ନୂଆଦିଲ୍ଲୀ,୦୬/୦୭: ଗୋଟିଏ ପଟେ ଇସ୍ରାଏଲ ସହ ଲଢେଇ ଚାଲିଥାଏ । ଆଉ ଗୋଟିଏ ପଟେ ଇରାନ୍ ସୁପ୍ରିମ ଲିଡର କେଉଁଆଡ଼େ ଗଲେ ବୋଲି ଖୋଜା ପଡିଥାଏ । ଇସ୍ରାଏଲ ସହ ଭୀଷଣ ସଂଘର୍ଷ ସମାପ୍ତ ପରେ ପ୍ରଥମ ଥର ସାମ୍ନାକୁ ଆସିଛନ୍ତି ଇରାନ୍ ସୁପ୍ରିମ ଲିଡର ଅୟାତୁଲ୍ଲା ଖାମେନେଇ । ଇସ୍ରାଏଲ ସହ ଯୁଦ୍ଧ ହେବା ପରେ ମାସ ମାସ ଧରି ନଜର ଆଢୁଆଳରେ ରହିବା ପରେ ଶନିବାର ଦିନ ଏକ ଧର୍ମିକ କାର୍ଯ୍ୟକ୍ରମରେ ଅଂଶଗ୍ରହଣ କରିବା ପାଇଁ ସର୍ବସାଧାରଣରେ ଦେଖା ଦେଇଛନ୍ତି ଖାମେନେଇ ।
ଇସ୍ରାଏଲ ସହିତ ୧୨ ଦିନ ଧରି ଯୁଦ୍ଧ ହେବା ସମୟରେ ଖାମେନେଇ ସୁରକ୍ଷିତ ସ୍ଥାନରେ ଲୁଚି ରହିଥିଲେ । ଏହି ଯୁଦ୍ଧରେ ଇରାନ୍ର ଅନେକ ଶୀର୍ଷ ନେତୃତ୍ୱଙ୍କ ଜୀବନ ଯାଇଥିଲା । ଏପରିକି ଅନେକ ପରମାଣୁ ବିଶେଷଜ୍ଞ ଓ ସାମରିକ ମୁଖ୍ୟଙ୍କ ମୃତ୍ୟୁ ହୋଇଥିଲା । ଇରାନ୍-ଇସ୍ରାଏଲ ଯୁଦ୍ଧବିରତି ପରେ ପ୍ରଥମ ଥର ସାମ୍ନାକୁ ଆସିଛନ୍ତି ଇରାନ୍ ସୁପ୍ରିମ ଲିଡର । ତେହେରାନରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ସର୍ବସାଧାରଣରେ ନଜର ଆସିଛନ୍ତି ଖାମେନେଇ ।
ଗତ ଜୁନ୍ ୧୩ରେ ଇସ୍ରାଏଲ ସହିତ ଇରାନ୍ର ଯୁଦ୍ଧ ଆରମ୍ଭ ହୋଇଥିଲା । ଏହା ପରଠୁ ଖାମେନେଇ ସର୍ବସାଧାରଣ ଉପସ୍ଥିତିକୁ ଏଡାଇ ଯାଉଥିଲେ । ବ୍ୟକ୍ତିଗତ ଭାବେ ଉପସ୍ଥିତ ନହୋଇ ରେକର୍ଡ ଭିଡିଓ ଜାରି କରୁଥିଲେ । ଦୁଇ ଦେଶ ମଧ୍ୟରେ ସଂଘର୍ଷ ଯୋଗୁଁ ସୁରକ୍ଷିତ ସ୍ଥାନରେ ରହିଥିଲେ । ଏମିତିକି ବଙ୍କର ଭିତରେ ରହି ନଜ ଉତ୍ତରାଧିକାରୀ ମଧ୍ୟ ବାଛିଥିଲେ ଖାମେନେଇ । ଏବେ ପ୍ରଥମ ଥର ନଜର ଆସିଛନ୍ତି ଖାମେନେଇ । ସିଆ ମୁସଲିମ କ୍ୟାଲେଣ୍ଡର ଏକ ପ୍ରମୁଖ ଦିନ ଅଶୁରା ପାଳନ ସମୟରେ ଖାମେନେଇ ଏକ ହଲ ଭିତରକୁ ପ୍ରବେଶ କରୁଥିବାର ଦୃଶ୍ୟ ଦେଖିବାକୁ ମିଳିଛି ।
