ଚଣ୍ଡିଖୋଲ,୨୮/୦୮: ଧର୍ମଶାଳରେ ବଢ଼ିବାରେ ଲାଗିଛି ରାଜନୈତିକ ବିବାଦ । ଧର୍ମଶାଳା ବିଧାୟକ ହିମାଂଶୁ ଶେଖର ସାହୁଙ୍କ କୁମାରୀ ସ୍ଥିତ ଅଫିସ ସମ୍ମୁଖରୁ ଜବତ ହେଲା ଦୁଇଟି ଖୋକା । ଖୋକା ଜବତ କରି ଘଟଣାର ତଦନ୍ତ ଚଳାଇଛି ପୋଲିସ ।  

ସୂଚନା ମୁତାବକ, ଅଗଷ୍ଟ ମାସ ୨୫ ତାରିଖରେ ଧର୍ମଶାଳା ବିଜେଡିର କିଛି ନେତା ତଥା ଜିଲ୍ଲାପରିଷଦ ଜଳଧର ମହାନ୍ତି ଓ ଯୁବ ବିଜେଡି ସଭାପତି କ୍ଷିତୀଶ ନାୟକ ବିଧାୟକ ହିମାଂଶୁ ଶେଖରଙ୍କ କୁମାରୀ ସ୍ଥିତ ଅଫିସ ପାଖକୁ ଆସିଥିଲେ । ସେଠାରେ ବିଧାୟକଙ୍କ ସମର୍ଥକଙ୍କୁ ଧମକ ଚମକ ଦେବା ସହ ଫାଙ୍କା ଗୁଳି ଚାଳନା ମଧ୍ୟ କରିଥିଲେ । ପରେ ଏନେଇ ବିଧାୟକଙ୍କ ସମର୍ଥକ ବିଜେଡି ନେତାଙ୍କ ନାଁରେ ଧର୍ମଶାଳା ଥାନାରେ ଏକ ଲିଖିତ ଅଭିଯୋଗ କରିଥିଲେ। । ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଥିଲା । ତେବେ ବୁଧବାର ଅଫିସ ସମ୍ମୁଖରୁ ଦୁଇଟି ଖୋକା ଜବତ କରିଛି ଧର୍ମଶାଳା ପୋଲିସ । ପରେ ଏନେଇ ଅଧିକ ତଦନ୍ତ ଆରମ୍ଭ କରିଛି ପୋଲିସ । ଅନ୍ୟପଟେ ଜିଲ୍ଲାପରିଷଦ ତଥା ଧର୍ମଶାଳା ବ୍ଲକ ବିଜେଡି ସଭାପତି ଉକ୍ତ ଅଭିଯୋଗକୁ ଖଣ୍ଡନ କରିବା ସହ ଏହାକୁ ସମ୍ପୂର୍ଣ ଭିତ୍ତିହୀନ ବୋଲି କହିଛନ୍ତି ।