାଲିବା, ପ୍ରତ୍ୟେକ ସଫଳତା, ପ୍ରତ୍ୟେକ ସଶକ୍ତ ମହିଳା ଏବଂ ପ୍ରତ୍ୟେକ ରୂପାନ୍ତରିତ ପରିବାରକୁ ଏକ ଉତ୍ସବ ଭଳି ପାଳନ କରିବା ।
