ଭୁବନେଶ୍ୱର, ୧୦/୧୧: ସିନ୍ଦୂର ଖାଇ ଆତ୍ମହତ୍ୟା ଉଦ୍ୟମ କରିଛନ୍ତି ଜଣେ ମହିଳା ସବ ଇନ୍ସପେକ୍ଟର । କାର୍ଯ୍ୟରେ ଅବହେଳା ହେବାରୁ ଖଣ୍ଡଗିରି ଥାନାରୁ ବାଲିଅନ୍ତା ଡିସିପି ଅଫିସକୁ ବଦଳି କରିଥିଲେ ପୂର୍ବତନ ଡିସିପି । ଗୁରୁତର ଅବସ୍ଥାରେ ମହିଳା ଏସଆଇଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ରାଜଧାନୀ ଭୁବନେଶ୍ୱରରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି । 

ସୂଚନା ମୁତାବକ, ପ୍ରଥମେ ମହିଳା ସବ ଇନ୍ସପେକ୍ଟର ଖଣ୍ଡଗିରି ଥାନାରେ କାର୍ଯ୍ୟରତ ଥିଲେ । ସେଠାରେ ଥିବା ବେଳେ କାମରେ ଅବହେଳା କରିଥିଲେ । ଏହି କାରଣରୁ ପୂର୍ବତନ ଡିସିପି ପ୍ରତୀକ ସିଂ ତାଙ୍କର ବଦଳି କରିଥିଲୋ । ତାଙ୍କୁ ଖଣ୍ଡଗିରି ଥାନାରୁ ବାଲିଅନ୍ତା ଡିସିପି ଅଫିସକୁ ବଦଳି କରାଯାଇଥିଲା । ଏହି କାରଣରୁ ମହିଳା ଏସଆଇ ଜଣକ ସିନ୍ଦୂର ଖାଇ ଆତ୍ମହତ୍ୟା କରିବାକୁ ଉଦ୍ୟମ କରିଥିଲେ । ସିନ୍ଦୁର ଖାଇ ମହିଳା ଜଣକ ଗୁରୁତର ହୋଇ ପଡ଼ିଥିଲେ । ଏହା ଦେଖି ମହିଳାଙ୍କ ପରିବାର ଲୋକେ ତୁରନ୍ତ ତାଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ । ସେଠାରେ ତାଙ୍କ ଚିକିତ୍ସା କରାଯାଉଛି ।